03/08/2026
PINGGANG PINOY COOKING CONTEST, TAMPOK SA PAGDIRIWANG NG NUTRITION MONTH NG LGU
Isang masayang Pinggang Pinoy Cooking Contest ang isinagawa ng pamahalaang lokal ng San Marcelino bilang bahagi ng pagdiriwang ng 52nd Nutrition Month, kung saan tampok ang iba’t ibang masustansiyang pagkaing naaayon sa konsepto ng Pinggang Pinoy.
Siyam (9) na grupo mula sa iba’t ibang tanggapan ng pamahalaang lokal ang nagpamalas ng kanilang pagkamalikhain sa paghahanda ng masustansiya at masasarap na almusal, tanghalian, at hapunan na nagsusulong ng wastong nutrisyon at tamang gabay sa pagkain.
Pinangunahan ng Municipal Nutrition Action Office, katuwang ang Municipal Health Office at Municipal Human Resources Management Office, ang matagumpay na pagsasagawa ng cooking contest sa Plazuela Multi-Purpose Hall noong Hulyo 30, 2026.
Layunin ng patimpalak na ipakita ang kahalagahan ng Pinggang Pinoy bilang gabay sa wastong nutrisyon at balanseng pagkain para sa mga Pilipino.
Gumamit ang mga kalahok ng iba’t ibang gulay, prutas, karne, at iba pang masustansiyang sangkap upang makalikha ng mga pagkaing hindi lamang masarap kundi masustansiya rin.
Sa pamamagitan nito, naipakita kung paano makapaghahanda ng masarap, masustansiya, at abot-kayang pagkain gamit ang mga lokal at madaling makuhang sangkap.
Ang Pinggang Pinoy ay isang food guide na binuo para sa mga Pilipino upang magsilbing gabay sa tamang proporsyon ng pagkain sa bawat kainan.
Binubuo ito ng gulay, prutas, kanin o iba pang carbohydrates (Go foods), at ulam o pagkaing mayaman sa protina (Grow foods), na mahalaga sa pagpapanatili ng balanseng nutrisyon.
Itinanghal na kampeon ang Sangguniang Bayan Office, na tumanggap ng ₱10,000 na cash prize. Pumangalawa naman ang Nutreasury Team ng Municipal Treasury Office, na tumanggap ng ₱8,000, habang pumangatlo ang Municipal Agriculture Office, na tumanggap ng ₱5,000.
Tumanggap naman ng tig-₱3,000 consolation prize ang MENRO’s Kitchen Warriors ng Municipal Environment and Natural Resources Office (MENRO), Budget ERS ng Municipal Budget Office, Municipal Planning and Development Office, Rural Health Unit, Municipal Tourism Office, at Municipal Assessor’s Office.
Lubos ang pasasalamat ng ating mahal na Hon. Mayor Elvis Ragadio Soria sa lahat ng nakiisa at nagbigay ng inspirasyon sa pagpapakita na ang masustansiyang pagkain ay maaaring maging masarap, abot-kaya, at malikhaing ihain. Pinasalamatan din niya ang mga naging punong-abala at katuwang sa matagumpay na pagsasagawa ng makabuluhang aktibidad na ito.
Ayon sa alkalde, ang pagsasagawa ng naturang aktibidad ay patunay na sa pamamagitan ng pagkakaisa at pagtutulungan ay mas maipalalaganap ang kahalagahan ng wastong nutrisyon sa pamamagitan ng paghahanda ng mga masusustansiyang pagkain.
Naging hurado sa patimpalak sina Ms. Maureen Advincula, School Administrator ng GIS Institute of Technology Phils., Inc.; Mr. Patrick John T. Soria ng GIS Institute of Technology Phils., Inc.; at Mr. Sean Kent Evangelista, owner ng Shannon’s Catering Services.
"Edukasyon...Respeto...Serbisyong tapat para sa inyo...MARCELINEANS!"
