25/07/2025
Isa sa mga pinakamahirap na parte ng Scout Ranger training ay ang “escape and evasion” o Echo Echo module. Sa sobrang napaka realistic na scenario, complete with “enemy torture,” isasalang ang bawat Ranger student sa sitwasyon na mahuli sila ng kalaban. Sa doktrina ng Ranger, gawin mo lahat para di ka mahuli. Pero kung mahuli ka ng kalaban, gawin mo lahat para makatakas. Si Sgt Echo Echo ay muntik ng mahuli ng Abu Sayyaf sa Albarka, Basilan nung 2011. Ito ang test mission ng Scuba Class na 4 silang Ranger, at the rest ay non-Rangers. Dito rin nagpaiwan mag hold the line si late Scout Sniper Roberto Ricafranca, para lang di na madagdagan ang 19 na patay na sa class nila. Nakipag hold the line si Sgt Echo Echo, pero maaga tinamaan ang kanyang buddy na si late Lt. Que (marahil napanood niyo sa TV ito nung 2011).
Dahil pinaalis na sila lahat ni late Ricafranca, kinarga karga ni Sgt Echo Echo si Lt. Que. Kaso abante ng abante ang kalaban papunta sa kanila, at mag isa na lang si late Ricafranca na nag hold the line. Hindi pa sila nakakalayo ng makita mismo ni Sgt Echo Echo na abutan na ng tuluyan ng mga Abu Sayyaf si late Ricafranca. Dinig na dinig niya ang pag crack ng buto ng binabaril na si late Ricafranca. Sa kasawiang palad, duon na rin tuluyang binawian ng buhay si late Lt. Que. Nakatakas na rin lahat ang ibang sundalo (di Ranger na kasama nila). Nagpasya na si Sgt Echo Echo na mag escape ang evasion. Itinago niya ang bangkay ni late Lt. Que sa isang malaking butas at tinabunan ng mga damo damo. Nagdasal siya, sabay eskapo na. Malapit ang mga kalaban na humabol sa kanya — mga 200 meters lang. Naghubad siya ng combat boots para di masundan ang mga yapak niya. Inalis na rin niya ang kanyang uniporme para di rin siya makilala ng mga bata o sinuman na dumaan. Dahil malapit siya sa mga bahayan ng kalaban, dahan dahan siya. Dinig na dinig niya ang mga motor ng kalaban na nag galugad para hanapin siya. Dapa, gapang ang ginawa niya. Di makatakbo dahil naka paa paa. Meanwhile, tuloy ang paghahanap ng mga kalaban sa kanya.
May isang beses na napakalapit na ng kalaban pero di siya nakita. Sa unang gabi niya, di pa masyado gutom. Pero nung sumunod na araw, gutom na siya. Buti may Snow Bear candy siya na naitago. Sinipsip niya pero di inubos. Pag nagutom, sipsip na naman sa Snow Bear sabay tago na na naman. Takot siya dahil malapit pa rin siya sa kalaban. Pero buo ang loob niya na gumapang ng gumapang hanggang makaabot na siya sa dagat. Sa pangatlong araw, lumutang lutang na siya sa dagat (nagamit din niya ang Scuba diving skills niya). Nagdasal siya na may military boat nga na makakita sa kanya. Pagkatapos ng ilang oras, sa pangatlong araw niya mag survival, nakita na nga siya ng mga Ranger na palutang lutang sa dagat. Sa awa ng Diyos, na rescue si Sgt Echo Echo. Taekwondo instructor na siya ngayon ng mga Scout Ranger. Marami sa mga non-Ranger na naka survive dahil sa katapangan nina late Ricafranca at Sgt Echo Echo ay nag volunteer na kumuha ng Scout Ranger course bilang respeto.
Credit Source: SCOUT RANGER BOOKS
Posted: 2018
