06/03/2026
سپريم ڪورٽ آف پاڪستان جي معزز جسٽس صلاح الدين پنهور صاحب هڪ اهم ۽ انساني وقار سان لاڳاپيل فيصلو جاري ڪيو آهي، جنهن ۾ عدالتن کي هدايت ڪئي وئي آهي ته شاهدن کي بيان ڏين وقت ويهڻ جي سهولت فراهم ڪئي وڃي۔
عدالت پنهنجي فيصلي ۾ واضح ڪيو آهي ته پاڪستان جو آئين هر شهري کي انساني وقار، جان جي تحفظ ۽ منصفاڻي ٽرائل جو حق ڏئي ٿو۔ آئين جي آرٽيڪل 14 مطابق هر انسان جي عزت ۽ احترام کي يقيني بڻائڻ رياست جي ذميواري آهي۔
عدالت وڌيڪ چيو ته شاهد جڏهن Witness باڪس ۾ اچي ٿو ته هو عدالت جو نوڪر نه پر انصاف جي عمل ۾ مدد ڪندڙ هڪ شهري هوندو آهي۔ قانون رڳو ان کان سچ ڳالهائڻ جي تقاضا ڪري ٿو، نه ته کيس غير ضروري جسماني تڪليف يا دٻاءُ برداشت ڪرڻي پوي ٿي
انصاف جو اصل مقصد برداشت يا تڪليف نه، پر سچ تائين پهچڻ آهي، ۽ سچ ان ماحول ۾ بهتر نموني سامهون اچي ٿو جتي شاهد کي سڪون، تحفظ ۽ احترام حاصل هجي۔
ان بنياد تي سپريم ڪورٽ سڄي ملڪ جي سول، ڪرمنل ۽ ٻين عدالتن کي هدايت ڪئي آهي ته witness باڪس ۾ شاهدن لاءِ ڪرسي يا ويهڻ جي مناسب سهولت فراهم ڪئي وڃي، جيئن شاهد عزت ۽ آرام سان پنهنجو بيان ڏئي سگهن۔
هي فيصلو اسان کي ياد ڏياري ٿو ته عدالت رڳو قانون لاڳو ڪرڻ جي جاءِ ناهي، پر انساني وقار ۽ انصاف جي قدرن جي محافظ به آهي۔
