31/07/2026
غیر قانونی ڈیزل ایجنسیوں کے خلاف ضلعی انتظامیہ ڈیرہ اسماعیل خان کا بڑا کریک ڈاؤن، لاکھوں لیٹر اسمگل شدہ پٹرولیم مصنوعات برآمد
اسسٹنٹ کمشنر ڈیرہ اسماعیل خان ڈاکٹر محمد حامد صدیق کی سربراہی میں ضلعی انتظامیہ نے وفاقی تحقیقاتی ادارہ (FIA)، پاکستان کسٹمز، ضلعی پولیس اور سول ڈیفنس کے ہمراہ غیر قانونی ڈیزل ایجنسیوں اور اسمگل شدہ پٹرولیم مصنوعات کے خلاف مشترکہ کارروائی کرتے ہوئے بڑا کریک ڈاؤن کیا۔
یہ آپریشن مشرقی سرکلر روڈ، بنوں روڈ اور بائی پاس روڈ سمیت مختلف مقامات پر کیا گیا، جہاں غیر قانونی طور پر ڈیزل اور پٹرول کی ذخیرہ اندوزی اور فروخت میں ملوث ایجنسیوں کا معائنہ کیا گیا۔
کارروائی کے دوران پیٹرولیم رولز 1934 کے رول 3-A کے تحت غیر قانونی ڈیزل ڈسپنسنگ یونٹس اور متعلقہ تنصیبات کو موقع پر ہی مسمار اور ختم کیا گیا۔
کارروائی کے دوران 05 غیر قانونی ڈیزل یونٹس قبضہ میں لے کر ضبط کیے گئے جبکہ 12 غیر قانونی ڈیزل یونٹس کو موقع پر ہی سیل کر دیا گیا۔ مزید برآں تقریباً 1,50,000 لیٹر ڈیزل اور 50,000 لیٹر پٹرول برآمد کیا گیا، جن کے اسمگل شدہ ہونے کا شبہ ہے۔
کارروائی کے دوران متعدد ڈیزل ڈسپنسنگ یونٹس، پائپ لائنز، فٹنگز، فائر ایکسٹنگوشر اور پانچ ایکسپائر شدہ فائر ایکسٹنگوشرز بھی قبضے میں لیے گئے۔
تمام برآمد شدہ پٹرولیم مصنوعات اور دیگر ضبط شدہ سامان کو پیٹرولیم رولز 1934 کے رول 3-E کے تحت پاکستان کسٹمز کے حوالے کر دیا گیا ہے تاکہ انہیں محفوظ تحویل میں رکھا جائے اور متعلقہ قوانین کے مطابق مزید قانونی کارروائی عمل میں لائی جا سکے۔ پاکستان کسٹمز کو یہ بھی سفارش کی گئی ہے کہ برآمد ہونے والی اسمگل شدہ پٹرولیم مصنوعات کو کسٹمز ایکٹ کی متعلقہ دفعات کے تحت ضبط کرتے ہوئے ملوث عناصر کے خلاف قانونی کارروائی اور مقدمات درج کیے جائیں۔
اس موقع پر اسسٹنٹ کمشنر ڈیرہ اسماعیل خان ڈاکٹر محمد حامد صدیق نے کہا کہ ضلعی انتظامیہ عوام کی جان و مال کے تحفظ، غیر قانونی کاروبار کے خاتمے، اسمگل شدہ پٹرولیم مصنوعات کی روک تھام، سرکاری محصولات کے تحفظ اور قانون کی مکمل عملداری کے لیے پرعزم ہے۔ انہوں نے واضح کیا کہ غیر قانونی پٹرولیم کاروبار، بغیر اجازت ذخیرہ اندوزی اور اسمگل شدہ ایندھن کی خرید و فروخت میں ملوث عناصر کے خلاف بلاامتیاز کارروائیاں آئندہ بھی جاری رہیں گی اور کسی کو قانون سے بالاتر نہیں سمجھا جائے گا۔
انہوں نے کارروائی میں شریک FIA، پاکستان کسٹمز، ضلعی پولیس، سول ڈیفنس اور ضلعی انتظامیہ کے افسران و اہلکاروں کی مشترکہ کاوشوں کو سراہتے ہوئے کہا کہ تمام اداروں کے باہمی تعاون سے قانون شکن عناصر کے خلاف مؤثر کارروائی ممکن ہوئی ہے۔
