22/05/2026
Maraming salamat, mga Lingkod-Bayan, sa inyong umaapaw na suporta at tiwalang ibinigay sa mga prinsipyo at platapormang bitbit ng SANDIGAN at sa sama-samang pag-aklas ay ating napagtagumpayan ang nagdaang local at university-wide student council elections para sa susunod na akademikong taon 2026-2027.
Mainit at taas-kamao nating binabati ang mga tunay, palaban, at makabayang Lingkod-Bayang sina Mark Lemor Ong (Chairperson) at Yaffa Dancel (STRAW Councilor) sa pagkakahalal sa ika-34 na Konseho ng mga Mag-aaral ng Pambansang Dalubhasaan ng Administrasyong Pangmadla at Pamamahala.
Simula lang ito ng panibagong yugto sa labang isulong ang pambansang demokrasya sa loob at labas ng pamantasan at igiit ang mga demokratikong karapatan laban sa dinastiyang Marcos-Duterte na kapwa pahirap at nag-aagaw-kapangyarihan sa gitna ng lumalalang krisis na hinahasik at pinaiigting ng imperyalistang U.S. at Zionistang Israel.
Atin ring ipinapanawagan na iproklama ang Ways and Means Administrator at External Affairs Administrator upang ganap na mabuo ang konseho at tuluyan nitong magampanan ang tungkulin nitong pagsilbihan ang sangkaestudyantehan at mas malawak na lipunan.
Tungo sa konsehong pinanday ng makabuluhang prinsipyo at binuo ng makahulugang saligan, at para sa konsehong militante, progresibo, at makabayan, halina, Lingkod-Bayan, at sumama sa mas malawak na hanay ng masang anakpawis, at tunay na paglingkuran ang sambayanan! ❤️🔥✊
