21/04/2026
OPISYAL NGA PAHAYAG
Tungod sa mga bag-ong posts ug personal nga mga komentaryo nga nagkalat sa social media mahitungod sa makapasubo nga insidente didto sa Kulot Cave, Gingha River, Brgy. Calatngan, San Miguel, ang Opisina sa Tourism ug ang Lokal nga Pangagamhanan sa San Miguel nagpahayag sa among kasubo sa wala damha nga pagpanaw sa tulo nato ka kaigsoonan sa komunidad.
Kining makapasubo nga hitabo nakaapekto pag-ayo sa tibuok komunidad. Base sa inisyal nga impormasyon, ang kalihokan nga gihimo sulod sa underground cave area—bisan pa man nga kini nailhan nga tradisyonal nga pangisdaanan sa mga lokal ug wala pa’y naitalang susamang trahedya kaniadto—wala ma-koordinar sa atong Bantay Gubat personnel ug sa mga Opisyal sa Barangay Calatngan, ilabi na nga ang maong lugar dili girekomenda alang sa mga walay kasinatian sa diving. Ang hustong koordinasyon ug estriktong pagsunod sa mga safety protocols mahinungdanon kaayo aron masiguro ang kaayohan, kaluwasan, ug proteksyon sa tanang bisita ug lumulupyo.
Bisan pa sa maong hitabo, among ipadayag ang among sinsero ug kinasingkasing nga pakikiramay sa mga pamilya sa nabiktima ug sa tibuok komunidad.
Niining panahona sa kasubo, among ginahangyo ang tanan nga likayan ang pagpakaylap sa negatibo o makadaot nga mga komentaryo mahitungod sa insidente, labi na kadtong makadaot sa imahe sa Gingha River. Ang Lokal nga Pangagamhanan nagpabilin nga determinado sa pagseguro nga ang atong mga destinasyon sa turismo luwas, hapsay ang pagdumala, ug angay matagamtaman sa tanang lokal ug mga bisita.
Padayon ta sa pagpalambo sa responsableng turismo, pagsuporta sa atong mga lokal nga atraksyon, ug pagtinabangay sa pagpalig-on sa kultura sa kaluwasan, kooperasyon, ug respeto. Pinaagi niini, makatabang kita sa paghimo og luwas ug maabiabihon nga palibot alang sa tanang San Miguelnon ug mga bisita.
SALAMAT YAGBOY IYO TIBO.
