21/08/2026
صدر الپائن ایسوسی ایشن آزادکشمیر کی جانب سے ڈاکٹر عاصمہ مشتاق کے انتقال پر اظہارِ تعزیت
باغ، آزادکشمیر: الپائن ایسوسی ایشن آزادکشمیر کے صدر راجہ نثار احمد شاہق نے معروف ٹریکر اور کوہ پیمائی سے وابستہ ڈاکٹر عاصمہ مشتاق کے اچانک انتقال پر گہرے رنج و غم اور افسوس کا اظہار کیا ہے۔
راجہ نثار احمد شاہق نے کہا کہ ڈاکٹر عاصمہ مشتاق اُن باہمت خواتین میں شامل تھیں جنہوں نے قدرت کے حسین مناظر سے محبت کو محض شوق تک محدود نہیں رکھا بلکہ دشوار گزار پہاڑی راستوں پر ٹریکنگ کے ذریعے اپنے جذبے اور حوصلے کا عملی اظہار کیا۔ وہ اکثر تنہا بھی ٹریکنگ پر نکل پڑتی تھیں، جو ان کے عزم، خود اعتمادی اور مہم جوئی کی عکاسی کرتا تھا۔
انہوں نے کہا کہ سپانٹک ایکسپیڈیشن سے واپسی کے دوران ہائی آلٹی ٹیوڈ سکنس کا شکار ہونے کے بعد ڈاکٹر عاصمہ مشتاق کا انتقال ٹریکرز، کوہ پیماؤں اور ان کے تمام چاہنے والوں کے لیے ایک ناقابلِ تلافی صدمہ ہے۔ ان کی اچانک وفات نے پورے ٹریکنگ اور ایڈونچر اسپورٹس کے حلقوں کو سوگوار کر دیا ہے۔
راجہ نثار احمد شاہق نے کہا کہ ڈاکٹر عاصمہ مشتاق کی بہادری، بلند حوصلگی، محنت اور پہاڑوں سے محبت کو ہمیشہ یاد رکھا جائے گا۔ ان کا کہنا تھا کہ ہر شخص یہی سوچ رہا ہے کہ کاش وہ دن کبھی نہ آتا جب ایک جرات مند، باصلاحیت اور مہم جو خاتون ہمیشہ کے لیے خاموش ہو گئی۔
انہوں نے مرحومہ کے اہلِ خانہ، عزیز و اقارب اور دوست احباب سے دلی تعزیت کرتے ہوئے کہا کہ الپائن ایسوسی ایشن آزادکشمیر اس دکھ کی گھڑی میں غمزدہ خاندان کے ساتھ کھڑی ہے۔
راجہ نثار احمد شاہق نے دعا کی کہ اللہ تعالیٰ ڈاکٹر عاصمہ مشتاق مرحومہ کی مغفرت فرمائے، انہیں جنت الفردوس میں اعلیٰ مقام عطا کرے اور سوگوار خاندان کو صبرِ جمیل عطا فرمائے۔ آمین۔
راجہ نثار احمد شاہق
صدر، الپائن ایسوسی ایشن آزادکشمیر
