27/04/2026
Nagbabago ang sistema ng ating nakasanayan kasabay ng pagbabago ng mga halal na namumuno.
Magkakaiba man ng partido, pananaw, o ideolohiya, nananatili ang paggalang sa isa’t isa. Subalit, kapag ang usapin ay nahahaluan ng matinding damdaming politikal, hindi maiiwasan ang pagtatalo at palitan ng opinyon sa loob ng session hall.
Walang katotohanan ang paratang ng “coercion” o political pressure. Naalala ko noong nagkaroon ng pulong ang mga bokal kasama si Governor Sol Aragones. May isang bokal na nagsabi: “Gob, hindi po ako tumututol sa inyong mga programa, nagtatanong lamang po ako.” At ang tugon ng Gobernador: “Oo naman. Isa sa mga tungkulin ninyo bilang bokal ay magtanong at magsuri upang matiyak na tama at maayos ang proseso ng mga programa at proyekto ng Pamahalaang Panlalawigan.”
Totoo, hindi lamang paggawa ng mga ordinansa at resolusyon ang aming tungkulin. Responsibilidad din naming suriin, repasuhin, at tiyakin na ang mga programa, proyekto, at pondo ng Pamahalaang Panlalawigan ay naaayon sa batas at tunay na nakikinabang ang mamamayan.
Ang pressure na aming nararamdaman ay hindi politikal, kundi ang responsibilidad na tiyaking ang bawat desisyon, lalo na sa usapin ng badyet at paglalaan ng pondo, ay tama, makatarungan, at napapanahon. Ito ang uri ng pressure na kaakibat ng tapat at maingat na paglilingkod sa mamamayan.
Walang kompetisyon, at hindi rin dahil sa pagsipsip o pamimilit ang pagsuporta ng isang bokal sa mga programa. Ito ay bunga ng malaya, masusing pagsusuri at taos-pusong hangarin na makapaglingkod sa mamamayan.
Sa bawat programang inaprubahan, hindi ang Gobernador o ang mga bokal ang nakikinabang, kundi ang mamamayang nagtiwala at umaasa sa isang gobyernong may solusyon.
