15/05/2026
ڈسٹرکٹ دیامر کی ایکسائز پولیس چیک پوسٹ تھور پر زائد کرایہ وصول کرنے والوں کے خلاف باقاعدہ کریک ڈاؤن شروع کر دیا گیا ہے۔ سیکرٹری ایکسائز اینڈ ٹیکسیشن ثناء اللہ کے خصوصی احکامات پر یہ کارروائیاں ہز ہائینس پرنس رحیم آغا خان کے دورہ گلگت بلتستان اور عید الاضحیٰ کے موقع پر بڑھتے ہوئے سفری رش کے پیش نظر شروع کی گئی ہیں۔
ذرائع کے مطابق رینٹ اے کار اور پبلک سروس گاڑیوں کی جانب سے بعض روٹس پر مسافروں سے مقررہ کرایوں سے زائد رقم وصول کرنے کی شکایات موصول ہو رہی تھیں، جس پر ایکسائز پولیس ٹیم نے تھور چیک پوسٹ پر سخت نگرانی شروع کر دی۔ کارروائی کے دوران کئی گاڑیوں سے زائد وصول کی گئی رقم موقع پر ہی مسافروں کو واپس کر دی گئی۔
ایکسائز حکام کا کہنا ہے کہ عوام کو ریلیف فراہم کرنا اولین ترجیح ہے اور کسی بھی ٹرانسپورٹر کو اوورچارجنگ کی اجازت نہیں دی جائے گی۔ حکام نے خبردار کیا ہے کہ خلاف ورزی کرنے والوں کے خلاف مزید سخت قانونی کارروائی عمل میں لائی جائے گی جبکہ چیکنگ کا سلسلہ عید تک مسلسل جاری رہے گا۔۔
