26/07/2026
LOOK | Simpleng Selebrasyon, Masayang Pagbati para sa Ika-35 Kaarawan ni Mayor Anjo Miro
Isang simple ngunit makabuluhang pagdiriwang ang isinagawa bilang pagpupugay sa ika-35 kaarawan ni Hon. Mayor Antonio Jose “Anjo” T. Miro III.
Nakiisa sa pagbibigay-pugay ang mga opisyal at kawani ng Lokal na Pamahalaan ng San Pablo, mga Punong Barangay at opisyal ng barangay, mga SK Chairperson, mga kinatawan ng iba’t ibang ahensya ng pamahalaan, pamilya, at mga kaibigan ng alkalde.
Naghatid din ng taos-pusong pagbati ang mga taga-LGU San Pablo, DepEd San Pablo District sa pangunguna ni Dr. Nita G. Palogan, gayundin ang San Pablo Police Station sa pamumuno ni PCPT Pedro Allam at ang San Pablo Fire Station sa pangunguna ni FINSP Christopher Acorda. Ang kanilang mga pagbati ay ipinarating sa pamamagitan ng mga video messages na nagpapakita ng kanilang suporta at pagpapahalaga sa pamumuno ni Mayor Anjo.
Lalo pang naging masaya ang pagdiriwang nang sabay-sabay na nagsayaw ang mga dumalo sa saliw ng awiting “Happy Birthday Mayor Anjo Miro, Meddu Nga Mayor Mi!” na pinagtulungang likhain at i-kompos ng mag-asawang Harold Tumaliuan, Principal II, at Roseman B. Tumaliuan, MDRRMO. Ang mga dance steps naman ay nilikha at itinuro ni FO1 John Deihl Sauler ng San Pablo Fire Station, na nagdagdag ng sigla at kasiyahan sa selebrasyon.
Bilang simbolo ng kanilang pagmamahal at pagpapahalaga, isa-isang nagbigay ng rosas ang mga bisita kay Mayor Anjo kasabay ng kanilang taos-pusong pagbati at mensahe para sa kanyang kaarawan. Ang simpleng handog na ito ay nagpakita ng pagkakaisa, suporta, at pagmamahal ng komunidad para sa kanilang minamahal na punong bayan.
Sa kanyang mensahe, taos-pusong nagpasalamat si Mayor Anjo sa lahat ng nakisaya, nagbigay ng pagbati, at naglaan ng oras upang maging bahagi ng kanyang espesyal na araw. Nagpahayag din siya ng kanyang pasasalamat sa patuloy na suporta, tiwala, at pakikiisa ng mamamayan ng San Pablo sa mga programa at adhikain ng lokal na pamahalaan.
Sa kanyang kaarawan, muling ipinahayag ng mga mamamayan ng San Pablo ang kanilang suporta at pasasalamat sa dedikasyon at serbisyong patuloy na ibinibigay ni Mayor Anjo para sa kaunlaran ng bayan.
Maligayang ika-35 kaarawan, Mayor Anjo Miro! Nawa’y patuloy kang gabayan at pagpalain ng Poong Maykapal ng mabuting kalusugan, karunungan, at lakas sa iyong patuloy na paglilingkod para sa bayan ng San Pablo.
