Tuguegarao Licensing Center

03/06/2026

𝐋𝐓𝐎 𝐂𝐇𝐈𝐄𝐅, 𝐀𝐆𝐀𝐑𝐀𝐍𝐆 𝐈𝐏𝐈𝐍𝐀𝐆-𝐔𝐓𝐎𝐒 𝐀𝐍𝐆 𝐏𝐀𝐆𝐏𝐀𝐏𝐀𝐋𝐀𝐁𝐀𝐒 𝐍𝐆 𝐒𝐔𝐁𝐏𝐎𝐄𝐍𝐀 𝐋𝐀𝐁𝐀𝐍 𝐒𝐀 𝐌𝐎𝐓𝐎𝐕𝐋𝐎𝐆𝐆𝐄𝐑 𝐍𝐀 𝐆𝐔𝐌𝐀𝐖𝐀 𝐍𝐆 𝐏𝐄𝐊𝐄𝐍𝐆 𝐒𝐂𝐎 𝐏𝐀𝐑𝐀 𝐒𝐀 𝐂𝐎𝐍𝐓𝐄𝐍𝐓

Ipinag-utos ng Land Transportation Office (LTO), sa pamumuno ni Assistant Secretary Markus V. Lacanilao, ang agarang pag-isyu ng subpoena laban sa isang motorcycle vlogger na umano’y gumawa ng Show Cause Order (SCO) ng ahensiya na walang pahintulot at maaaring magbigay ng maling impresyon na ito ay isang opisyal na kautusan ng LTO.

Batay sa impormasyon na natanggap ng LTO, isang viral post sa page na “Luciver” ang naglalaman ng isang umano’y SCO at iba pang kaugnay na nilalaman na nagmumukhang opisyal na inilabas ng ahensiya. Dahil dito, agad na nagsagawa ng kaukulang aksyon ang LTO upang beripikahin ang pangyayari at tiyaking mapangalagaan ang integridad ng mga opisyal na dokumento at proseso ng ahensiya.

Sa inilabas na subpoena, inaatasan ang naturang vlogger na humarap sa Intelligence and Investigation Division (IID) sa LTO Central Office para sa isang clarificatory conference upang magpaliwanag kaugnay ng nasabing post.

Ayon kay Assistant Secretary Lacanilao, mahalagang mapanagot ang sinumang mapapatunayang gumagamit o nagpapakalat ng mga dokumentong maaaring magdulot ng kalituhan sa publiko at makasira sa kredibilidad ng mga opisyal na proseso ng gobyerno.

“Ang paggawa o pagpapakalat ng pekeng dokumento na nagpapanggap na opisyal na inilabas ng LTO ay isang seryosong usapin. Hindi natin hinahayaang magamit ang pangalan at awtoridad ng ahensya para sa pansariling interes o para lamang sa content. Hindi kukunsintihin ng LTO ang anumang gawain na nagdudulot ng kalituhan o maling impormasyon sa publiko. Mahalaga na mapanatili ang tiwala ng publiko sa mga dokumento at proseso ng ating ahensiya,” pahayag ni Lacanilao.

Patuloy namang pinaaalalahanan ng LTO ang publiko na tiyaking mula lamang sa mga opisyal na plataporma at tanggapan ng ahensiya ang kanilang pagbabatayan ng impormasyon upang maiwasan ang pagkalat ng maling balita at mga mapanlinlang na nilalaman.

03/06/2026

01/06/2026

𝐋𝐓𝐎 𝐂𝐇𝐈𝐄𝐅, 𝐈𝐏𝐈𝐍𝐀𝐆-𝐔𝐓𝐎𝐒 𝐀𝐍𝐆 𝐏𝐀𝐆-𝐑𝐄𝐕𝐎𝐊𝐄 𝐒𝐀 𝐋𝐈𝐒𝐄𝐍𝐒𝐘𝐀 𝐍𝐆 𝐌𝐆𝐀 𝐍𝐀𝐆𝐏𝐎𝐒𝐈𝐓𝐈𝐁𝐎 𝐒𝐀 𝐃𝐑𝐔𝐆 𝐓𝐄𝐒𝐓𝐈𝐍𝐆; 𝐁𝐔𝐒 𝐃𝐑𝐈𝐕𝐄𝐑 𝐍𝐀 𝐒𝐀𝐍𝐆𝐊𝐎𝐓 𝐒𝐀 𝐄𝐃𝐒𝐀 𝐂𝐑𝐀𝐒𝐇, 𝐊𝐀𝐒𝐀𝐌𝐀 𝐒𝐀 𝐍𝐀𝐆𝐏𝐎𝐒𝐈𝐓𝐈𝐁𝐎

Agad na ipinag-utos ng Land Transportation Office (LTO), sa ilalim ng direktiba ni Assistant Secretary Markus V. Lacanilao, ang pag-revoke ng lisensya sa 3 tsuper at 2 konduktor na nagpositibo sa isinagawang random drug testing sa isang terminal inspection sa Pasay City, kabilang ang bus driver na sangkot sa pagbangga sa mga roadside barriers sa EDSA kamakailan.

Isinagawa ang operasyon sa Baclaran Metrolink, Malibay, Pasay City mula alas-3:00 ng umaga bilang bahagi ng pinaigting na pagpapatupad ng Republic Act No. 10586 o ang “Anti-Drunk and Drugged Driving Act of 2013.”

Sa kabuuang 64 na driver at konduktor na sumailalim sa initial drug screening test, 3 driver at 2 konduktor ang nagpositibo. Kabilang sa mga nagpositibo ang driver ng bus na naunang nasangkot sa aksidente sa EDSA matapos umanong nag-te-text habang nagmamaneho at bumangga sa mga roadside barriers.

Ayon kay LTO Chief, Assistant Secretary Markus V. Lacanilao, “Ang pagmamaneho habang nasa impluwensya ng ilegal na droga ay isang seryosong banta sa kaligtasan ng publiko. Hindi natin hahayaan na patuloy na magmaneho ang mga taong naglalagay sa panganib sa buhay ng kanilang mga pasahero at kapwa nila gumagamit ng kalsada. Dahil dito, agad nating ipinag-utos ang pag-revoke ng kanilang lisensya upang matiyak na hindi na sila makapagmaneho ng anumang sasakyan.”

Bagama’t pansamantalang kinumpiska ang kanilang mga lisensya habang hinihintay ang resulta ng confirmatory drug test, ipinag-utos na rin ng LTO ang pagsisimula ng proseso para sa revocation ng kanilang mga lisensya alinsunod sa umiiral na mga batas at regulasyon.

Patuloy namang paiigtingin ng LTO ang pagsasagawa ng random drug testing at terminal inspections sa buong bansa bilang bahagi ng kampanya para sa mas ligtas na pampublikong transportasyon at upang matiyak na ang mga driver na humahawak ng buhay ng kanilang mga pasahero ay nasa maayos na kondisyon sa bawat biyahe.

01/06/2026

𝐑𝐈𝐃𝐄𝐑 𝐍𝐀 𝐏𝐀𝐒𝐀𝐖𝐀𝐘 𝐍𝐀 𝐍𝐀𝐆𝐏𝐀𝐊𝐈𝐓𝐀𝐍𝐆-𝐆𝐈𝐋𝐀𝐒 𝐍𝐆 𝐃𝐄𝐋𝐈𝐊𝐀𝐃𝐎𝐍𝐆 𝐒𝐓𝐔𝐍𝐓 𝐒𝐀 𝐊𝐀𝐋𝐒𝐀𝐃𝐀, 𝐈𝐍𝐈𝐒𝐘𝐔𝐇𝐀𝐍 𝐍𝐆 𝐒𝐂𝐎 𝐍𝐆 𝐋𝐓𝐎; 𝐌𝐎𝐓𝐎𝐑𝐒𝐈𝐊𝐋𝐎 𝐈𝐍𝐀𝐋𝐀𝐑𝐌𝐀, 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎

Pinatawan ng Show Cause Order (SCO) ng Land Transportation Office (LTO) ang rider na nasa likod ng viral video kung saan makikitang nagsasagawa umano ng “wheelie” o pagpapatakbo ng motorsiklo gamit lamang ang isang gulong habang bumibiyahe sa pampublikong kalsada.

Bukod sa mapanganib na stunt, makikita rin sa video na hindi ito nakasuot ng standard protective motorcycle helmet habang minamaneho ang motorsiklo. Napansin din na walang side mirror ang motorsiklo at nakasuot lamang siya ng tsinelas, na pawang mga paglabag sa umiiral na mga batas at regulasyon sa kaligtasan sa kalsada.

Sa isinagawang paunang beripikasyon ng LTO, natuklasan din na ang motorsiklong ginamit sa insidente ay kasalukuyang hindi rehistrado.

Dahil dito, inatasan ng LTO ang rehistradong may-ari ng motorsiklo at ang rider na humarap sa Intelligence and Investigation Division (IID) ng LTO Central Office sa itinakdang pagdinig upang magpaliwanag kaugnay ng mga posibleng paglabag sa umiiral na mga batas at regulasyon sa pagmamaneho.

Ayon kay LTO Chief, Assistant Secretary Markus V. Lacanilao, nakababahala ang mga ganitong insidente lalo na kung nagiging content para sa social media ang mga gawaing maaaring magbunsod ng aksidente.

“Hindi sukatan ng husay sa pagmomotorsiklo ang paggawa ng mga stunt sa pampublikong kalsada. Kapag ginawa ito sa mga lansangang ginagamit ng publiko, hindi lamang sarili ang isinasapanganib kundi pati ang buhay ng ibang tao. Hindi natin hahayaang maging normal o katanggap-tanggap ang ganitong uri ng pag-uugali sa kalsada,” pahayag ni Lacanilao.

Bilang pansamantalang hakbang, inilagay sa alarm status ang naturang motorsiklo habang preventively suspended naman sa loob ng 90 araw ang lisensya ng rider at kinakailangang agad itong isuko sa IID ng LTO.

Binigyang-diin ng LTO na ang pagiging responsable sa kalsada ay hindi lamang nasusukat sa kakayahang magmaneho kundi sa paggalang sa kaligtasan ng kapwa. Nananatiling pinakamahalaga pa rin ang pagsunod sa batas at ang pagpapakita ng wastong asal sa lansangan.

30/05/2026

𝐒𝐔𝐕 𝐍𝐀 𝐌𝐀𝐘 𝐈𝐋𝐄𝐆𝐀𝐋 𝐍𝐀 𝐁𝐋𝐈𝐍𝐊𝐄𝐑𝐒 𝐀𝐓 𝐒𝐈𝐑𝐄𝐍, 𝐈𝐍𝐈𝐒𝐘𝐔𝐇𝐀𝐍 𝐍𝐆 𝐒𝐂𝐎 𝐍𝐆 𝐋𝐓𝐎; 𝐒𝐀𝐒𝐀𝐊𝐘𝐀𝐍 𝐈𝐍𝐀𝐋𝐀𝐑𝐌𝐀, 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎

Pinapaliwanag ng Land Transportation Office (LTO) ang rehistradong may-ari at drayber ng isang Toyota Fortuner na tampok sa viral video kaugnay ng umano’y paggamit ng hindi awtorisadong blinkers at siren sa pampublikong lansangan.

Sa kumakalat na footage online, makikita ang komprontasyon sa pagitan ng drayber ng SUV at ng isang indibidwal na kumuha ng video matapos mapansin ang paggamit ng mga kagamitang karaniwang nakalaan lamang sa mga awtorisadong emergency at government response vehicles.

Dahil dito, pinadadalo ng LTO ang rehistradong may-ari at ang drayber ng sasakyan sa Intelligence and Investigation Division (IID) ng LTO Central Office sa Hunyo 2, 2026, alas-11 ng umaga upang sagutin ang mga posibleng paglabag kaugnay ng paggamit ng unauthorized blinkers, motor vehicle operating with siren, at improper person to operate a motor vehicle.

Iniutos din ng ahensya na dalhin ang nasabing sasakyan upang agad na alisin at pormal na isuko ang nakakabit na blinkers at siren.

Kasabay nito, isinailalim sa alarm status ang naturang sasakyan habang pansamantalang suspendido sa loob ng 90-araw ang lisensya ng drayber at kinakailangang agad itong isumite sa IID.

Ayon kay LTO Chief, Assistant Secretary Markus V. Lacanilao, hindi dapat ginagamit ng mga pribadong motorista ang mga ilaw at sirenang nagbibigay ng impresyon na sila ay may espesyal na pribilehiyo sa kalsada.

“Hindi status symbol ang blinkers at sirena. Nakalaan lamang ang mga ito sa mga sasakyang may awtoridad at ginagamit sa tunay na emergency response. Hindi natin papayagan na abusuhin ito para manindak o makalusot sa trapiko,” ani Lacanilao.

Dagdag pa niya, “Kaya malinaw ang mensahe natin sa publiko: kung hindi kayo awtorisado, alisin na ninyo ang mga nakakabit na blinkers, wang-wang, at kahalintulad na kagamitan. Hindi ito palamuti at lalong hindi ito nagbibigay ng espesyal na karapatan sa kalsada.”

Patuloy namang pinaigting ng LTO ang kampanya laban sa mga sasakyang gumagamit ng illegal warning devices bilang bahagi ng pagsusulong ng disiplina, respeto, at pantay-pantay na pagpapatupad ng batas-trapiko sa bansa.

30/05/2026

𝐕𝐈𝐑𝐀𝐋 𝐍𝐀 𝐄𝐒𝐓𝐔𝐃𝐘𝐀𝐍𝐓𝐄𝐍𝐆 𝐑𝐈𝐃𝐄𝐑 𝐍𝐀 𝐖𝐀𝐋𝐀𝐍𝐆 𝐇𝐄𝐋𝐌𝐄𝐓, 𝐏𝐈𝐍𝐀-𝐒𝐇𝐎𝐖 𝐂𝐀𝐔𝐒𝐄 𝐍𝐆 𝐋𝐓𝐎; 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎, 𝐌𝐎𝐓𝐎𝐑𝐒𝐈𝐊𝐋𝐎 𝐈𝐍𝐀𝐋𝐀𝐑𝐌𝐀

Naglabas ng Show Cause Order (SCO) ang Land Transportation Office (LTO) laban sa rehistradong may-ari at driver ng motorsiklong sangkot sa viral na larawan kung saan makikitang bumiyahe ang rider nang walang suot na standard protective motorcycle helmet habang nasa pampublikong lansangan.

Batay sa kumalat na mga larawan sa social media, makikitang minamaneho ng rider ang motorsiklo nang walang helmet, habang sa isa pang larawan ay kapwa walang suot na protective headgear ang rider at backrider—na malinaw na paglabag sa mandatory use of motorcycle helmets alinsunod sa umiiral na batas trapiko.

Dahil dito, inatasan ng LTO ang rehistradong may-ari at ang driver na humarap sa Intelligence and Investigation Division (IID) sa LTO Central Office sa ika-1 ng Hunyo 2026, alas-2 ng hapon, upang magpaliwanag kung bakit hindi sila dapat managot sa kasong “Mandatory Use of Motorcycle Helmets” at “Improper Person to Operate a Motor Vehicle.”

Samantala, isinailalim na sa alarm status ang naturang motorsiklo habang preventively suspended naman sa loob ng siyamnapung (90) araw ang lisensya ng driver at kinakailangang agad itong isuko sa IID.

Ayon kay LTO Chief, Assistant Secretary Markus V. Lacanilao, mahalagang malinaw sa publiko na ang indibidwal sa viral na larawan ay hindi empleyado ng LTO kahit pa ang suot nitong uniporme ay kahawig ng ginagamit sa ilang tanggapan ng ahensiya.

“Hindi po empleyado ng LTO ang indibidwal na nasa viral na larawan base sa paunang beripikasyon. Gayunman, hindi ito dahilan upang balewalain ang malinaw na paglabag sa batas trapiko, lalo na kung usapin ng kaligtasan sa kalsada ang nakataya,” ani Lacanilao.

“Patuloy nating pinaaalalahanan ang lahat ng motorcycle riders at backriders na magsuot ng standard protective helmet sa lahat ng oras. Hindi lamang ito pagsunod sa batas kundi proteksyon mismo sa kanilang buhay,” dagdag pa niya.

Binigyang-diin naman ng LTO na patuloy nitong paiigtingin ang pagpapatupad ng mga batas trapiko laban sa mga lumalabag, lalo na sa mga kasong naglalagay sa panganib sa kaligtasan ng motorista at ng ibang gumagamit ng lansangan.

30/05/2026

𝐀𝐁𝐔𝐒𝐀𝐃𝐎𝐍𝐆 𝐃𝐑𝐈𝐕𝐄𝐑 𝐒𝐀 𝐕𝐈𝐑𝐀𝐋 𝐑𝐎𝐀𝐃 𝐑𝐀𝐆𝐄 𝐈𝐍𝐂𝐈𝐃𝐄𝐍𝐓, 𝐏𝐈𝐍𝐀-𝐒𝐇𝐎𝐖 𝐂𝐀𝐔𝐒𝐄 𝐍𝐆 𝐋𝐓𝐎; 𝐒𝐀𝐒𝐀𝐊𝐘𝐀𝐍 𝐈𝐍𝐀𝐋𝐀𝐑𝐌𝐀, 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎

Mabilis na umaksyon ang Land Transportation Office (LTO) laban sa driver na sangkot sa insidente ng road rage na nag-viral kung saan makikitang nakikipagtalo at umano’y pisikal na inatake ang isa pang motorista habang nasa pampublikong lansangan.

Dahil dito, inatasan ng LTO ang rehistradong may-ari ng sasakyan at ang sangkot na driver na humarap sa Intelligence and Investigation Division (IID) ng LTO Central Office sa Hunyo 2, 2026, alas-3:00 ng hapon upang sagutin ang kasong administratibo na “Reckless Driving” at “Improper Person to Operate a Motor Vehicle.”

Binigyang-diin din ng ahensya na kapag nabigo silang dumalo sa itinakdang pagdinig, ituturing itong pagtalikod sa kanilang karapatang maipagtanggol ang kanilang panig at pagbabatayan na lamang ang mga nakalap na ebidensya sa pagresolba ng kaso.

Kasabay nito, isinailalim sa alarm status ang naturang sasakyan habang preventively suspended naman ng siyamnapung (90) araw ang lisensya ng driver, na kinakailangang agad isuko sa IID ng LTO.

Ayon kay LTO Chief, Assistant Secretary Markus V. Lacanilao, seryoso ang LTO sa pagpapanagot sa mga motoristang nagiging banta sa kaligtasan ng ibang gumagamit ng kalsada.

“Huwag po tayo sumabay sa init ng panahon. Hindi dapat dinadala sa kalsada ang init ng ulo. Ang ganitong klase ng asal ay naglalagay sa panganib hindi lamang sa mga sangkot kundi maging sa ibang inosenteng motorista at pedestrian,” ani Lacanilao.

Pinayuhan din ng LTO ang publiko na manatiling kalmado at responsable sa pagmamaneho, at agad idaan sa tamang proseso at awtoridad ang anumang alitan sa kalsada sa halip na pairalin ang dahas o agresibong pag-uugali.

30/05/2026

𝐋𝐓𝐎, 𝐈𝐍𝐈𝐒𝐘𝐔𝐇𝐀𝐍 𝐍𝐆 𝐒𝐇𝐎𝐖 𝐂𝐀𝐔𝐒𝐄 𝐎𝐑𝐃𝐄𝐑𝐒 𝐀𝐍𝐆 𝐌𝐆𝐀 𝐒𝐀𝐍𝐆𝐊𝐎𝐓 𝐒𝐀 𝐁𝐀𝐍𝐆𝐆𝐀𝐀𝐍 𝐒𝐀 𝐐𝐔𝐄𝐙𝐎𝐍 𝐂𝐈𝐓𝐘, 𝟐𝟓 𝐒𝐔𝐆𝐀𝐓𝐀𝐍; 𝐌𝐆𝐀 𝐒𝐀𝐒𝐀𝐊𝐘𝐀𝐍 𝐈𝐍𝐀𝐋𝐀𝐑𝐌𝐀 𝐀𝐓 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎 𝐍𝐀

Ipinatawag ng Land Transportation Office (LTO) ang mga rehistradong may-ari at drayber ng isang modern jeepney at isang armored van na sangkot sa malagim na banggaan sa Quezon City kung saan 25 pasahero ang sugatan nitong Mayo 29, 2026.

Batay sa ulat ng Quezon City Police District (QCPD), naganap ang insidente dakong ala-singko ng umaga sa kahabaan ng Quezon Avenue cor. Sen. Miriam Defensor Santiago Avenue, Brgy. Bagong Pag-asa, Quezon City. Parehong sasakyan ang nagtamo ng pinsala sa punto ng salpukan, habang ang 25 pasahero ay nagtamo ng mga sugat at agad na isinugod sa pinakamalapit na ospital.

Dahil dito, inatasan ng LTO na humarap sa tanggapan ng Intelligence and Investigation Division (IID) sa Central Office sa Hunyo 4, 2026, ala-una ng hapon ang mga rehistradong may-ari at drayber ng mga sangkot na sasakyan upang magpaliwanag kung bakit hindi sila dapat managot sa kasong “Reckless Driving,” “Improper Person to Operate a Motor Vehicle,” at “Employing a Reckless, Insolent, Discourteous, or Arrogant Driver.”

Bilang pansamantalang hakbang, inilagay na sa alarm status ang mga sangkot na sasakyan habang preventively suspended naman sa loob ng 90 araw ang lisensya ng mga drayber. Inatasan din silang agad na isumite ang kanilang lisensya sa IID.

Ayon kay LTO Chief, Assistant Secretary Markus V. Lacanilao, seryosong usapin ang bawat aksidente sa kalsada lalo na kung may mga inosenteng pasaherong nalalagay sa panganib.

“Ang bawat aksidente sa kalsada ay malinaw na paalala na ang kalsada ay hindi lugar para sa kapabayaan. Sa oras na ang isang drayber ay nagkulang sa pag-iingat, hindi lamang batas ang nilalabag, kundi ang tiwala at seguridad ng bawat pasaherong umaasa na makakarating nang ligtas sa kanilang destinasyon. Kaya’t hindi natin palalampasin ang anumang anyo ng iresponsableng pagmamaneho, at dapat panagutan ito nang naaayon sa batas,” pahayag ni Lacanilao.

Patuloy namang pinaaalalahanan ng LTO ang lahat ng public utility vehicle operators at mga motorista na pairalin ang disiplina, responsableng pagmamaneho, at tiyaking ligtas ang kondisyon ng sasakyan upang maiwasan ang trahedya sa lansangan.

30/05/2026

𝐏𝐀𝐒𝐀𝐖𝐀𝐘 𝐍𝐀 𝐌𝐎𝐓𝐎𝐕𝐋𝐎𝐆𝐆𝐄𝐑 𝐍𝐀 𝐓𝐈𝐍𝐀𝐊𝐁𝐔𝐇𝐀𝐍 𝐀𝐍𝐆 𝐌𝐆𝐀 𝐏𝐔𝐋𝐈𝐒, 𝐈𝐍𝐈𝐒𝐘𝐔𝐇𝐀𝐍 𝐍𝐆 𝐒𝐂𝐎 𝐍𝐆 𝐋𝐓𝐎; 𝐌𝐎𝐓𝐎𝐑𝐒𝐈𝐊𝐋𝐎 𝐈𝐍𝐀𝐋𝐀𝐑𝐌𝐀, 𝐋𝐈𝐒𝐄𝐍𝐒𝐘𝐀 𝐒𝐔𝐒𝐏𝐄𝐍𝐃𝐈𝐃𝐎!

Naglabas ng Show Cause Order (SCO) ang Land Transportation Office (LTO) laban sa isang motovlogger kaugnay ng video na in-upload sa page na “Sir Ki,” kung saan makikitang nagpapatakbo umano ng motorsiklo nang sobrang bilis sa isang pampublikong kalsada. Makikita rin umano sa nasabing video na pinara ito ng mga pulis, ngunit sa halip na huminto ay iniwasan pa umano ang mga awtoridad.

Batay sa inisyal na imbestigasyon, posibleng managot ang rider sa kasong “Reckless Driving” at “Improper Person to Operate a Motor Vehicle” dahil sa kanyang paraan ng pagmamaneho na malinaw na naglalagay sa panganib hindi lamang sa kanyang sarili kundi pati sa ibang motorista at pedestrian.

Dahil dito, pinadadalo ng LTO ang rehistradong may-ari at/o rider sa itinakdang pagdinig na gaganapin sa tanggapan ng Intelligence and Investigation Division (IID) sa LTO Central Office upang magpaliwanag kung bakit hindi sila dapat patawan ng kaukulang parusang administratibo.

Nakasaad din sa kautusan na ang hindi pagdalo sa nasabing pagdinig ay ituturing na pagtalikod sa kanilang karapatang marinig, at magpapasya ang ahensya base sa mga ebidensyang hawak nito.

Bilang agarang hakbang, isinailalim na sa alarm status ang naturang motorsiklo habang preventively suspended naman sa loob ng siyamnapung (90) araw ang lisensya ng rider, na kinakailangang agad isumite sa IID.

Ayon kay LTO Chief, Assistant Secretary Markus V. Lacanilao, hindi dapat ginagawang aliwan o content ang mga delikadong gawain sa kalsada.

“Hindi katanggap-tanggap na ginagamit ang social media para ipakita at gawing normal ang iresponsableng pagmamaneho. Ang kalsada ay hindi lugar para sa pasikatan, karera o paggawa ng content na naglalagay panganib sa buhay ng ibang tao,” ani Lacanilao.

Binigyang-diin din na may malaking responsibilidad ang mga content creators dahil marami ang naiimpluwensyahan ng kanilang mga ipinapakita online.

“Kung ikaw ay may platform at maraming followers, mas lalo mong dapat gamitin ito para magpakita ng disiplina at responsableng pagmamaneho. Dapat nagsusulong ng road safety ang content, hindi paglabag sa batas trapiko,” dagdag pa niya.

Patuloy ding hinihikayat ng ahensya ang lahat ng motorista at content creators na maging mabuting ehemplo sa lansangan at gamitin ang social media sa pagpapalaganap ng responsableng pagmamaneho at kaligtasan sa kalsada.

30/05/2026

𝗜𝗻 𝗢𝗯𝘀𝗲𝗿𝘃𝗮𝗻𝗰𝗲 𝗼𝗳 𝗥𝗼𝗮𝗱 𝗦𝗮𝗳𝗲𝘁𝘆 𝗠𝗼𝗻𝘁𝗵, 𝗟𝗧𝗢 𝗥𝗲𝗴𝗶𝗼𝗻 𝟬𝟮 𝗿𝗲𝗺𝗶𝗻𝗱𝘀 𝗲𝘃𝗲𝗿𝘆𝗼𝗻𝗲: “𝗧𝗵𝗲 𝗥𝗼𝗮𝗱 𝗥𝘂𝗹𝗲𝘀: 𝗟𝗶𝘃𝗲 𝗦𝗮𝗳𝗲!”

Road safety begins with discipline, responsibility, and awareness. As we continue promoting safer roads for all motorists, riders, passengers, and pedestrians, let us always observe proper driving practices and follow traffic rules and regulations.

Every responsible action can help save lives. Together, let us build a culture of road safety and responsible driving across Region 02.

Drive responsibly. Arrive safely.