03/06/2026
بی آر ٹی یلو لائن منصوبے کی پیش رفت اور سٹی فلائی اوور سے متصل ٹنل کی تعمیر کے حوالے سے اہم مشاورتی اجلاس
گوجرانوالہ: وزیراعلیٰ پنجاب مریم نواز شریف کے ویژن کے تحت گوجرانوالہ کے شہریوں کو عالمی معیار کی سفری سہولیات فراہم کرنے کے لیے جاری میگا ٹرانسپورٹ منصوبہ بی آر ٹی یلو لائن گوجرانوالہ کی پیش رفت اور اندرون شہر سٹی فلائی اوور سے متصل ٹنل کی تعمیر کے حوالے سے ایک اہم مشاورتی اجلاس ڈپٹی کمشنر آفس گوجرانوالہ میں منعقد ہوا۔
اجلاس کی صدارت کیپٹن (ر) زاہد سعید، سابق چیف سیکرٹری پنجاب و پروجیکٹ ڈائریکٹر بی آر ٹی یلو لائن گوجرانوالہ، اور ڈپٹی کمشنر گوجرانوالہ نوید احمد نے مشترکہ طور پر کی۔ اجلاس میں نیسپاک، ہائی ویز، بی آر ٹی منصوبے کے حکام اور متعلقہ اداروں کے نمائندگان، اندرون شہر کے بازاروں کے تاجر تنظیموں کے عہدیداروں نے شرکت کی۔
اجلاس میں سٹی فلائی اوور کے ساتھ مجوزہ ٹنل کی تعمیر، زمین کے حصول، ممکنہ متاثرہ تاجروں کو درپیش نقصانات، معاوضوں کی ادائیگی، تعمیراتی سرگرمیوں کے دوران ٹریفک مینجمنٹ پلان اور حفاظتی اقدامات سمیت مختلف امور کا تفصیلی جائزہ لیا گیا۔ تاجر برادری کے خدشات، تحفظات اور تجاویز پر بھی غور کیا گیا اور اس امر کا اعادہ کیا گیا کہ تعمیراتی کاموں کے آغاز سے قبل اور دورانِ تعمیر جامع حکمت عملی اختیار کی جائے گی تاکہ کاروباری سرگرمیاں کم سے کم متاثر ہوں۔
پروجیکٹ ڈائریکٹر بی آر ٹی کیپٹن (ر) زاہد سعید اور نیسپاک حکام نے اجلاس کو بریفنگ دیتے ہوئے بتایا کہ ٹنل کی تعمیر کے مختلف آپشنز پر طویل غور و خوض کے بعد زمین کے حصول کی ضرورت کو 70 مرلہ سے کم کرکے 46 مرلہ تک محدود کر دیا گیا ہے، جس کا مقصد متاثرہ تاجروں کے ممکنہ نقصانات کو کم سے کم کرنا اور عوامی مفاد کے ساتھ کاروباری برادری کے تحفظات کا بھی خیال رکھنا ہے۔
اجلاس میں اس بات پر بھی اتفاق کیا گیا کہ منصوبے کے تمام مراحل میں سٹیک ہولڈرز کی مشاورت کو یقینی بنایا جائے گا اور ٹریفک کی روانی برقرار رکھنے کے لیے مؤثر متبادل انتظامات کیے جائیں گے۔
اس موقع پر تاجر برادری نے ڈپٹی کمشنر گوجرانوالہ نوید احمد کی جانب سے اندرون شہر تاجروں کے تحفظات اور مسائل کو متعلقہ فورمز پر مؤثر انداز میں اجاگر کرنے پر شکریہ ادا کیا۔ ڈپٹی کمشنر نوید احمد نے کہا کہ گوجرانوالہ ہمارا مشترکہ شہر ہے اور شہریوں و تاجر برادری کے مسائل کے حل کے لیے ضلعی انتظامیہ تمام متعلقہ اداروں کے ساتھ مل کر کام جاری رکھے گی۔
اجلاس میں اس عزم کا اظہار کیا گیا کہ بی آر ٹی یلو لائن گوجرانوالہ منصوبہ شہریوں کو جدید، محفوظ اور معیاری سفری سہولیات فراہم کرنے کے ساتھ ساتھ شہر کے ٹرانسپورٹ نظام میں انقلابی بہتری لانے میں اہم کردار ادا کرے گا۔
👍 ❤️
