03/06/2026
محرم الحرام کے دوران امن و امان قائم رکھنے اور مختلف مکاتب فکر کے درمیان بھائی چارے کی فضا کو فروغ دینے کے لیے تمام ممکن اقدامات اٹھائے جا رہے ہیں۔
ان خیالات کا اظہار ڈپٹی کمشنر ڈیرہ اسماعیل خان حکمت اللّٰہ نے ضلعی پولیس افسر ضیا الدین احمد کے ہمرہ ڈپٹی کمشنر آفس کے کانفرنس ہال میں شیعہ و سنی مذہبی اکابرین و علماء کے وفود سے الگ الگ ملاقاتوں کے دوران کیا۔
اجلاس میں انتظامیہ اور سیکورٹی فورسز کے دیگر افسران نے بھی شرکت کی۔
اس موقع پر ڈپٹی کمشنر نے یقین دلایا کہ محرم الحرام کے حوالے سے طے شدہ امور پر من و عن عمل درآمد کیا جائے گا اور کسی کو بھی قانون ہاتھ میں لینے کی اجازت نہیں دی جائے گی۔ انہوں نے تمام علماء اور اکابرین سے اپیل کی کہ وہ روایتی مذہبی ہم آہنگی کو برقرار رکھتے ہوئے ڈیرہ اسماعیل خان میں امن و امان کو یقینی بنائیں۔ انہوں نے واضح کیا کہ پولیس اور دیگر قانون نافذ کرنے والے اداروں کی معاونت سے ایک فول پروف اور جامع سیکورٹی پلان تشکیل دیا جا رہا ہے تاکہ عزاداروں کو ہر ممکن تحفظ فراہم کیا جا سکے۔
