27/04/2026
حاجی موج دین مزاریؒ
وہ ایک ایسی عظیم اور بااخلاق شخصیت تھے جن کا اخلاق، محبت اور خلوص ہر ملنے والے کے دل میں آج بھی زندہ ہے۔ آپ نے اپنی پوری زندگی گڈو میں گزاری اور گڈو کے لوگوں کے لیے خود کو وقف کیے رکھا۔
حاجی موج دین مزاری صاحب نے واپڈا تھرمل پاور ہاؤس میں خدمات انجام دیں اور اپنی ڈیوٹی کو عبادت سمجھ کر نبھایا۔ ان کے تعلقات افسران سے لے کر کلرکس اور سکیورٹی گارڈز تک سب کے ساتھ نہایت مثالی تھے۔ ہر شخص آپ کو آپ کے اعلیٰ کردار اور نرم مزاجی کی وجہ سے پسند کرتا تھا۔
آپ ہر عمر کے لوگوں کے ساتھ ان کی عمر کے مطابق پیش آتے تھے؛ بچوں کے ساتھ بچوں کی طرح، نوجوانوں کے ساتھ دوستوں کی طرح اور بزرگوں کے ساتھ انتہائی ادب و احترام سے پیش آتے تھے۔ آپ نے قیامِ پاکستان کا دور بھی اپنی آنکھوں سے دیکھا اور ریڈیو سے لے کر جدید ٹچ موبائل تک کا زمانہ گزارا۔ آپ کو تاریخ سے گہرا شغف اور وسیع علم حاصل تھا۔
حاجی موج دین مزاری صاحب واپڈا کے انتخابات میں بھرپور انداز میں حصہ لیتے اور اس عمل کو بڑے شوق اور جوش و خروش سے انجوائے کرتے تھے۔ ان کی محفل میں جو بھی بیٹھ جاتا، اس کا دل چاہتا کہ وہیں بیٹھا رہے۔
ماشاءاللہ، زندگی کے آخری ایام تک وہ خود موٹر سائیکل چلاتے، بازار جاتے اور اپنے کام خود انجام دیتے رہے۔ اللہ تعالیٰ کا خاص کرم تھا کہ 1997ء میں واپڈا کی جانب سے قرعہ اندازی میں ان کا نام حج کے لیے منتخب ہوا اور انہوں نے فریضۂ حج ادا کیا۔
اللہ تعالیٰ سے دعا ہے کہ وہ حاجی موج دین مزاریؒ کو اپنی خاص رحمتوں میں جگہ عطا فرمائے، ان کی مغفرت فرمائے اور انہیں جنت الفردوس میں اعلیٰ مقام نصیب کرے۔
آمین ثم آمین
