02/06/2026
مردان | 02-06-2026
ایڈیشنل اسسٹنٹ کمشنر کاٹلنگ، قیصر حسین مغل کا مختلف ملک شاپس کا اچانک معائنہ، ملاوٹ شدہ دودھ فروخت کرنے والوں کے خلاف سخت کارروائی
عوام کو خالص اور معیاری دودھ کی فراہمی یقینی بنانے کے لیے ایڈیشنل اسسٹنٹ کمشنر کاٹلنگ قیصر حسین مغل نے متعلقہ محکموں اور جدید فوڈ ٹیسٹنگ ٹیم کے ہمراہ تحصیل کاٹلنگ کے مختلف ملک شاپس کا اچانک معائنہ کیا۔
معائنے کے دوران جدید موبائل لیبارٹری کے ذریعے دودھ کے نمونوں کا موقع پر ہی تجزیہ کیا گیا تاکہ دودھ کے معیار، خالص پن اور ملاوٹ کی فوری جانچ کی جا سکے۔ چیکنگ کے دوران متعدد دکانوں سے غیر معیاری اور ملاوٹ شدہ دودھ برآمد ہوا، جس پر ضلعی انتظامیہ نے فوری کارروائی کرتے ہوئے کئی ملک شاپس کو سیل کر دیا جبکہ متعدد دکانداروں کو بھاری جرمانے عائد کیے گئے۔
اس موقع پر ایڈیشنل اسسٹنٹ کمشنر کاٹلنگ قیصر حسین مغل نے واضح کیا کہ عوام کی صحت کے ساتھ کسی قسم کا کھیل برداشت نہیں کیا جائے گا۔ انہوں نے کہا کہ دودھ جیسی بنیادی غذائی ضرورت میں ملاوٹ ایک سنگین جرم ہے جو نہ صرف قانون کی خلاف ورزی ہے بلکہ عوامی صحت کے لیے بھی شدید خطرہ ہے۔
انہوں نے مزید کہا کہ ضلعی و تحصیل انتظامیہ کی جانب سے ملاوٹ مافیا کے خلاف کارروائیاں مزید تیز کی جائیں گی اور روزانہ کی بنیاد پر مختلف علاقوں میں معائنے جاری رہیں گے۔ تمام ملک شاپ مالکان کو ہدایت کی جاتی ہے کہ وہ دودھ اور دیگر اشیائے خورونوش میں ہر قسم کی ملاوٹ سے اجتناب کریں، بصورت دیگر سخت قانونی کارروائی، بھاری جرمانے، دکانوں کی سیلنگ اور گرفتاریاں عمل میں لائی جائیں گی۔
ضلعی انتظامیہ مردان، تحصیل انتظامیہ کاٹلنگ اور محکمہ لائیو اسٹاک اس عزم کا اعادہ کرتے ہیں کہ عوام کو خالص، معیاری اور محفوظ دودھ کی فراہمی ہر صورت یقینی بنائی جائے گی اور عوامی صحت کے تحفظ کے لیے تمام دستیاب وسائل بروئے کار لائے جائیں گے۔
