11/05/2026
سندھ حکومت کی مجرمانہ غفلت نے جامعہ کراچی کو تباہی کے دہانے پر لا کھڑا کیا،اراکین مرکزی کمیٹی ایم کیو ایم پاکستان
اساتذہ کے جائز مطالبات کی مکمل حمایت کرتے ہیں، مرکزی کمیٹی ایم کیو ایم پاکستان
وزٹنگ فیکلٹی کو واجبات کی عدم ادائیگی اور امتحانی امور کی جبری انجام دہی غیر منصفانہ ہے۔اراکین مرکزی کمیٹی ایم کیو ایم پاکستان
ارباب اختیار جامعہ کراچی کو مالی بحران سے نکالنے کیلئے فوری فنڈز جاری کریں، اراکین مرکزی کمیٹی ایم کیو ایم پاکستان
کراچی۔۔۔۔۔۔ 10 مئی 2026ء
متحدہ قومی موومنٹ (ایم کیو ایم) پاکستان کی مرکزی کمیٹی نے جامعہ کراچی میں پیدا ہونے والی حالیہ سنگین مالی، انتظامی اور تعلیمی صورتحال پر گہری تشویش کا اظہار کرتے ہوئے کہا ہے کہ سندھ حکومت کی مسلسل غفلت اور ناقص پالیسیوں نے ملک کی اس سب سے بڑی اور معتبر درسگاہ کو شدید ترین بحران سے دوچار کر دیا ہے۔ مرکزی کمیٹی کے مطابق انجمن اساتذہ جامعہ کراچی کے حالیہ ہنگامی اجلاس میں سامنے آنے والے حقائق اس تلخ حقیقت کی عکاسی کرتے ہیں کہ اساتذہ کرام، افسران اور ملازمین کے دیرینہ واجبات کی عدم ادائیگی، ہاؤس سیلنگ کی معطلی اور دیگر مالیاتی مسائل نے جامعہ کے پورے انتظامی و تعلیمی ڈھانچے کو مفلوج کر کے رکھ دیا ہے۔ بیان میں واضح کیا گیا کہ اگر فی الفور ہنگامی بنیادوں پر تلافی کے اقدامات نہ کیے گئے تو جامعہ کراچی کا تدریسی اور امتحانی نظام مکمل طور پر زمین بوس ہو جائے گا، جس کا براہِ راست اور ناقابلِ تلافی نقصان ہزاروں طلبہ و طالبات کے مستقبل کو ہوگا۔ ایم کیو ایم پاکستان کی مرکزی کمیٹی اساتذہ کے تمام جائز مطالبات اور ان کے آئینی و قانونی حقوق کی غیر مشروط اور بھرپور حمایت کا اعلان کرتی ہے، کیونکہ اساتذہ کی جانب سے مسلسل احتجاج، مذاکرات اور ہر سطح پر توجہ دلانے کے باوجود حکومتِ سندھ اور متعلقہ اداروں کا ٹس سے مس نہ ہونا انتہائی افسوسناک اور لمحہ فکریہ ہے۔ بالخصوص وزٹنگ اساتذہ کے واجبات کی ادائیگی کے بغیر ان سے زبردستی امتحانی امور لینے کی کوششیں نہ صرف غیر منصفانہ بلکہ تعلیمی اخلاقیات کے بھی منافی ہیں۔ ایم کیو ایم پاکستان اربابِ اختیار سے مطالبہ کرتی ہے کہ جامعہ کراچی کے لیے فوری طور پر خصوصی فنڈز جاری کیے جائیں تاکہ اساتذہ و ملازمین کے تمام واجبات ادا ہوں اور جامعہ اس بدترین مالی تعطل سے نکل سکے۔ ساتھ ہی مرکزی کمیٹی نے مادرِ علمی کے اساتذہ سے دردمندانہ اپیل کی ہے کہ وہ طلبہ و طالبات کے تعلیمی مستقبل اور ان کی ذہنی اذیت کو مدنظر رکھتے ہوئے امتحانات اور تدریسی عمل کی مکمل بندش سے حتی الامکان گریز کریں، تاکہ غریب اور متوسط طبقے کے بچوں کا تعلیمی حرج نہ ہو۔ ایم کیو ایم پاکستان ارضِ پاک کے تعلیمی اثاثوں، اساتذہ، ملازمین اور طلبہ کے حقوق کے تحفظ کے لیے ہر فورم پر آواز بلند کرتی رہے گی اور جامعہ کراچی کو اس گرداب سے نکالنے کے لیے اپنا ہر ممکن سیاسی و قانونی کردار ادا کرنے کا پختہ عزم رکھتی ہے۔
