09/10/2026
09-10-2026
سنڌ کي ٽڪرا ٽڪرا ڪرڻ جي سازش، زمينن ۽ وسيلن تي قبضن، ڪارپوريٽ فارمنگ، 28هين آئيني ترميم ۽ پاڻيءَ تي ڌاڙن خلاف عوامي تحريڪ طرفان ڪوٽ غلام محمد ۾ عوامي سجاڳي ريلي
ڪوٽ غلام محمد (پ_ر) عوامي تحريڪ جي هلندڙ عوامي سجاڳي مهم جي سلسلي ۾ سنڌ کي ٽڪرا ٽڪرا ڪرڻ جي سازش، سنڌ جي زمينن ۽ وسيلن تي قبضن، ڪارپوريٽ فارمنگ، 28هين آئيني ترميم ۽ سنڌو درياهه جي پاڻيءَ تي ڌاڙن خلاف ڪوٽ غلام محمد ۾ نادره چوڪ کان پريس ڪلب تائين ريلي ڪڍي وئي. ريلي جي اڳواڻي عوامي تحريڪ جي مرڪزي آرگنائيزر لال جروار، مرڪزي اڳواڻ ڊاڪٽر رسول بخش خاصخيلي، ڊاڪٽر دلدار لغاري، عوامي تحريڪ ضلعي ميرپورخاص جي آرگنائيزر ايڊووڪيٽ اياز ڪلوئي، ساجن ڪمار، مختيار خاصخيلي، راڻو مل، برڪت شر، مولابخش نونداڻي ،امير بخش جروار، شگن ڪولهي، نور محمد خاصخيلي ۽ ٻين اڳواڻن ڪئي. ريلي ۾ عوامي تحريڪ جي ڪارڪنن ۽ شهرين شرڪت ڪئي. اڳواڻن ۽ ڪارڪنن سنڌ جي وحدت، قومي حقن، زمينن، وسيلن ۽ پاڻيءَ جي تحفظ لاءِ نعريبازي ڪئي.
ريلي کي خطاب ڪندي اڳواڻن چيو ته سنڌ جي وحدت خلاف ڪنهن به سازش کي سنڌ جو عوام قبول نه ڪندو. سنڌ تاريخي، ثقافتي ۽ جاگرافيائي طور هڪ وحدت ۽ ملڪ جو باني صوبو آهي. سنڌ جو ڪروڙين عوام سنڌ کي انتظامي يونٽن يا صوبن جي نالي ۾ ورهائڻ خلاف پنھنجو فيصلو ٻڌائي ڇڏيو آھي. اڳواڻن وڌيڪ چيو ته گذريل اوڻھتر سالن کان ملڪ ۾ شامل ننڍن قومن جي وسيلن تي قبضو ڪري ديوار سان لڳايو ويو آھي. ورلڊ بئنڪ جي رپورٽ مطابق ملڪ ۾ تيزي سان غربت وڌي پئي، دھشتگردي ۾ اضافو ٿيو آھي. حڪمرانن معاشي طور تي ملڪ جو ڏيوالو ڪڍي ڇڏيو آھي. اڳواڻن چيو ته ملڪ جي 25ڪروڙ عوام جي قسمت جا فيصلا آئي ايم ايف حوالي ڪيا ويا آھن. مخصوص اشرافيه عوام کي ڦري ڪنگال ڪري ڇڏيو آھي.
هنن چيو ته ڪارپوريٽ فارمنگ ذريعي هارين ۽ ننڍن آبادگارن کي بي دخل ڪرڻ يا سندن روزگار کي خطري ۾ وجهڻ بدران زرعي ترقيءَ جا اهڙا منصوبا جوڙيا وڃن، جن مان مقامي ماڻهن کي حقيقي فائدو ملي. بي زمين هارين کي زمينون ڏنيون وڃن، ماحولياتي تبديلين جي تناظر ۾ فصلن لاءِ ڪارائتي ڄاڻ ڏني وڃي، سنڌ کي حصي جو پاڻي ڏنو وڃي.
اڳواڻن چيو ته سنڌ ۾ پاڻيءَ جي هٿرادو کوٽ سبب سنڌ جا آبادگار، هاري ۽ عام ماڻهو سخت متاثر ٿي رهيا آهن. فصلن جي پوک، پيئڻ جي پاڻيءَ لاءِ ماڻهو تڙپي رهيا آهن ۽ ماحولياتي نظام کي نقصان پهچي رهيو آهي.
هنن چيو ته 28هين آئيني ترميم آڻڻ جو مقصد صوبن کان اختيار کسي سمورا اختيار وفاق کي ڏئي طاقتور ڪرڻ وارو فارمولو ملڪ جي باني قائد اعظم محمد علي جناح جي بنيادي تصور ۽ سوچ جي خلاف آھي.
عوامي تحريڪ جي اڳواڻن چيو ته عوامي سجاڳي مهم جو مقصد سنڌ جي ماڻهن کي پنهنجن بنيادي حقن، قومي وحدت، معاشي مسئلن ۽ جمهوري اختيارن بابت سجاڳ ڪرڻ آهي. سنڌ جي هارين، مزدورن، شاگردن، عورتن ۽ نوجوانن کي گڏجي پرامن، جمهوري ۽ منظم جدوجهد ذريعي پنهنجي ڌرتي، پاڻي، زمينن ۽ وسيلن جو تحفظ ڪرڻو پوندو.
مرڪزي پريس ترجمان عوامي تحريڪ
