24/07/2026
کوہاٹ ریجنل پولیس آفیسر کوہاٹ عرفان طارق کی جانب سے ایس پی انوسٹی گیشن نیاز محمد خان کے لیے جاری کردہ تعریفی سند ڈسٹرکٹ پولیس آفیسر کوہاٹ شہباز الٰہی نے ایک پروقار تقریب کے دوران انہیں پیش کی۔
اس موقع پر ڈی پی او شہباز الٰہی نے کہا کہ ایس پی انوسٹی گیشن نیاز محمد خان نے اپنی پیشہ ورانہ ذمہ داریاں انتہائی دیانتداری، محنت اور فرض شناسی کے ساتھ انجام دیں۔ جرائم کی تفتیش کے معیار کو بہتر بنانے، اہم مقدمات کو میرٹ پر یکسو کرنے اور محکمانہ امور میں ان کی کارکردگی قابل تعریف ہے۔
انہوں نے کہا کہ محکمہ پولیس میں بہترین کارکردگی دکھانے والے افسران کی حوصلہ افزائی نہ صرف انفرادی صلاحیتوں کا اعتراف ہے بلکہ اس سے دیگر افسران اور اہلکاروں کو بھی مزید محنت اور لگن سے فرائض انجام دینے کی ترغیب ملتی ہے۔
ایس پی انوسٹی گیشن نیاز محمد خان نے تعریفی سند ملنے پر ڈی آئی جی کوہاٹ عرفان طارق اور ڈی پی او شہباز الٰہی کا شکریہ ادا کرتے ہوئے کہا کہ یہ اعزاز ان کے لیے باعث فخر ہے۔ انہوں نے کہا کہ وہ آئندہ بھی اسی جذبے کے ساتھ عوام کی خدمت، قانون کی بالادستی اور انصاف کی فراہمی کے لیے اپنی ذمہ داریاں پوری ایمانداری سے انجام دیتے رہیں گے۔
تقریب کے اختتام پر ڈی پی او شہباز الٰہی نے ایس پی انوسٹی گیشن نیاز محمد خان کو تعریفی سند پیش کی، جبکہ شرکا نے ان کی شاندار کارکردگی کو سراہتے ہوئے نیک خواہشات کا اظہار کیا۔
