23/03/2025
گُجراں گا عالمی تیہاڑا ور اک نظم تھہاری بسارتاں گی نذر. بعنوان...*شان گوجری*...
شان گوجری دیکھو شان گوجری.
مِٹھی مِٹھی سوہنی یاہ زبان گوجری.
سِدھی سادی مک مرچی سادو جہیو کھانو ہے.
سِدھو سادو رہنو سہنو سادو ہی فر لانو ہے.
باٹی ساٹی چھنڈی چھوہڑی جان گوجری
شان گوجری دیکھو شان گوجری.
طُرا آلی لُنگی بَداں ہتھ مانہہ رکھاں سوہٹی.
پیدل ٹُر گے پہاڑاں اُپر چڑھ جاں اُن گی چوٹی.
اُچا بانکا گبرُو جوان گوجری.
شان گوجری دیکھو شان گوجری.
جپھی شپھی کرتا راں تے بُگدر وی ہم چاتا راں.
بِینی غو رواج پرانو گتکو وی ہم لاتا راں.
مالی جِتیں مہارا یہ پہلوان گوجری.
شان گوجری دیکھو شان گوجری.
مال نا لے گے ٹہوکیں جانو پرانی ہے یاہ رِیت.
ماہلیاں اُپر سنگن سہیلیں جُڑ گے گاویں گیت.
سچیں مُچیں ہے یاہ مہان گوجری.
شان گوجری دیکھو شان گوجری.
دُدھ لسی گھی مکھن کھُلو ڈُلو کھاتا راں.
مرگاں مانہہ ہم مال چاراں بنجلی وی بجاتا راں .
کھاتا راں کلیاڑی تے کڑان گوجری.
شان گوجری دیکھو شان گوجری.
ٹھنڈی ٹھنڈی ہوا پیاں. پانی ٹھنڈو ٹھار.
چنگا بھلا راں ہمیشہ ہوتا نہیں بیمار.
دل گا کراں پُورا ارمان گوجری.
شان گوجری دیکھو شان گوجری.
ٹہوکیں جانو مہارو. ہوتو جئے ہُن کہٹ.
پڑھائی آلے پاسے کیوں جے گیا ہم ڈٹ
ٹھاٹھ باٹھ رکھاں عالیشان گوجری.
شان گوجری دیکھو شان گوجری.
محنت اللہ توڑ چاہڑے قوم گا معماراں غی.
ماں بولی گا سچا اُن خدمتگاراں غی
سکولاں مانہہ وی لگ پیا پڑھان گوجری.
شان گوجری دیکھو شان گوجری.
بولی اپنی بولنی یاہ بچاں نا سمجھانو.
پرایو گہنوں باہنو تے اپنو رُوپ کھڑانو.
سچو ہے خاکؔی یوہ اخان گوجری.
شان گوجری دیکھو شان گوجری.
خادم حُسین خاکؔی چنڈک پُنچھ جموں کشمیر
