06/08/2026
جمرود: جماعت اسلامی کی 7 اگست کے احتجاجی جلسے کی تیاریاں مکمل، مقام کا دورہ
جمرود: جماعت اسلامی جمرود کے امیر حاجی گل محمد آفریدی نے اپنے ساتھیوں کے ہمراہ بابِ خیبر کے مقام کا دورہ کیا، جہاں 7 اگست کو ملک گیر ہڑتال کے سلسلے میں ایک بڑے احتجاجی جلسے کا انعقاد کیا جائے گا۔
انہوں نے کہا کہ 7 اگست کو بابِ خیبر میں ضلع خیبر کے مختلف علاقوں، خصوصاً لنڈی کوتل، باڑہ اور جمرود سے عوام کے بڑے قافلے احتجاجی جلسے میں شرکت کریں گے۔
انہوں نے کہا کہ یہ احتجاج بڑھتی ہوئی مہنگائی، بے روزگاری، آئی پی پیز، لیوی ٹیکس اور قبائلی اضلاع پر مزید ٹیکسوں کے نفاذ کے خلاف کیا جا رہا ہے۔ ان کا کہنا تھا کہ عوام اپنے آئینی اور جمہوری حق کے تحت پرامن انداز میں احتجاج ریکارڈ کرائیں گے اور حکومت سے مطالبہ کریں گے کہ عوام پر معاشی بوجھ بڑھانے والے فیصلے واپس لیے جائیں۔
حاجی گل محمد آفریدی نے عوام سے اپیل کی کہ وہ 7 اگست کو بابِ خیبر پہنچ کر احتجاجی جلسے میں بھرپور شرکت کریں تاکہ عوامی مطالبات مؤثر انداز میں حکام تک پہنچائے جا سکیں۔
