31/08/2026
PAHAYAG UKOL SA NAIIPONG BASURA SA DAGAT-DAGATAN AVE. KANTO NG LAPU-LAPU AVE., HANGGANAN NG MALABON CITY AT CALOOCAN CITY
Nais pong linawin ng Pamahalaang Lungsod ng Malabon ang sitwasyon tungkol sa naiipong basura sa kahabaan ng Dagat-Dagatan Avenue, kanto ng Lapu-Lapu Avenue, na nasa hangganan ng Malabon City at Caloocan City.
Ang sakop po ng Malabon sa bahaging ito ng Dagat-Dagatan Avenue ay hanggang sidewalk lamang. Dahil ang lugar ay nasa boundary ng dalawang lungsod, kinakailangan ang pagtutulungan at koordinasyon ng mga barangay at kinauukulang tanggapan mula sa parehong panig upang tuluyang matugunan ang problema sa basura.
Sa kabila nito, patuloy na ginagawa ng City Environmental and Natural Resources Office (CENRO) ang regular na paghahakot ng basura sa loob ng sakop ng Malabon. Nag-deploy din po ang CENRO ng mga tauhan upang mag-monitor sa lugar mula 4:00 ng hapon hanggang 12:00 ng hatinggabi, lalo na sa mga oras na madalas na naiulat ang pagtatapon ng basura.
May mga indibidwal na rin pong nahuhuli ng ating mga tauhan dahil sa ilegal na pagtatapon ng basura. Batay sa ating monitoring, ilan sa mga nahuling indibidwal ay nagmula sa iba't ibang lugar at ibang barangay, at may mga gumagamit ng pushcart at iba pang sasakyan upang magdala at magtapon ng basura sa lugar.
Noong Agosto 24, 2026, nakipag-ugnayan ang CENRO sa Barangay Longos upang higit pang palakasin ang monitoring at pagpapatupad ng mga kaukulang hakbang. Nangako ang barangay na magtalaga ng mga tauhan mula 8:00 ng umaga hanggang 5:00 ng hapon, at tutulong din sa monitoring sa mga oras ng gabi.
Ginagawa po ng Pamahalaang Lungsod ng Malabon ang nararapat na hakbang sa loob ng ating nasasakupan. Gayunpaman, hindi sapat ang regular na paghahakot ng basura kung patuloy naman ang illegal dumping, lalo na kung may mga basurang dinadala at itinatapon sa lugar mula sa labas ng sakop ng Malabon.
Kaya naman, hinihiling po natin ang pakikipagtulungan ng mga kinauukulang barangay at tanggapan upang mas mapalakas ang koordinasyon at magkaroon ng kaukulang aksyon sa kani-kanilang nasasakupan.
Hinihiling din po namin ang pakikiisa ng mga residente at ng publiko. Huwag po tayong magtapon ng basura sa kalsada o sidewalk. Sundin po natin ang tamang oras ng paghahakot at gumamit ng mga itinakdang lugar para sa wastong pagtatapon ng basura.
Ang pagpapanatili ng kalinisan at kaayusan ng ating mga kalsada ay responsibilidad nating lahat. Sa pamamagitan ng pagtutulungan ng Malabon, Caloocan, mga barangay, at ng ating mga mamamayan, mapipigilan natin ang illegal dumping at mapapanatili nating malinis, maayos, at ligtas ang lugar para sa lahat.
