19/08/2026
𝑲𝑾𝑭, 𝑷𝑰𝑵𝑨𝑵𝑮𝑼𝑵𝑨𝑯𝑨𝑵 𝑨𝑵𝑮 𝑷𝑨𝑮𝑻𝑨𝑻𝑨𝑨𝑺 𝑵𝑮 𝑾𝑨𝑻𝑨𝑾𝑨𝑻 𝑺𝑨 𝑷𝑨𝑳𝑨𝑺𝒀𝑶 𝑵𝑮 𝑴𝑨𝑳𝑨𝑪𝑨𝑵𝑨𝑵 𝑩𝑰𝑳𝑨𝑵𝑮 𝑷𝑨𝑮𝑩𝑼𝑩𝑼𝑲𝑨𝑺 𝑵𝑮 𝑩𝑼𝑾𝑨𝑵 𝑵𝑮 𝑾𝑰𝑲𝑨𝑵𝑮 𝑷𝑨𝑴𝑩𝑨𝑵𝑺𝑨 𝟐𝟎𝟐𝟔
Bilang hudyat sa pagdiriwang ng Buwan ng Wikang Pambansa 2026, pinangunahan ng Komisyon sa Wikang Filipino (KWF) ang seremonya ng Pagtataas ng Watawat sa Palasyo ng Malacañan, Mabini Lobby noong 3 Agosto 2026.
Dinaluhan ang seremonya ng mga punò ng sangay at kinatawan mulâ sa KWF at mga opisyal na kawani ng Tanggapan ng Pangulo ng Pilipinas (OP Proper). Isinagawa ang programa sa pakikipagtulungan ng KWF at ng Office of the President-Human Resources Management Office (OP-HRMO) bílang pagpapakita ng pagkakaisa sa pagtataguyod ng wikang pambansa.
Nagbigay ng mensahe si Usec. Georgina Ann Hernandez-Yang ng Tanggapan ng Kalihim-Tagapagpaganap at binigyang-diin niya ang mahalagang papel ng wika sa epektibong pamamahala at pakikipag-ugnayan ng pamahalaan sa mamamayan, aniya:
“At kung wika ang nagbubuklod sa atin bilang isang bayan, sa pamamagitan din ng wika tayo dapat akayin ng pamahalaan sa malinaw na pagpapaliwanag ng ating mga hamon, sa pagtukoy sa landas na dapat tahakin, at sa pag-anyaya sa bawat mamamayan na makibahagi sa ating pagkilos.”
Dagdag pa niya, ang hamon sa pamahalaan ay hindi lámang makapaghatid ng impormasyon kundi ang makabuo ng mas malalim na ugnayan sa mamamayan.
“Pardon my French—but this is the challenge for government today: to connect, and not merely communicate; to inspire, and not merely inform; to move people, and not merely deliver a message.”
Samantala, ibinahagi naman ni Kom. Benjamin M. Mendillo Jr., Komisyoner sa Pangasiwaan at Pananalapi ng KWF, ang rasyonal ng tema ng Buwan ng Wikang Pambansa 2026 na “Wikang Filipino at AI: Kasangkapan sa Pananaliksik at Tulay sa Yaman ng Impormasyon.” Ipinaliwanag niyang mahalagang yakapin ang mga makabagong teknolohiya upang higit na mapalawak ang paggamit ng wikang Filipino sa pananaliksik at pamamahala ng kaalaman.
Ayon kay Komisyoner Mendillo:
“Hindi natin dapat tratuhin ang teknolohiya bilang banta sa ating kultura; bagkus, dapat tingnan itong kasangkapan bilang pantulong sa pananaliksik at sistematikong pagsisinop ng mga nakalap na dokumento sa mabilis na pagpoproseso.”
Ang naturang seremonya ay kasabay ding isinagawa sa Lunera Park bilang paggunita sa Buwan ng Wikang Pambansa at Buwan ng Kasaysayan na dinaluhan din ng mga opisyal at kawani ng KWF.
# # #
