27/05/2026
جیل میں عید کی خوشیوں کا اہتمام، انسانیت اور اصلاح کا مثبت پیغام
ڈی پی او جھنگ ساجد حسین کا ڈپٹی کمشنر علی اکبر بھنڈر کا ڈسٹرکٹ جیل جھنگ کا دورہ، قیدیوں سے ملاقات، عید کے تحائف تقسیم
عیدالاضحیٰ کے پُرمسرت موقع پر ڈسٹرکٹ پولیس آفیسر جھنگ ساجد حسین نے ڈپٹی کمشنر جھنگ علی اکبر بھنڈر کے ہمراہ ڈسٹرکٹ جیل جھنگ کا دورہ کیا، جہاں انہوں نے قیدیوں سے ملاقات کی، ان کی خیریت دریافت کی اور عید کے موقع پر تحائف تقسیم کئے۔دورے کے دوران جیل انتظامیہ کی جانب سے انتظامی امور، سکیورٹی اقدامات اور قیدیوں کو فراہم کی جانے والی سہولیات کے حوالے سے بریفنگ دی گئی۔ ڈی پی او جھنگ اور ڈپٹی کمشنر نے مختلف بیرکس کا دورہ کرتے ہوئے قیدیوں سے گفتگو کی اور انہیں عید کی مبارکباد پیش کی۔اس موقع پر ڈی پی او ساجد حسین کا کہنا تھا کہ عید خوشیاں بانٹنے، انسانیت سے جڑنے اور باہمی احساس کو فروغ دینے کا نام ہے۔ وہ افراد جو کسی وجہ سے اپنے اہلِ خانہ سے دور ہیں، ان کے ساتھ محبت، احترام اور ہمدردی کا اظہار بھی ہماری اجتماعی ذمہ داری ہے۔ڈپٹی کمشنر علی اکبر بھنڈر نے کہا کہ معاشرے کی بہتری کیلئے اصلاح، انسان دوستی اور مثبت رویوں کا فروغ ناگزیر ہے، دورے کے اختتام پر قیدیوں میں عید کے تحائف تقسیم کئے گئے، جبکہ اس انسانی ہمدردی کے اقدام کو قیدیوں نے خوش آئند قرار دیتے ہوئے ڈی پی او اور ڈپٹی کمشنر کا شکریہ ادا کیا۔
