04/06/2026
๐ LANTAWA: Tingali Imposible Karon, Apan Mahimong Baguan River ang Makasulbad sa Problema sa Proyektong Patubig sa Tarragona
Usa ka dakong lakang padulong sa mas lig-on ug mas malungtarong kaugmaon sa suplay sa tubig sa atong lungsod.
Kauban si Konsehal Ramain Matayab, MENRO Officer Sir Marco Antonio Lawani, ug former Punong Barangay sa Brgy. Tomoaong nga si Sir Bernardo Awit, subay sa mando ni Mayor Hon. Art Benjie C. Bulaong, PhD., among gisubay ug gisusi ang potensyal sa Baguan River, nga sa among inisyal nga teknikal nga pagtuon ug assessment, ang maong sapa mamahimong pangunahing water source sa tubig alang sa Tarragona sa umaabot.
Base sa among mga obserbasyon ug pagtuon, kini nga water source adunay potensyal nga makatubag sa panginahanglan sa kadaghanang panimalay sa Brgy. Tubaon, Maganda, Dadong, Jovellar, Central, Cabagayan, ug Lucatan, dili lamang sa kasamtangan nga panginahanglan, apan usab sa umaabot nga water demand sa maong mga barangay.
Tinuod nga taas pa ang proseso nga atong agian. Kinahanglan pa kini og dugang nga pagtuon, feasibility assessment, environmental evaluation, pagplano, ug pagpangita og pondo. Ug para sa uban, tingali imposible pa kini tan-awon karon. Apan isip usa ka inhenyero nga dugay nang nagserbisyo sa sektor sa patubig, lig-on ang akong pagtuo nga kining atong nadiskubrehan adunay teknikal nga basehan ug mahimong usa ka tinuod nga solusyon kon suportahan pinaagi sa husto nga siyensya, maayong pagdumala, ug lig-on nga political will.
Dako ang akong kompyansa nga ang atong mga lider, ubos sa liderato ni Governor Nelson L. Dayanghirang, Congressman Nelson Dayanghirang, Jr., ug Mayor Art Benjie C. Bulaong, PhD, magpadayon sa pagpangita ug pagpalambo sa mga pamaagi aron mahimong realidad kining atong mga panglantaw. Ang tumong mao ang paghatag og lig-on nga solusyon sa problema sa suplay sa tubig nga dugay nang giatubang sa daghang mga barangay sa Tarragona, ilabi na sa Brgy. Dadong ug Brgy. Maganda, ug sa uban pang komunidad nga nanginahanglan og mas lig-on ug kasaligan nga serbisyo sa tubig.
Ang matag dakong kalampusan nagsugod sa usa ka ideya. Ang matag dakong proyekto nagsugod sa usa ka panglantaw. Ug usahay, ang usa ka diskubre karon mahimong maoy tubag sa problema sa umaabot.
๐ Tubig alang sa kalamboan. Tubig alang sa umaabot. Tubig alang sa matag panimalay sa Tarragona.
