14/07/2026
๐จ๐๐ ๐๐๐๐๐๐๐๐ ๐๐๐๐๐๐ ๐๐ ๐๐๐๐๐๐๐๐๐ ๐ฐ๐ท
BUENAVISTA, Guimaras - Kami ang Pamilyang Villanueva mula sa isang Indigenous Peoples (IP) Community sa Sitio Serum, Barangay San Nicolas, ng bayan na ito. Ako si Josephine Villanueva, kasama ang aking asawa na si Oscar Villanueva, at ang aming dalawang anak na sina Jonica at Niรฑo Carl Villanueva.
Ang aming kuwento ay hindi nagsimula sa kasaganaan. Ito ay nagsimula sa isang buhay na puno ng pagsubok, kakulangan, at walang hanggang pagsisikap upang matugunan ang pangangailangan ng aming pamilya. Ngunit sa kabila ng mga hamon, pinili naming kumapit sa pananampalataya, magkaisa bilang pamilya, at maniwala na may mas magandang bukas na naghihintay sa amin sa hinaharap.
Bilang isang pamilyang kabilang sa IP Community, hindi naging madali ang aming paglalakbay. May mga panahong kailangan naming harapin ang kakulangan sa araw-araw na pangangailangan. Ang bawat pagkain na naihahain sa aming hapag-kainan ay bunga ng matinding pagsisikap at pagtitiis.
Ang aking asawa na si Oscar ay hindi namimili ng trabaho. Upang matustusan ang aming pamilya, siya ay nangunguha ng kahoy, nag-aani ng palay, nagtitinda ng walis, nagtatrabaho sa bukid, at gumagawa ng anumang marangal na gawain na makakatulong sa aming pang-araw-araw na pamumuhay.
May mga pagkakataong ang kinikita ay hindi sapat. May mga gabing puno ng pag-aalala kung paano matutugunan ang pangangailangan ng pamilya at kung paano ipagpatuloy ang pag-aaral ng aming mga anak. Ngunit sa gitna ng lahat ng ito, isang bagay ang hindi namin nawalaโang pag-asa. Naniniwala kami na ang kahirapan ay isang pagsubok lamang, hindi isang katapusan. Hindi namin hinayaang ang aming kalagayan ang magtakda ng kinabukasan ng aming mga anak.
Dumating ang isang malaking pagbabago sa aming buhay ng kami ay naging bahagi ng Pantawid Pamilyang Pilipino Program (4Ps). Para sa amin, ang 4Ps ay hindi lamang isang tulong pinansyal. Ito ay naging daan upang mabago ang aming kapalaran, nagkaroon kami ng bagong kaalaman, mas malinaw na direksyon, at mas matibay na pangarap para sa aming pamilya.
Sa pamamagitan ng mga Family Development Sessions (FDS), natutunan namin ang kahalagahan ng pagiging responsableng magulang, wastong pamamahala ng pera, pagtitipid, pagpaplano para sa kinabukasan, at paggawa ng mga desisyon makabubuti sa aming pamilya.
Doon namin higit na nauunawaan na ang pagbabago ay hindi lamang makikita sa malaking bagay. Nagsisimula ito sa maliliit na hakbang, sa bawat tamang desisyon, sa bawat pagtitiyaga, at sa bawat pangarap na patuloy naming pinanghahawakan.
Bilang mga magulang, ang pinakamalaki naming pangarap ay mabigyan ng magandang kinabukasan ang aming mga anak.
Para sa amin, ang edukasyon ang pinakamahalagang pamana na maaari naming maibigay sa kanila. Ngayon, ang aming anak na si Jonica Villanueva ay 2nd Year College sa kursong Bachelor of Public Administration sa Guimaras State University at patuloy na nagbibigay sa amin ng inspirasyon upang magsikap pa para suportahan ang kaniyang pag-aaral dahil siya ay isang Dean's Lister.
Samantala, ang aming anak na si Niรฑo Carl Villanueva ay isang Grade 12 student ng Supang National High School, isang consistent honor student, student leader, at IP Community Youth Leader. Sila ang patunay na hindi naging hadlang ang aming simpleng kalagayan o maging isang Ati upang mangarap. Sa halip, ginawa nila itong inspirasyon upang magsikap, maging mabuting halimbawa, at hikayatin ang iba pang kabataan na maniwala sa kanilang kakayahan.
Isa sa mga biyayang bunga ng aming pagsisikap ay ang pagkakaroon namin ng aming kongkretong bahay. Maaaring isang simpleng tahanan lamang ito para sa iba, ngunit para sa amin, ito ay simbolo ng mga sakripisyo ng aming pinagdaanan, mga panalangin na aming inialay, at mga pangarap na unti-unting natupad. Ang bawat bahagi ng aming tahanan ay nagsasalaysay ng aming paglalakbayโmula sa panahon ng kakulangan hanggang sa panahon ng pag-asa. Dito namin natutunan na ang tunay na tahanan ay hindi lamang gawa sa semento at materyales. Ito ay binubuo ng pagmamahalan, pagtutulungan, pag-unawa, at pananampalataya.
Para sa amin, ang tunay na tagumpay ay hindi lamang tungkol sa sariling pag-unlad. Ang mga biyayang aming natanggap ay nagsilbing inspirasyon upang mas lalo kaming tumulong at maglingkod sa aming komunidad. Aktibo kaming nakikilahok sa mga programa ng barangay, simbahan, at ng Serum Ati Community Association. Ako ay nagsisilbi sa aking komunidad bilang isang Barangay Health Worker upang matutukan ang kalusugan ng kada pamilya ng IP Community. Si Oscar ay nagsisilbing Barangay Volunteer at tumutulong sa lahat ng programa at gawain ng barangay. Si Jonica bilang isang atleta, youth member at deanโs lister ay nagsisilbing inspirasyon sa mga kabataan na magsikap at magpursige.
Si Niรฑo Carl, bilang isang IP Community Youth Leader at honor student, ay patuloy na nagbibigay-inspirasyon sa mga kabataan na maging responsable, mangarap, at maging bahagi ng pagbabago sa kanilang komunidad.
Kung kami ay tanungin kung ano ang pinakamahalagang bagay na mayroon kami, hindi ito ang aming bahay o anumang materyal na bagay. Kundi ang pinakamalaking kayamanan namin ay ang aming pamilya. Isang pamilya na may matibay na pananampalataya sa Diyos, puno ng pagmamahal at pagkakaisa, na hindi sumusuko sa harap ng anumang pagsubok. Isang pamilya na naniniwala na ang bawat pangarap ay maaaring makamit sa pamamagitan ng sipag, tiyaga, at pagtutulungan.
Ang aming kwento ay isang paalala na ang kahirapan ay hindi permanente. Ang mga pagsubok na ating nararanasan ngayon ay maaaring maging bahagi ng paghahanda para sa isang mas magandang bukas. Huwag mawalan ng pag-asa sa gitna ng mga paghihirap. Patuloy na mangarap, magsikap, at maniwala na may mga pagkakataong darating upang baguhin ang ating buhay.
Nagpapasalamat kami sa DSWD sa pamamagitan ng 4Ps, sa Lokal na Pamahalaan ng Buenavista, sa Barangay San Nicolas, at sa lahat ng naging bahagi ng aming paglalakbay.
Higit sa lahat, nagpapasalamat kami sa Diyos na patuloy na gumabay at nagbigay sa amin ng lakas upang harapin ang bawat pagsubok. Ngayon, hindi na lamang kami isang pamilyang nakalampas sa kahirapan. Kami ay isang pamilyang nagbibigay ng pag-asa. Isang pamilyang nagpapatunay na ang edukasyon ay kayang magbago ng buhay. Isang pamilyang naglilingkod sa komunidad. At isang pamilyang naniniwala na ang tunay na tagumpay ay hindi lamang nasusukat sa kung ano ang ating natamo, kundi sa kung gaano karaming buhay ang ating napasigla at nabigyan ng inspirasyon.
Kami ang Pamilya Villanueva, Champion sa 2026 Huwarang Pantawid Pamilya Provincial Search ng Probinsya ng Guimaras. (Ipinasa ng Buenavista MOO, Iloilo-Guimaras POO)
