23/08/2026
Pinalakas na Habagat, Posibleng Magdulot ng Matinding Pag-ulan sa Luzon
Agosto 23, 2026
Nagbabala ang Office of Civil Defense (OCD) sa posibleng tuloy-tuloy na pag-ulan sa kanluran at hilagang Luzon, kabilang ang National Capital Region (NCR), dahil sa inaasahang paglakas ng Habagat bunsod ng mga bagyong “Saudel” at “Gaenari”.
Sa isinagawang Pre-Disaster Risk Assessment (PDRA) ng OCD kasama ang iba pang ahensya at Local Government Units (LGUs), tinalakay ang mga posibleng epekto ng sama ng panahon at mga kinakailangang paghahanda.
Ayon kay OCD Assistant Secretary Bernardo Rafaelito Alejandro IV, maaaring magsimula ang pag-ulan sa Lunes o Martes at magpatuloy hanggang Huwebes o Biyernes. Posible itong magdulot ng pagbaha, pagguho ng lupa, pagtaas ng lebel ng mga ilog at pagtaas ng tubig sa mga dam at reservoir.
Maaari ring maapektuhan ang transportasyon at agrikultura dahil sa labis na pag-ulan at waterlogging.
Pinaigting naman ng OCD ang monitoring at koordinasyon sa iba pang ahensya at LGUs sa mga lugar na posibleng maapektuhan. Tinitiyak din ang kahandaan ng response teams, assets, at food at non-food items para sa agaran at mabilis na pagtugon.
Samantala, pinapayuhan ang publiko na manatiling alerto at sumunod sa mga abiso ng awtoridad, lalo na sa mga nakatira sa mabababang lugar na madaling bahain at mga lugar na may banta ng pagguho ng lupa.
Pinapayuhan din ang mga nasa baybayin at biyahero na iwasang pumalaot o bumiyahe kapag masama ang panahon.
