02/06/2026
Isang mahalagang yugto ang naabot ng 714 Pantawid Pamilyang Pilipino Program (4Ps) beneficiaries mula sa Tarlac City matapos silang kilalanin bilang graduating beneficiaries sa ginanap na 4Ps Pagtataguyod Roadshow: Hatid Serbisyo, Hatid Pag-asa sa Tarlac City Convention Hall nitong Hunyo 1.
Hindi lamang simpleng pagtatapos sa programa ang kanilang selebrasyon. Ito rin ay pagsisimula ng panibagong kabanata tungo sa mas matatag, mas produktibo, at mas self-sufficient na pamumuhay.
Sa pamamagitan ng pagtutulungan ng DSWD, mga ahensya ng pamahalaan, pribadong sektor, at iba pang partner organizations, inilapit sa mga benepisyaryo ang iba’t ibang oportunidad sa trabaho, kabuhayan, skills training, edukasyon, at serbisyong pangkalusugan.
Kabilang sa mga serbisyong naihatid ang job opportunities mula sa iba’t ibang kumpanya at ahensya, livelihood assistance, libreng skills training, medical mission, National ID registration, business registration, at iba pang social services.
Patunay ang aktibidad na ang layunin ng 4Ps ay hindi lamang magbigay ng tulong kundi ihanda ang mga pamilya na magkaroon ng mas matatag na kinabukasan sa pamamagitan ng sapat na kaalaman, oportunidad, at suporta.
Mula sa pagiging benepisyaryo tungo sa pagiging mas handa at mas matatag na mamamayan—isang hakbang palapit sa pangarap na mas maunlad na buhay para sa bawat pamilyang Pilipino. ✨
