12/06/2022
Happy 124th Independence Day.
PAHAYAG ni
Pulis Tinyente Heneral VICENTE D DANAO, JR
Opisyal na Namamahala, Pambansang Pulisya ng Pilipinas
sa Ika-124 Taong Pagdiriwang ng Araw ng Kalayaan
Mabuhay!
Isang ligtas at mapayapang pagbati para sa ika- isangdaan at dalawampu’t apat na taon ng kalayaan ng Republika ng Pilipinas ang aking ipinapaabot sa buong pwersa ng kapulisan sa ibat-ibang panig ng bansa.
Saksi ang sambayanang Pilipino sa giting, sipag at sakripisyo ng kapulisan. Ipinamalas natin ang isang pusong makabayan sa pamamagitan nang pagtupad sa ating sinumpaang tungkulin na pagsilbihan, protektahan at pangalagaan ang ating mga mamamayan. Nagbigay tayo ng isang “Serbisyong TAMA: Pulis na may Takot sa Diyos, Tapat sa kanyang panunungkulan, Pulis na may TApang sa mga lumalabag sa batas, at pulis na may Malasakit sa buong sambayanang Pilipino.” Ipinamalas natin sa ating mga kababayan ang kadakilaan ng mga pulis bilang mga frontliners at tagapangalaga ng seguridad at kapayapaan.
Napagtagumpayan rin natin na magkaroon ng mapayapa at malayang halalan para sa bagong liderato ang ating bansa. Sa araw ng kalayaan, binabati ko ang mga magigiting na pulis na siyang nagbantay sa mga polling precincts, ang mga pulis na patuloy na lumalaban sa pandemya at iba’t ibang uri ng kriminalidad. Nararapat na patuloy nating gampanan ang ating tungkulin at maging kaakibat ng pamahalaan sa pagtahak ng isang maunlad at progresibong Pilipinas.
Ang kagitingan at kadakilaan na ating ipinapakita sa araw-araw nating paglilingkod sa taumbayan na nagdadala ng karangalan sa ating ahensya, ay hindi kailanman matutumbasan ng anumang materyal na bagay. Ang pagtitiwala at pagpapasalamat ng taumbayan sa kanilang pambansang kapulisan ang ating pinaka malaking tagumpay.
Ngayon, kasama sa mga ginugunita natin, hindi lamang ang mga kilalang bayani, kundi pati ang mga kasamahan nating nagsilbing haligi ng kalayaan. Sila ang mga kapwa pulis natin na nagbuwis ng buhay sa gitna ng laban at panganib na dala ng pandemya, kriminalidad at giyera. Sila ang matatawag nating mga bayani ng makabagong panahon.
Bigyan natin sila ng pagkilala, pasasalamat at pagpupugay!
Nananalig ako na sa tulong ng Poong Maykapal ay sabay-sabay nating malalampasan ang krisis na ating kinakaharap sa ngayon.
Sa diwa at ngalan ng pambansang pagkaka-isa, muli nating itaas ng buong dangal at karangalan ang watawat ng Pilipinas, kasabay ang pagsasapuso ng tunay na diwa ng kalayaan.
Mabuhay ang Pambansang Pulisya ng Pilipinas!
Mabuhay ang Pilipino!
Mabuhay ang Bansang Pilipinas
http://pnp.gov.ph
http://twitter.com/pnppio
http://youtube.com/pnppio
