17/04/2013
Umalma ang tauhan ng isang vice mayor sa San Rafael, Bulacan sa maling akusasyon umano laban sa kanya na paninira sa kanyang pagkatao dahil sa pagiging malapit umano nito sa vice mayor.
Ayon kay Sonny Cruz, consultant ni San Rafael Vice Mayor Cipriano Goto Violago, isang opisyal umano ng lokal na pamahalaan ang desperadong nagbibintang sa kanya ng mga nagaganap na karahasan sa kanilang lugar.
Alam umano sa kanilang lugar na malakas ang hatak sa tao ni Violago at marami itong natutulungan kaya sinisimulan na umano silang siraan nang walang basehan at katotohanan.
"Malakas kasi si Vice Mayor Violago at saka gusto s'ya ng tao kasi malinis ang kanyang pangalan kaya 'yung mga tao na malalapit kay Vice Mayor na tulad ko ang pinupuntirya para sirain si Vice Mayor," ani Cruz.
Nagtataka rin umano ang kampo ni Violago na sa tuwing may magaganap na patayan sa kanilang lugar ay agad umanong ibinibintang sa kanila ang insidente.
Nanawagan din si Cruz sa chief of police ng San Rafael na si P/Supt. Rodolfo Hernandez, na magsagawa ng malalimang imbestigasyon at paigtingin ang kampanya ng pulisya laban sa krimen upang tuluyan umanong malutas ang mga kaso ng patayan sa kanyang nasasakupan at hindi nadadawit ang mga inosenteng tao tulad niya.
