BAYAN - Manila

21/08/2026

19/08/2026

WTE: HINDI SAGOT SA PROBLEMA SA BASURA AT PAGBAHA

PRESS STATEMENT
13 August 2026

AYUSIN ANG KAPALPAKAN SA FLOOD CONTROL,
‘WAG IPAGPILITAN ANG WTE SA MAYNILA

Tinututulan ng Manila Anti-Incinerator Alliance (MAIA) ang panukala ni Pangulong Bongbong Marcos na Smokey Mountain Waste-to-Energy (WTE) incineration bilang solusyon sa pagbaha. Sa halip na ibida ang WTE bilang solusyon, dapat panagutin ng pangulo ang mga ahensiya ng gobyerno na responsable sa maling pagpapatupad ng mga proyekto na dapat sana ay nakapagsalba ng buhay, kabuhayan at ari-arian. Noong nakaraang taon pa lang, isinusulong na ng pangulo ang WTE bilang sagot sa pagbaha sa Maynila. Pero ang ganitong pananaw ay pinag-iisa ang dalawang magkaibang problema, problema sa pagbaha at problema sa basura.

Ang pagdagsa ng basura sa mga kanal at estero ay problema sa waste management at kapalpakan ng imprastraktura, hindi palusot para isulong ang insinerasyon. Ang pagbaha ay problema sa urban planning, land-use at climate change, na masosolusyonan sa pagkakaroon ng maayos na drainage, pinaigting na pangangalaga sa kalikasan at pagpapatupad ng epektibong flood control systems.

Oo, nakakadagdag sa pagbaha ang basura, lalo na kung basta-basta na lang itinapon, pero hindi mapipigilan ng WTE at incineration ang pagdami ng basura. Ang kailangan para matugunan ito ay mahigpit na pagpapatupad ng mga sistema at polisiyang sumusuporta sa responsableng produksyon at pagbabawas ng basura tulad ng reuse, repair, refill, redesign, recycling and composting, gayon din ang pagkilala sa ambag ng mga waste pickers o mangangalakal sa tamang waste management.

Kailangang May Managot
Sa pagsusulong ng WTE bilang bagong solusyon sa problema sa baha, hindi dapat natin kalimutan ang mga anomalya sa mga flood control project, kabilang na dito ang Metro Manila Flood Management Project (MMFP) na pinondohan ng World Bank at ng Asian Infrastructure Investment Bank (AIIB) at ipinatupad ng MMDA.

Kinuwestyon ng COA ang mga delay sa implementasyon ng proyekto at hindi lubos na paggamit ng budget nito na nagresulta sa karagdagang bayad o commitment fees. Ayon sa report ng COA, lima sa mga proyektong natapos na nagkakahalaga ng ₱80.3 million ay nagkaroon ng delay mula 13 hanggang 322 araw, habang apat na on-going na proyekto na nagkakahalagang ₱87.2 million ay nakaranas ng delay na aabot sa 676 araw. Dahil naman sa hindi paggamit ng ₱29.57 million na pondo, nagbayad ng karagdagang ₱37.41 million mula 2018 hanggang 2024.

Ang taun-taong pagbaha ay patunay lang na sa kabila ng milyon-milyong pondo para sa mga flood control project, bigo pa rin ang pamahalaan na matugunan ang problema. Ang pangulo na mismo ang nagsabi na ang labindalawang taong paghinto ng dredging project at sampung taong pagka-delay ng spillway project ay nakaapekto sa paglala ng baha–patunay na epektibong implementasyon ang kailangan.

Delikado ang WTE
Hindi naman bagong ideya ang WTE sa Smokey Mountain. Taong 2023 pa lang, nagkaroon na ng feasibility assessment ang MMDA at nagpasya ang World Bank at AIIB na tanggalin ang WTE component ng proyekto at palitan ng centralized Material Recovery Facility at kalaunan ay Black Soldier Facility dahil sa patuloy na delay sa proyekto, problema sa procurement at isyu sa resettlement.

Kilala ang WTE na nagpo-produce ng polusyon tulad ng fly ash, bottom ash at iba pang by-products tulad ng waste water na maaring kumalat sa hangin, lupa at katubigan. Ang ibinubuga nila mula sa pagsunog ng basura ay may mataas na bilang ng particulate matter (\(PM_{2.5}\)) at mga toxic na kemikal tulad ng dioxins at furans. Ang mga toxins na ito ay posibleng magdulot ng cancer, sakit sa baga, puso at nagpapahina sa immune system. Ang paglalagay ng WTE sa isang mahirap na komunidad ay lalong magpapalala ng buhay ng mga tao at magdudulot ng panganib sa kalusugan at kalikasan.

Hindi dapat Smokey Mountain ang bumalikat sa problema ng basura
Sa kabila ng mga isyung natuklasan sa feasibility assessment na naging dahilan para tanggalin ng WB at AIIB ang WTE sa kanilang proyekto, nakakuha pa rin ng bagong investors si Pangulong Marcos para sa Smokey Mountain WTE Project noong July 2025. At bagaman hindi pa nagsisimula ang proyekto, nagdudulot na ito ng perwisyo sa mga komunidad at pamilya sa Smokey Mountain dahil sa mga sapilitang pagpapaalis, demolisyon, at mga insidente ng panghaharrass sa mga pamilya para tanggapin ang mga voluntary relocation at self-demolition.

Sa loob ng ilang dekada, mga komunidad at pamilya ng mga mangangalakal sa Smokey Mountain ang pumasan sa problema ng basura sa Maynila. Hindi lamang sila basta mga mangangalakal na nagkakalkal ng basura, mahalaga ang papel nila at malaki ang ambag nila sa tunay na material recovery at waste management.

Ang WTE system sa Smokey Mountain ay banta sa tahanan, kabuhayan at kalusugan ng mga pamilya at komunidad sa Smokey Mountain. Hindi maaring sabihin na "green" na solusyon ang WTE kung ang implementasyon nito ay mas magdudulot ng pangmatagalang kapahamakan kesa kabutihan sa kalikasan at mga mamamayan, lalo na sa mga nasa laylayan ng lipunan.

Ang kailangan ay pananagutan at pagbabago sa sistema. Isulong ang makatao at makakalikasang solusyon, hindi insinerasyon.

Mga Lumagdang Organisasyon:
350 Pilipinas
Anakbayan Smokey Mountain Anakbayan Manila
Bayanihan para sa Kalikasan Movement, Inc
Bayay Sibuyanon Inc.
BAYAN - Manila
BUNYOG Paglakaisa Party
Center for Environmental Concerns
Global Alliance for Incinerator Alternatives-Asia Pacific
Green Convergence
Green Research Environmental Research Group Inc.
Global Responsibility for Ecological and Environmental Nurturing (GREEN)
Green Party of the Philippines
HealthCareWithoutHarm Southeast Asia
Kalikas - Green Youth Philippines
Kalikasan People’s Network for the Environment
Living Laudato Si’ Philippines
Manila Workers Unity - MAWU
MYCA Manila Youth for Climate Action
Panatang Luntian Coalition
Reboot Philippines
Samahan ng Maralita ng Upper Smokey Mountain Smusm Orga
Zero Waste Phils., Inc.

12/08/2026

PAHAYAG NI ANORA MADRID NG SAMHAN NG MARALITA NG UPPER SMOKEY MOUNTAIN SA PAGTUTULAK NI BBM SA WTE INCINERATOR BILANG SOLUSYON SA BAHA

"Waste-to-Energy Incinerator ang solusyon sa baha? Talaga ba Marcos?

WTE na magpapalayas ng mahigit 55,000 residente ng Maynila at sanhi ng sunog, demolisyon, intimidasyon at harassment sa amin ngayon?

WTE na papatay sa kabuhayan ng mga mangangalakal ng Manila, sa mga urban famers, sari-sari store owners at manggagawa sa Smokey Mountain, 101, 105, at iba pang karatig lugar.

WTE na parang dambuhalang sigarilyo na magdudulot ng kanser, sakit sa baga, sakit sa balat, birth defects, dahil sa usok at abo nito.

WTE na lalason sa lupa, tubig, at hangin ng NCR at papatag sa bundok na puno na ng puno at pananim ng Smokey Mountain.

Hindi WTE ang solusyon sa baha, kundi pagpapanagot sa mga flood control project contractor na hanggang ngayon di mo pa nagagawa.

Smokey Mountain ang unang flood control project sa Pilipinas pero anong nangyari?

Ang solusyon sa baha ay pangangalaga sa kalikasan at mamamayang nangangalaga nito. Pagsuporta sa green urban spaces at farms tulad ng tinayo na namin sa Upper Smokey Mountain, suporta sa mga mangangalakal na siya namang recycling system ng bansa.

Wala kang maloloko Marcos, yung WTE para yun sayo, kay Reghis Romero II, at imperyalistang US at Japan na amo mo."

25/07/2026

𝗣𝗔𝗕𝗨𝗟𝗔𝗔𝗡𝗔𝗡 𝗔𝗡𝗚 "𝗦𝗧𝗔𝗧𝗘 𝗢𝗙 𝗧𝗛𝗘 𝗡𝗔𝗧𝗜𝗢𝗡𝗔𝗟 𝗔𝗕𝗨𝗦𝗘" 𝗡𝗜 𝗠𝗔𝗥𝗖𝗢𝗦 𝗝𝗥! 𝗦𝗨𝗠𝗔𝗠𝗔 𝗦𝗔 𝗧𝗨𝗡𝗔𝗬 𝗡𝗔 𝗦𝗢𝗡𝗔 𝗡𝗚 𝗕𝗔𝗬𝗔𝗡!

Ngayong nalalapit ang SONA, muli na namang ipagmamalaki ni Marcos Jr. ang diumano'y mga tagumpay ng kanyang administrasyon. Ngunit hindi mabubura ng anumang talumpati ang katotohanan ng kanyang kainutilan at kabiguang tugunan ang batayang pangangailangan ng bansa.

Sa halip na lumikha ng tiyak na trabaho at pangmatagalang pag-unlad, isinusulong ang mga proyektong pang-impraksturtura tulad ng Pax Silica, Waste-to-Energy (WTE) Incinerator, at North-South Harbour Bridge na tinututulan ng mamamayan dahil sa matinding banta nito sa kabuhayan, paninirahan, kalusugan, at kalikasan. Habang pinapasan ng mamamayan ang utang, buwis, at mga pinsala ng mga proyekto, nakikinabang naman ang malalaking pribadong interes sa pagpapatupad nito.

Pabulaanan natin ang "State of the National Abuse" ni Marcos Jr. sa pamamagitan ng paglalahad ng tunay na kalagayan ng bayan! Patuloy nating panagutin ang mga nasa kapangyarihan at ipaglaban ang isang Pilipinas na malaya sa dayuhang pananakop at may kaunlarang nagsisilbi sa mamamayan.

JULY 27, 2026
9:00AM - Caravan ng Paglaban at Paniningil ng Manilenyo
10:30AM - BAYAN NCR Program @ Philcoa
12:00PM - SONA ng Bayan

14/07/2026

Even when asked about the WTE incinerator facility, several residents around Paradise Heights were told that a school, a mall, or a warehouse would be built on the former Smokey Mountain dumpsite.

07/07/2026

MILITAR SA KOMUNIDAD, PALAYASIN!

Mariing kinukundena ng Bagong Alyansang Makabayan (BAYAN)-Manila ang panibagong opensiba ng mga militar sa komunidad ng Aroma, Barangay 105, Tondo, Maynila. Bahagi ito ng nagpapatuloy na kampanya ng 11th at 12th Civil-Military Operations Battalions (CMOBn), katuwang ang pekeng organisasyong Aroma para sa Kapayapaan, Kalusugan, Kabuhayan, at Kaunlaran (A4K), upang takutin, hatiin, at pahinain ang lehitimong pagkakaisa ng mga maralitang lungsod.

Nitong linggo, muling nilapitan ng mga kinatawan ng A4K sa pangunguna ni Remedios Cabello ang ilang miyembro ng Sama-sama para sa Maayos na Tahanan at Hanapbuhay (SMTH). Si Cabello ay dating miyembro ng SMTH na inalis ng organisasyon dahil sa mga isyu sa pamamahala ng pondo. Ngayon, ginagamit siya upang isulong ang mga operasyong naglalayong wasakin ang lehitimong organisasyon ng mga residente at ipalit dito ang isang grupong nagsisilbi sa interes ng militar.

Batay sa mga salaysay na nakalap ng BAYAN-Manila mula sa mga miyembro ng SMTH, pinangakuan ang mga residente ng pabahay o salapi at inalok ng ₱70,000 kapalit ng pagpirma at panunumpa bilang mga "sumuko." Itinakda pa ang araw ng naturang pagpapasuko, ngunit sa kabila ng matinding presyur, pinili ng mga residente na huwag dumalo. Ipinakikita lamang nito na hindi kayang bilhin o takutin ang sama-samang paninindigan ng mamamayan.

Hindi kapayapaan ang hatid ng militarisasyon. Ang paggamit ng kahirapan bilang kasangkapan upang itulak ang mga residente sa mga programang hindi sumasagot sa kanilang mga panawagan ay tahasang pagyurak sa kanilang dignidad, karapatan, at kalayaang mag-organisa.

Hindi na bago sa mga Manileño ang ganitong mga operasyon. Mula nang ideploy ang 11th at 12th CMOBn sa lungsod noong 2022, walang tigil na nilabanan ng mga residente ang kanilang presensya. Matapos ang pormal na paghahain ng reklamo ng SMTH sa Commission on Human Rights noong 2024 at ang tuluy-tuloy na sama-samang pagkilos ng komunidad, napilitang umurong ang mga operasyong militar sa Aroma. Ang muling paglitaw ng A4K ay malinaw na pagtatangka lamang na ibalik ang parehong mga operasyon sa ibang anyo.

Nananawagan ang BAYAN-Manila sa lahat ng mamamayan, mga organisasyong masa, mga tagapagtanggol ng karapatang pantao, at sa midya na ilantad at tutulan ang militarisasyon sa mga sibilyang komunidad. Hindi dapat pahintulutan ang paggamit ng pananakot, panlilinlang, at panggigipit laban sa mga maralitang patuloy na lumalaban para sa pabahay, kabuhayan, at iba pang batayang karapatan.

Pinananagot din ng BAYAN-Manila ang administrasyon ni Pangulong Ferdinand Marcos Jr. sa pagpapatuloy ng mga patakarang nagbibigay-daan sa militarisasyon at pag-atake sa mga demokratikong organisasyon ng mamamayan. Hindi magtatagumpay ang anumang pagtatangkang patahimikin ang maralitang lungsod. Habang lumalalim ang krisis sa kabuhayan at lumalawak ang paglabag sa karapatang pantao, lalo lamang titibay ang pagkakaisa ng mamamayan sa pagsusulong ng kanilang demokratiko at lehitimong mga kahilingan.

02/07/2026

🚨 ALERT 🚨

Nakatanggap ng ulat ang BAYAN-Manila na pinagbantaan kaninang umaga ng mga guwardya ng RII Builders ang mga residente ng Marala, Brgy. 128, Smokey Mountain na babaklasin ang kanilang mga bahay. Ayon umano sa nagpapakilalang Officer-In-Charge ng mga guwardya na si Marissa Montis, magsisimula bukas ang pagbabaklas.

Walang pinakitang court order o anumang papeles ang anim na guwardiyang nag-ikot at nagbanta ng pagbabaklas sa mga resident.

Ang Marala at ang buong Smokey Mountain ay kumakaharap sa banta ng pagpapalayas dahil sa mga proyektong Waste-to-Energy (WTE) incinerator facility at land rehabikitation na tinutulak ni Reghis Romero at aprubado ni Marcos Jr.

Labag din ito sa proseso ng pagkonsulta sa mga residenteng tumututol sa paggiba ng kanilang tirahan. Sa July 9 dapat magaganap ang ikalawang public scoping hinggil sa Smokey Mountain Land Rehabilitation Project na layong patagin ang bundok na pagtatayuan ng WTE facility, ngunit wala pa man ito ay nagsisimula nang manakot at sapilitang magpalayas ng R-II Builders sa lugar.

Iginiit din ng Samahan ng Maralita sa Upper Smokey Mountain (SMUSM) na ang pagtanggap ng ilan sa kabayaran ay hindi nangangahulugang maaari na silang paalisin, dahil naganap ito sa gitna ng panlilinlang, pananakot, at kawalan ng sapat na kaalaman sa kanilang mga karapatan.

Mahigpit na binabantayan ng BAYAN-Manila ang sitwasyon at patuloy na magbibigay ng mga update.

01/07/2026

"GANIYAN KAGANID SI REGHIS ROMERO!"

Nakikiisa ang UMHC sa laban ng maralitang lungsod at mariing kinukundena ang R-II Builders at si Reghis Romero II, na nagdudulot ng pasakit sa masa at mga manggagawang ilegal niyang tinanggal.

​Si Eldefonso Bello ay Presidente ng Unyon ng mga Manggagawa sa Harbour Centre (UMHC) at dating manggagawa sa Harbour Centre, ay isa sa mga manggagawang ilegal na tinanggal ni Reghis Romero II.

Simula noong 2020, nang sila ay puwersahang tinanggal, milyong-milyong piso pa ang hindi nababayarang benepisyo ng kumpanya sa kanila. Hanggang ngayon, kasalukuyan pa ring tumatakbo ang kaso laban sa kapitalistang si Reghis Romero II—isang negosyanteng kumikita ng napakalaking tubo ngunit ipinagkakait ito sa mga manggagawang nagpapatakbo ng kanyang negosyo para sa kanyang pansariling interes.

​Mariing kinukundena ng UMHC ang proyektong Waste-to-Energy Incinerator ng R-II Builders sa kalunsuran. Ang pagtatayo ng incinerator na ito sa Maynila at Smokey Mountain, kasabay ng ilegal na pagpapatalsik sa mga manggagawa ng Harbour Centre, ay isang malinaw na paglabag ni Reghis Romero II sa karapatang pantao ng mamamayan.

REGHIS ROMERO, PARASITIKO! GANID SA TUBO!

30/06/2026

29/06/2026

MONDAY RAGE PROTEST CARAVAN AGAINST DEMOLITION AND WASTE-TO-ENERGY INCINERATOR

‎Matagumpay na nailunsad ang Monday Rage Protest Caravan mula DENR NCR Office tungong RII builders hanggang sa Commission on Human Rights upang tutulan at labanan ang iligal na pagpapatayo ng Waste-To-Energy Incinerator at mga nagaganap na harassment, intimidasyon, at demolisyon sa mga residente ng Smokey Mountain.
‎
‎Inihain ng mga residente ang kanilang position paper na naglalaman ng malinaw na pagtutol sa WTE Incinerator at huwad na public scoping na naganap noong June 8.
‎
‎Nairehistro rin ng mamamayan ang galit nila kay Reghis Romero II na may-ari ng Manila North Harbor Center, PhilEco Systems Corporation na nangunguna sa pagtatayo ng WTE Incinerator at RII Builders na nagpapabaklas sa kanila pati na rin Bongbong Marcos Jr. na pumirma at nagpahintulot ng proyektong ito.
‎
‎Sabay-sabay na nagsampa ng kaso at reklamo laban sa tumitinding harassment at intimidasyon ng RII builders security guards, barangay 128, at iba pang pwersang nagtutulak ng WTE Incinerator sa pamamaraan ng pagpapaputok at pagtutok ng baril, sapilitang pagpapabaklas, iligal na pagba-backhoe ng bundok, at at pagputol ng batayang serbisyo.
‎
‎WASTE TO ENERGY INCINERATOR, TUTULAN, LABANAN, HUWAG PAHINTULUTAN!
‎
‎WTE INCINERATOR, BANTA SA PANINIRAHAN, KABUHAYAN, KALUSUGAN AT KALIKASAN!
‎
‎REGHIS ROMERO, PARASITIKO! GANID SA TUBO! PAHIRAP SA MASA!
‎
‎ITIGIL ANG PANDARAHAS SA MGA RESIDENTE NG SMOKEY MOUNTAIN!