02/05/2026
URING MANGGAGAWA, HUKBONG MAPAGPALAYA!
Taas-kamaong nakiisa ang SAKBAYAN CDC sa paggunita ng Pandaigdigang Araw ng Paggawa kahapon, ika-1 ng Mayo, 2026. Kasama ang laksa-laksang hanay ng iba't ibang unyon at mga sektor, binitbit natin ang mga panagawan para sa nakabubuhay na sahod, pagbaba ng presyo ng bilihin, pagtutol sa kontraktwalisasyon, at paggigiit ng karapatan ng bawat manggagawa mula Olivarez Plaza hanggang Crossing Calamba.
Sa kasalukuyan, lantad na lantad ang pagiging tali ng mga kinakaharap na isyu ng mga manggagawang Pilipino sa tatlong salot ng lipunan-- ang imperyalismo, pyudalismo, at burukrata kapitalismo. Nariyan ang patuloy na pagyurak ng mga dambuhalang korporasyon sa batayang karapatan ng mga manggagawa sa patas at nakabubuhay na sahod, ang pangangamkam ng mga lupang ninuno mula sa mga magsasaka, at ang mga patakaran tulad ng 12% VAT at excise tax, na malinaw na patunay ng pagpapasa ng bigat ng krisis sa balikat ng ating mga manggagawa na dati na ngang kuba dahil sa pamamasista ng estado, mas lalo pang kinukuba ng hindi makatao at makatarungang sistema. Sa gitna ng lumalalang krisis pang-ekonomiya dahil sa giyerang agresyon ng imperyalistang US-Israel sa Gitnang Silangan, naniniwala tayo sa SAKBAYAN na ngayon higit kailanman, ay kailangan ng makamasa, demokratiko, at makatarungang pagbabago.
Sa ating pagmartsa nitong Mayo Uno, bitbit natin ang pagkilala at pagpupugay sa uring manggagawa bilang hukbong mapagpalaya. Binigyang pagkilala at pagpupugay ang danas ng mga kaguruan, panadero, tsuper, magsasaka, mangingisda, at lahat ng manggagawa saan mang dako ng bansa. Taas-noo nating kinikilala ang kanilang dakilang kontribusyon sa ating lipunan, higit lalo sa kanilang malaking papel sa ating pakikibaka tungo sa demokratikong lipunan.
Kaya naman, mga Iskolar ng Bayan, ngayon higit kalianman, patuloy nating paigtingin at pagtibayin ang boses ng mga maralita laban sa pamamasista ng estadong nagsisilbi para sa interes ng iilan lamang. Patuloy nating bitbitin ang alab ng militanteng pakikibaka tungo sa makamasang pagbabago. Patuloy nating kondenahin ang bulok na sistemang sumusupil sa pagkamit natin ng ating mga karapatan. Higit lalong ipagpatuloy natin ang paglaban para sa isang lipunang kinikilala ang mga manggagawa bilang maso at karit na magpapanday at mag-aani ng ating tagumpay.
