22/07/2026
OPISYAL NA PAHAYAG
Noong ika-9 ng Hulyo 2026, inimbitahan si Punong Barangay John Melchor Magusib sa isang internet radio program na pinangungunahan ni Mr. Ben Tulfo na unang inere noong ika-10 ng Hulyo 2026. Sa naturang panayam, nabanggit ang isang alegasyon mula sa isang tagapakinig tungkol sa isang alleged Person Who Uses Drugs (PWUDs) na nagdudulot diumano ng perwisyo sa barangay at sinasabing pinoprotektahan ng Punong Barangay.
Nais naming magbigay ng mga mahinahong paglilinaw:
1. Ang Barangay San Vicente, sa pamamagitan ng Barangay Anti-Drug Abuse Council (BADAC), ay patuloy na nakikipagtulungan at sumusunod sa lahat ng umiiral na batas, alituntunin, at proseso ng Barangay Drug Clearing Program (BDCP) sa ilalim ng Dangerous Drugs Board (DDB) at Department of the Interior and Local Government (DILG), sa pakikipag-ugnayan sa Quezon City Anti-Drug Abuse Advisory Council (QCADAAC), Anonas Police Station 9, at Philippine Drug Enforcement Agency (PDEA).
2. Ang Opisina ng Punong Barangay ng Barangay San Vicente ay walang kapangyarihang gumawa o magtakda ng drug watchlist. Ang mga opisyal at di-opisyal na watchlist ay nagmumula lamang sa PDEA at PNP matapos ang masusing beripikasyon mula sa kanilang validated intelligence. Ang tungkulin ng barangay ay nakatuon sa intervention, monitoring, referral, at community-based rehabilitation para sa mga indibidwal na opisyal na kabilang sa watchlist, alinsunod sa itinakdang proseso ng pamahalaan.
Kinumpirma ni PDEA Spokesperson Joseph Frederick Calulut na ang naturing na indibidwal ay isang alleged Person Who Uses Drugs (PWUDs) sa naturang programa, ngunit ang parehong indibidwal ay nakumpirmang hindi kabilang sa official and unofficial drugs watchlist na ibinahagi sa Barangay San Vicente sa pamamagitan ng QCADAAC. Ang naturing na indibidwal ay isang bona fide resident ng barangay, at ang pagbanggit ng kanyang pangalan sa pampublikong programa nang walang sapat na beripikasyon ay maaaring makasira sa kanyang kanyang pangalan, pamilya, at reputasyon.
Sa ganitong pagkakataon, mahalaga ang pagtalima sa Data Privacy Act of 2012, sa constitutional right to due process, at presumption of innocence upang upang matiyak na walang sinuman ang mapaparatangan nang hindi pa napapatunayan ang anumang alegasyon sa tamang paraan.
Bilang tugon, nakikipag-ugnayan na ang Barangay San Vicente kay PDEA Regional Director III Derrick Arnold C. Careon upang matiyak na lahat ng impormasyon ay dadaan sa tamang beripikasyon at imbestigasyon. Patuloy kaming handang makipagtulungan sa anumang lehitimong imbestigasyon, sa pamamagitan ng BADAC at iba pang kaugnay na komite, nang buong puso at may pananagutan sa mga isyung tulad nito.
Mariin ring itinatanggi ng Barangay San Vicente ang anumang paratang na si Punong Barangay John Melchor Magusib ay nagbibigay ng proteksyon sa sinumang drug personality. Wala kaming hangaring protektahan ang sinumang lumalabag sa batas. Patuloy na magsisikap ang Makabagong San Vicente na maglingkod nang tapat, responsable, at may buong paggalang sa batas. Naninindigan kami na ang bawat alegasyon ay dapat dumaan sa tamang proseso ng imbestigasyon, habang ang dangal at karapatan ng bawat mamamayan ay nararapat na mapangalagaan. Ang laban kontra ilegal na droga ay isasagawa nang may integridad, pananagutan, at paggalang sa rule of law.
Kasabay nito, nananawagan rin kami sa lahat ng grupo, tanggapan, at ahensya na pairalin ang maingat na beripikasyon, wastong koordinasyon sa mga awtorisadong institusyon, at pagsunod sa itinakdang proseso upang maiwasan ang pinsala sa mga inosenteng mamamayan at mapanatili ang integridad ng mga lingkod-bayan. Bukas ang aming tanggapan sa lahat ng kinauukulang panig upang mahinahong mapag-usapan ang isyung ito. Sa pamamagitan ng bukas na diyalogo at tamang proseso ay mas mapapalakas ang tiwala ng komunidad at mas magiging epektibo ang ating sama-samang laban kontra ilegal na droga.
Maraming salamat po.
