09/10/2026
ڈسٹرکٹ ایجوکیشن آفیسر کوہاٹ ظہور خان صاحب کا گورنمنٹ پرائمری سکول کے ڈی اے نمبر 1 کا دورہ — ناقص صورتحال پر شدید برہمی، ہیڈ ٹیچر کے خلاف سخت کارروائی کے احکامات!
ڈسٹرکٹ ایجوکیشن آفیسر کوہاٹ ظہور خان صاحب نے گورنمنٹ پرائمری سکول کے ڈی اے نمبر 1 کا دورہ کیا، جہاں سکول کی مجموعی صورتحال، صفائی اور رنگ و روغن کے ناقص انتظامات پر شدید برہمی کا اظہار کیا۔
اس موقع پر ڈسٹرکٹ ایجوکیشن آفیسر نے دوٹوک الفاظ میں واضح کیا کہ سرکاری سکولوں میں بدانتظامی، فرائض سے غفلت اور طلباء کو صاف ستھرا، محفوظ اور بہترین تعلیمی ماحول فراہم کرنے میں کوتاہی کسی صورت برداشت نہیں کی جائے گی۔
انہوں نے کہا کہ میں پہلے بھی واضح کر چکا ہوں کہ بچوں کا مستقبل ہماری اولین ذمہ داری ہے۔ سرکاری وسائل، ادارے کی بہتری اور طلباء کے لیے مناسب ماحول کی فراہمی میں غفلت برتنے والوں کے لیے محکمہ تعلیم میں کوئی گنجائش نہیں۔ ہر ہیڈ ٹیچر اپنے ادارے کی حالت، صفائی، نظم و ضبط اور تعلیمی معیار کا خود ذمہ دار ہے۔
ڈسٹرکٹ ایجوکیشن آفیسر نے سکول کی ناقص صورتحال کا سخت نوٹس لیتے ہوئے ہیڈ ٹیچر کے خلاف محکمانہ کارروائی کے احکامات جاری کر دیے۔
ڈسٹرکٹ ایجوکیشن آفیسر کوہاٹ کا واضح پیغام
’’ یاد رکھے! سرکاری سکول کسی کی ذاتی جاگیر نہیں، یہ قوم کے بچوں کے مستقبل کی امانت ہیں۔ فرائض میں غفلت، ناقص انتظامات اور بچوں کے تعلیمی ماحول پر سمجھوتہ کسی صورت قبول نہیں ہوگا۔ ہر سکول میں صفائی، نظم و ضبط اور معیاری تعلیم یقینی بنانا ہوگی۔ جو اپنی ذمہ داری پوری نہیں کرے گا، اسے جواب دہ ہونا پڑے گا۔‘‘
محکمہ تعلیم کوہاٹ کی جانب سے واضح کیا گیا ہے کہ سکولوں کی بہتری، اساتذہ کی حاضری، صفائی ستھرائی اور تعلیمی معیار کی نگرانی جاری رہے گی، اور کوتاہی کی نشاندہی ہونے پر قواعد و ضوابط کے مطابق کارروائی عمل میں لائی جائے گی۔
بچوں کا مستقبل، ہماری ذمہ داری — غفلت کسی صورت قابلِ قبول نہیں!
