Provincial Social Welfare and Development Office - Romblon

25/05/2026

25/05/2026

Nananawagan ngayon ng agarang tulong ang pamilya ni Elvie Solis na kasalukuyang nasa RPH at nangangailangan ng AB+ na uri ng dugo para sa kanyang medikal na suporta.

Sa mga may mabubuting loob na may ganitong blood type at nais tumulong, maaari kayong makipag-ugnayan agad kay Jonivie Rico Caya sa hotline number na 0910-470-4747.

22/05/2026

𝗕𝗥𝗘𝗔𝗞𝗜𝗡𝗚: Nagdeklara ang Malacañang ng regular holiday sa darating na Miyerkules, May 27, 2026, para sa pagdiriwang ng Eid'l Adha o Feast of Sacrifice.

Sa ilalim ng Proclamation No. 1264 na nilagdaan ni Pangulong Ferdinand Marcos Jr. nitong May 21, idineklara ang holiday kasunod ng rekomendasyon ng National Commission on Muslim Filipinos (NCMF).

20/05/2026

Provincial GFPS at TWG, Nagsagawa ng Gender and Development Plan and Budget Review for CY 2027 para sa 17 Munisipalidad ng Probinsya ng Romblon.

Nagsagawa ang Provincial Gender and Development Focal Point System (GFPS), katuwang ang Technical Working Group (TWG), ng paunang pagsusuri sa Fiscal Year 2027 Gender and Development (GAD) Plan and Budget ng labingpitong (17) munisipalidad alinsunod sa itinakdang panuntunan ng Department of the Interior and Local Government (DILG) Memorandum.

Layunin ng naturang aktibidad na matiyak na ang mga isinumiteng GAD Plan and Budget ng bawat munisipalidad ay naaayon sa pambansang polisiya sa Gender and Development, tumutugon sa mga isyung pangkasarian, at sumusunod sa itinakdang gabay sa pagpaplano at pagbabadyet.

Sa isinagawang pagsusuri, masusing tinalakay at sinuri ng Provincial GFPS at TWG sa pamumuno at direktiba ng GFPS Chairperson Governor Trina Firmalo-Fabic katuwang ng DILG Romblon sa pamumuno ni PD German Yap ang mga programa, proyekto, at aktibidad na nakapaloob sa mga isinumiteng plano upang matiyak ang pagiging gender-responsive ng mga ito. Nagbigay rin ng mga rekomendasyon at teknikal na payo upang higit pang mapahusay ang implementasyon ng mga programang nakatuon sa pagsusulong ng pagkakapantay-pantay ng kasarian at inklusibong pamamahala.

Pasasalamat kay Ms. Roxan Fopalan LGOO V, DILG Romblon sa masusi at matiyagang talakayan sa loob ng 2 araw.

Ipinakita rin sa aktibidad ang patuloy na pakikiisa at kooperasyon ng mga lokal na pamahalaan sa pagsusulong ng Gender and Development mainstreaming bilang mahalagang bahagi ng lokal na pagpaplano at pag-unlad.

20/05/2026

𝐏𝐑𝐄𝐒𝐒 𝐑𝐄𝐋𝐄𝐀𝐒𝐄 | “𝐁𝐚𝐭𝐚 𝐁𝐚𝐥𝐢𝐤 𝐄𝐬𝐤𝐰𝐞𝐥𝐚”: 𝐍𝐀𝐒 𝐒𝐲𝐦𝐩𝐨𝐬𝐢𝐮𝐦 𝐬𝐚 𝐑𝐨𝐦𝐛𝐥𝐨𝐧 𝐂𝐚𝐩𝐢𝐭𝐚𝐥, 𝐍𝐚𝐠𝐛𝐢𝐠𝐚𝐲 𝐧𝐠 𝐏𝐚𝐧𝐢𝐛𝐚𝐠𝐨𝐧𝐠 𝐏𝐚𝐠-𝐚𝐬𝐚 𝐬𝐚 𝐦𝐠𝐚 𝐊𝐚𝐛𝐚𝐭𝐚𝐚𝐧𝐠 𝐇𝐮𝐦𝐢𝐧𝐭𝐨 𝐬𝐚 𝐏𝐚𝐠-𝐚𝐚𝐫𝐚𝐥

𝗥𝗢𝗠𝗕𝗟𝗢𝗡, 𝗥𝗢𝗠𝗕𝗟𝗢𝗡 — Muling hinikayat ang mga kabataang 4Ps na Not-Attending-School (NAS) o mga monitored children na huminto sa pag-aaral na ipagpatuloy ang kanilang edukasyon sa isinagawang NAS Symposium o “Bata Balik Eskwela” sa Multi-Purpose Building, Capaclan, Romblon, Romblon noong Mayo 14, 2026.

Sa temang “Edukasyon ay Mahalaga, Ito ay Ating Ipaalala,” nagkaisa ang DSWD-4Ps, MSWDO, ALS, at iba’t ibang ahensya upang magbigay ng inspirasyon, gabay, at suporta sa mga batang wala sa paaralan at kanilang mga magulang.

Tinalakay sa symposium ang mahahalagang usapin tulad ng early pregnancy prevention, drug prevention education, at child labor prevention upang mas mapalalim ang kamalayan ng mga kabataan sa kahalagahan ng edukasyon at paghubog ng kanilang kinabukasan.

Naging tampok din ang testimonya ni El Jay Trinidad Francisco, RSW, SWO I ng PSWDO, na nagbahagi ng kanyang kwento bilang patunay na ang edukasyon ay daan upang maabot ang mga pangarap sa buhay.

Bilang bahagi ng programa, nagsagawa rin ng assessment at one-on-one interviews sa mga bata at magulang upang mas maunawaan ang kanilang mga pinagdaraanan at mabigyan ng naaangkop na suporta at interbensyon.

Nagtapos ang aktibidad sa isang Pledge of Commitment mula sa mga magulang, kabataan, at 4Ps staff bilang simbolo ng kanilang sama-samang pangako na suportahan ang edukasyon ng bawat bata.

Patunay ang aktibidad na ito na sa tulong ng pamilya, komunidad, at pamahalaan, ang bawat batang muling bumabalik sa paaralan ay isang hakbang tungo sa mas maliwanag na kinabukasan.

Basahin ang balita sa: https://fo4b.dswd.gov.ph/2026/05/bata-balik-eskwela-nas-symposium-sa-romblon-capital-nagbigay-ng-panibagong-pag-asa-sa-mga-kabataang-huminto-sa-pag-aaral/

❤