29/05/2025
چئیرمین صدر ٹاون منصور احمد شیخ نے کہا ہے یوم تکبیر ہمیں موقع فراہم کرتا ہے کہ اس دن ہم پاکستان کے دفاع اور سلامتی کے عہد کی تجدید کریں۔ یہ دن اس عہد کی تجدید کا بھی موقع ہے کہ ہمیں ایک آزاد، خودمختار ملک کی حیثیت سے کسی بھی بیرونی دباؤ، دھمکیوں کو خاطر میں لائے بغیر اور اللہ تعالیٰ کی کبریائی اور تائید پر مکمل بھروسہ رکھتے ہوئے ملکی سالمیت اور تعمیر و ترقی کے فیصلوں میں ہمیشہ قومی مفاد کو مد نظر رکھنا چاہیے۔ان خیالات کا اظہارانہوں نے محکمہ تعلیم صدر ٹاون میں یوم تکبیر اور اسکاوٹس کی تقریب حلف برداری سے خطاب کرتے ہوئے کیا۔اس موقع پر ٹی ایم سی صدر ٹاون نور حسن جوکھیو سندھ بوائز اسکاوٹس ایسوسی ایشن کے صوبائی سیکرٹری اختر میر ۔ڈایریکٹر ایجوکیشن صدر محمد رئیسی۔چئیرمین ایجوکیشن کمیٹی عاطف بلو۔ایڈیشنل ڈائریکٹر ایجوکیشن اسماء ڈپٹی ڈایریکٹر محمد کاشف و دیگر عہدےداران و افسران بھی موجود تھے۔اس موقع پر چئرمین صدر ٹاون نے اسکاوٹس کو مخاطب کرتے ہوئے کہااسکاؤٹنگ کا مقصد نوجوانوں کی جسمانی، ذہنی اور روحانی صلاحیتوں کو اجاگر کرکے مقامی، قومی اور بین الاقوامی سطح پر انہیں معاشرے کی بہتری کے لیے استعمال کرنا ہے۔ اس موقع پر ٹی ایم سی صدر نور حسن چوکھیو نے کہا کہ یوم تکبیر کے ذریعے ہم نے اقوام عالم کو بتادیا ہے کہ ملکی دفاع کو ناقابل تسخیر بنانے مین کوئی سمجھوتہ نہین کیا جائے گا۔جبکہ اسکاوٹس جب چھوٹے چھوٹے گروپ اتحاد بناتے ہیں تو بھائی چارے کا ماحول پیدا ہوتا ہے۔ یہ تجربات امانت، ذاتی اعزاز،خود اعتمادی پائیداری،تیار حالت میں رہنا اور ذمہ داری کا احساس پیدا کرنے پر زور دینے میں مدد دیتے ہیں تقریب کے اختتام پر اسکاوٹس کی حلف برداری بھی کی گئی ۔
