07/08/2026
جماعتِ اسلامی کی احتجاجی ریلیوں اور دھرنے کے پیشِ نظر خصوصی ٹریفک پلان جاری
لاہور ٹریفک پولیس نے مزنگ اور گرد و نواح میں ٹریفک کی روانی برقرار رکھنے کے لیے خصوصی ٹریفک پلان جاری کر دیا۔
ترجمان لاہور ٹریفک پولیس کے مطابق احتجاجی ریلیاں شام 4 بجے کے بعد مزنگ اور قرطبہ چوک پہنچیں گی، جس کے باعث ان علاقوں میں ٹریفک کا دباؤ متوقع ہے۔
شام 4 بجے سے مغرب تک ہمدرد چوک، مزنگ، قرطبہ چوک اور ملحقہ علاقوں میں مرحلہ وار ٹریفک ڈائیورشن کی جائے گی۔
جین مندر لوئر مال سے اچھرہ کی جانب جانے والے شہری لٹن روڈ کے بجائے مال روڈ، لارنس روڈ اور شادمان کا متبادل راستہ اختیار کریں۔
سی ٹی او لاہور سید عبدالرحیم شیرازی نے شہریوں سے اپیل کی ہے کہ غیر ضروری طور پر مزنگ اور قرطبہ چوک کا رخ کرنے سے گریز کریں، سفر سے قبل ہیلپ لائن 15 اور راستہ ایف ایم سے ٹریفک کی تازہ صورتحال معلوم کریں۔
ٹریفک کی روانی برقرار رکھنے کے لیے 3 ڈی ایس پیز اور 100 سے زائد ٹریفک وارڈنز تعینات کیے گئے ہیں۔ ٹریفک کے دباؤ میں اضافے کی صورت میں گاڑیوں کو مرحلہ وار متبادل راستوں پر منتقل کیا جائے گا۔
سی ٹی او لاہور نے شہریوں سے ٹریفک وارڈنز کے ساتھ مکمل تعاون اور جاری کردہ ہدایات پر عمل کرنے کی بھی اپیل کی۔
