27/02/2026
اپنےمضافات میں تمام اسکولز، کالجز، جامعات، مساجد، بس اسٹینڈز، ریلوے اسٹیشنز، ائیر پورٹس، شاپنگ مالز پہ گہری نظر رکھئے۔ جہاں تک ممکن ہو اپنے بچوں کو اپنے پروں میں سمو کے رکھئے۔ دھرتی پہ بوجھ جاہل وحشی درندے اپنی کمیں گاہوں سے پھٹنے کو نکل پڑے ہیں۔ افواج پاکستان نے اب کی بار ایسا دندان شکن جواب دیا ہے، ایسا پھینٹا لگایا ہے کہ مدتوں یاد رکھیں گے۔ لاتوں کے بھوتوں سے مذاکرات کبھی بھی دانش مندانہ فیصلہ نہیں تھا۔ پتھر کے دور کے جہل کے ہرکاروں کو دین حنیف سے کوئی نسبت ہو ہی نہیں سکتی۔ یہ یقینا فتنہ الخوارج ہیں اور قرآن وحدیث میں ان سے نمٹنے کے واضح احکامات ثابت ہیں۔ ایسا ہو نہیں سکتا کہ ہمارے جوان سرحدوں پہ سر وقار وطن کی سربلندی کے لئے اپنے خون کے دیپ جلا رہے ہوں اور ادھر ہم ڈرائنگ روم ڈسکورسز میں سیاسی نسبتوں کے بے سرے اور بے معنی راگ الاپتے رہیں۔ جہل کے کارخانوں کے خلاف یک آواز ہونے کا وقت ہے۔ ہم میں سے جو ابھی تک اس حقیقت کو سمجھنے سے گریزاں ہیں ان میں سے کتنے پتھر کے دور کے ان جہل کے سوداگروں کے ایک دن کے تسلط کو بھی وطن عزیز کے لئے برداشت کرسکتے ہیں۔
افواج پاکستان زندہ باد۔ پاکستان پائندہ باد 🇵🇰
(محمد الیاس چشتی)
