Davao de Oro Provincial Agriculturist's Office

20/08/2026

𝐁𝐚𝐠-𝐨𝐧𝐠 𝐭𝐞𝐤𝐧𝐨𝐥𝐨𝐡𝐢𝐲𝐚 𝐬𝐚 𝐩𝐚𝐧𝐠 𝐚𝐠𝐫𝐢𝐤𝐮𝐥𝐭𝐮𝐫𝐚, 𝐠𝐢𝐦𝐮𝐧𝐭𝐚𝐫 𝐧𝐚!

Gimuntar na sa Barangay Pasian, Monkayo ang bag ong Automatic Weather Station (AWS) kagahapong adlawa Agosto 19.

Ang AWS, usa ka bag-ong teknolohiya nga gilauman nga makatabang sa mga mag-uuma sa Davao de Oro sa pag-monitor sa kahimtang sa panahon, maghatag og localized weather data alang sa mas tukmang agricultural planning, crop advisory, climate monitoring, ug labi na disaster preparedness.

Kabahin kini sa Project SARAI (Smarter Approaches to Reinvigorate Agriculture as an Industry in the Philippines) nga gipangulohan sa mga personahi gikan sa University of the Philippines Los Baños (UPLB), Department of Science and Technology ug sa pakigtambayayong sa Provincial Agriculturist’s Office (PAGRO) sa Davao de Oro.

Via Harold Postrero/IPRD
📸 PAGRO

13/08/2026

WATCH || KASAKA - KaLAMBOan sa Kaumahan!
Atoang hisgutan ang ASF - African Swine Fever,
Kauban si Ms. Nelva Masillones
Guest: Dr. Wilfredo Lindong Jr., Acting Assistant Provincial Veterinarian.

30/07/2026

Karong adlawa atong gi representahan si Gov. Raul G. Mabanglo ug Cong. Maricar Zamora-Mabanglo sa gipahigayon nga Turn Over and Distribution of Agricultural Inputs in Support of the Provincial Cacao Rehabilitation Program nga gipahitabo sa Brgy. New Visayas, Montevista.

Pinaagi niini nga programa, daghang Farmers Associations ang nahimong benepisyaryo ug nakadawat sa mga agricultural inputs nga makatabang sa pagpalambo sa ilang cacao production, ug pagpalig-on sa panginabuhi sa atong mga mag-uuma.

Padayon ang atong paningkamot sa paghatag og serbisyo ug suporta sa sektor sa agrikultura aron mas mapalambo ang produksiyon ug masiguro ang mas maayong kaugmaon alang sa atong mga mag-uuma.

Padayon sa pag-alagad, padayon sa pagpalambo sa agrikultura sa Davao de Oro!

29/07/2026

𝐖𝐀𝐓𝐂𝐇 | Mikabat sa kapin Php 132 milyon ang kantidad sa mga agri inputs ug mga makinarya nga gipanghatag gikan sa Department of Agriculture kagahapong adlawa, Hulyo 28 ngadto sa mga mag-uuma ug mananagat sa Davao de Oro.

Gipang apud-apod kini atol sa pagbisita ni Presidente Ferdinand “Bongbong” R. Marcos Jr. nga gilaumang magpalambo pa sa sektor sa agrikultura sa Probinsya.

🎥 Jay-Ar Naval/IPRD

03/07/2026

03/07/2026

Mga kabarangay, karong adlawa gisaulog nato sa probinsya ang Adlay Harvest Festival 2026 sa Lamdag Farm, Pasian, Monkayo, isip pag-ila sa atong mga Adlay Farmers!

Nakasulay ta mismo unsaon pag-harvest ug pagproseso sa adlay! 😃 Ug kining atong mga na-harvest himuon og liso aron masuportahan ang atong mga mag-uuma sa ilang sunod nga pagpananom.

Himuon na pud ning regular nga programa sa probinsya sa pagpanguna sa PAGRO aron padayon nga mahatagan og training, technical assistance, ug uban pang suporta ang atong mga Adlay Farmers.

Ato pong siguruhon nga padayon ang produksyon sa adlay aron adunay alternatibong suplay kung dunay kakulangan sa bugas.

Ug kabalo ba mo, mga kabarangay? Daghan sab og benepisyo sa panglawas ang adlay ilabi na daw sa mga dunay diabetes ug kabahin sa mas himsog nga pagkaon.

Napakita pud sa atong mga Adlay Farmers ang ilang mga produkto sama sa wine, haplas, arroz caldo, champorado, ug cheese. Di ba, maka-amaze!

Daghang salamat sa nitambong—asosasyon, organisasyon, korporasyon, barangay, mga estudyante sa DdOSC ug KCAST, MHO, MAGRO, PVO, Brgy. Pasian Kap. Maria Crizaldo, PAGRO sa pagpanguna ni Provincial Agriculturist Ronald Sibayan, DA-RFO XI pinaagi ni Adlay Focal Person Merly Salaver, ug sa tanang nahimong kabahin sa maong selebrasyon.

Gisuroy pud nato ang ubang parte sa farm, lakip ang fish ponds, Pasalubong Center site, ug ang site sa umaabot nga BUCAS Center.

Padayon ta nga magtinabangay para sa kalamboan sa atong mga Adlay Farmers ug sa kinatibuk-ang agrikultura sa atong probinsya! 💪

30/06/2026

Malampuson nga gipahigayon karong adlawa, June 30, 2026, ang 2nd Committee Meeting sa Program Management Committee (PMC) alang sa Micro Credit Assistance Program for Cooperatives (MCAPC) didto sa Provincial Agriculturist’s Office.

Gipangunahan kini ni Acting Provincial Agriculturist Mr. Ronald C. Sibayan (Vice Chairperson), uban ang mga miyembro sa PMC. Gi-review ug gi-deliberate sa komite ang mga loan applications sa mosunod nga mga kooperatiba:
- Montevista Coco Farmers Cooperative
- Tandik Multipurpose Cooperative
- VPI Employees Multi-Purpose Cooperative
- Grow Lambo Multipurpose Cooperative
- VPI Agrarian Reform Beneficiaries Cooperative
- Pag-asa Farmers Multipurpose Cooperative

Gisugdan kaniadtong 2009, ang MCAPC nagpabiling lig-on nga kaabag sa paghatag og dugang puhunan—nga WALAY TUBO o interest—aron matabangan ang atong mga kooperatiba sa probinsya. Sa pagkakaron, anaa na sa 111 ka kooperatiba ang natabangan sa maong programa.

Dakong pasalamat kay Gov. Raul Mabanglo sa kanunayng pagsuporta sa mga kooperatiba sa Davao de Oro!

30/06/2026

𝐊𝐚𝐛𝐚𝐭𝐚𝐧-𝐨𝐧𝐚𝐧, 𝐠𝐢-𝐚𝐰𝐡𝐚𝐠 𝐬𝐚 𝐏𝐫𝐨𝐛𝐢𝐧𝐬𝐲𝐚 𝐬𝐚 𝐩𝐚𝐠𝐥𝐚𝐦𝐛𝐢𝐠𝐢𝐭 𝐬𝐚 𝐘𝐨𝐮𝐭𝐡 𝐅𝐚𝐫𝐦𝐞𝐫𝐬 𝐂𝐡𝐚𝐥𝐥𝐞𝐧𝐠𝐞

Gi-awhag sa Probinsya ang mga kabatan-onan nga muapil sa Youth Farmers Challenge (YFC) aron sila makabaton og kalaam nga mahimong agri-entrepreneurs sa umaabot.

Kini human sa gipahigayon nga orientations kaniadtong Hunyo 24 sa Colegio de Nabunturan ug sa Davao de Oro State College kaniadtong Hunyo 25.

Gipasabot sa Provincial Agriculturist’s Office sa mga partisipante ang mga mekanismo sa programa, lakip ang proseso sa aplikasyon,ug mga gikinahanglanong rekisitos aron makaapil.

Dugang niini, gianunsyo sab nga audnay ipahigayon nga kumpetisyon diin mahatag sila og oportunidad nga ipresentar ang ilang mga business proposal nga adunay kalabotan sa agrikultura ug pangisdaan.

Sumala sa opisina, adunay higayon ang mga makadaog sa kumpetisyon nga makadawat og grants o pinansyal nga suporta aron makatukod ug makapalambo sa ilang kaugalingong agribusiness.

Sumala sa Department of Agriculture XI, ang YFC kabahin sa paningkamot sa gobyerno nga madani ang mas daghang kabatan-onan sa agrikultura aron masiguro ang dugayng seguridad sa pagkaon sa nasud. Gilauman usab nga pinaagi sa padayon nga suporta sa mga lokal nga panggamhanan, mas mudaghan pa ang mga batan-ong mosulod ug molambo sa sektor sa agrikultura.

Via Ziyarah Manalo/IPRD

24/06/2026

𝐈𝐧𝐝𝐮𝐬𝐭𝐫𝐢𝐲𝐚 𝐬𝐚 𝐥𝐮𝐛𝐢 𝐬𝐚 𝐃𝐚𝐯𝐚𝐨 𝐝𝐞 𝐎𝐫𝐨 𝐠𝐢𝐩𝐚𝐥𝐢𝐠-𝐨𝐧 𝐩𝐢𝐧𝐚𝐚𝐠𝐢 𝐬𝐚 𝐩𝐚𝐠𝐦𝐮𝐠𝐧𝐚 𝐬𝐚 𝐃𝐚𝐯𝐚𝐨 𝐝𝐞 𝐎𝐫𝐨 𝐂𝐨𝐜𝐨𝐧𝐮𝐭 𝐈𝐧𝐝𝐮𝐬𝐭𝐫𝐲 𝐃𝐞𝐯𝐞𝐥𝐨𝐩𝐦𝐞𝐧𝐭 𝐂𝐨𝐮𝐧𝐜𝐢𝐥 (𝐃𝐃𝐎𝐂𝐈𝐃𝐂)

Gisugdan na sa Probinsya sa Davao de Oro ang proseso sa pagmugna sa Davao de Oro Coconut Industry Development Council (DDOCIDC) aron mas mapalig-on pa ang industriya sa lubi pinaagi sa usa ka Consultation Workshop and Operationalization of DDOCIDC nga gipahigayon niadtong Hunyo 17–18 sa Madayaw Hotel sa Tagum City.

Ang maong kalihokan gisuportahan sa Deutsche Gesellschaft für Internationale Zusammenarbeit (GIZ) ubos sa proyekto nga Strengthening the Implementation of Regional and Local Peace and Development Agendas (SPADe), nga gipondohan sa European Union (EU) ug sa German Federal Ministry for Economic Cooperation and Development (BMZ).

Nagsilbi usab nga technical consultant ug facilitator sa proyekto ang The University of the Philippines Mindanao Foundation, Inc. (UPMFI).

Tumong sa konseho nga mahiusa ang tanang stakeholders sa industriya sa lubi pinaagi sa mas hugot nga koordinasyon, epektibong pagpanday sa mga polisiya, ug paglatid sa direksyon niini.

Atol sa konsultasyon, gihisgutan usab ang paghimo sa Executive Order alang sa opisyal nga pagmugna sa konseho, lakip ang pagtakda sa mga miyembro, ilang mga responsibilidad, ug mga estratehiya alang sa dugang pagpalambo sa industriya.

Gisugdan na usab ang pag-andam sa Davao de Oro Coconut Industry Plan, nga magsilbing giya o blueprint sa mga programa ug kalihokan sa konseho alang sa padayon nga pagpalambo sa industriya sa lubi sa probinsya.

via Ziyarah Manalo/IPRD
📸 PAGRO

‎
‎

23/06/2026

𝐌𝐠𝐚 𝐀𝐠𝐫𝐢𝐜𝐮𝐥𝐭𝐮𝐫𝐚𝐥 𝐑𝐞𝐬𝐞𝐚𝐫𝐜𝐡 𝐎𝐮𝐭𝐩𝐮𝐭𝐬 𝐬𝐚 𝐃𝐝𝐎𝐒𝐂, 𝐆𝐢𝐩𝐫𝐞𝐬𝐞𝐧𝐭𝐚 𝐧𝐠𝐚𝐝𝐭𝐨 𝐬𝐚 𝐏𝐀𝐆𝐑𝐎

Gipresenta sa mga agricultural students gikan sa Davao de Oro State College (DdOSC) ngadto sa Provincial Agriculturist’s Office (PAGRO) – Research and Agricultural Support Services Division ang ilang mga nahuman nga research outputs atol sa Joint Agricultural Research Review ug Technical Meeting niadtong Hunyo 18.

Pormal nga gisusi ug gireview sa PAGRO ang mga research studies aron mahatagan og teknikal nga giya ug dugang nga mga rekomendasyon ang mga estudyante alang sa ilang undergraduate thesis.

Sumala sa PAGRO, ang mga resulta sa maong mga research studies potensyal nga makatabang sa pagpalig-on sa mga programa ug serbisyo sa opisina, ilabina sa paghatag og dugang nga kahibalo ug datos sa mga inobasyon nga magamit sa pagtanom sa mga high-value crops sa upland ug lowland nga mga lugar sa probinsya.

Gawas niini, gisuportahan usab sa PAGRO ang mga estudyante pinaagi sa paghatag og agricultural inputs ug teknikal nga tabang gikan sa in-house review hangtod sa paghuman sa ilang mga research projects.

Ang maong inisyatiba kabahin sa padayong tinguha ni Governor Raul G. Mabanglo sa paglig-on sa sektor sa agrikultura pinaagi sa pagsuporta sa research ug mga inobasyon lang sa mga umaabot nga mga agricultural professionals sa probinsya.

via Harold Postrero/IPRD