05/10/2026
میرپورخاص: خواتین میں مفت پنک ای وی اسکوٹیز کی تقسیم
میرپورخاص: سندھ کے سینئر وزیر و صوبائی وزیر اطلاعات، ٹرانسپورٹ و ماس ٹرانزٹ شرجیل انعام میمن نے خواتین میں مفت پنک ای وی اسکوٹیز کی تقسیم کی تقریب سے خطاب کرتے ہوئے کہا کہ خواتین کو بااختیار بنانا شہید محترمہ بینظیر بھٹو کے وژن کا اہم حصہ ہے۔
انہوں نے کہا کہ تربیت اور ٹیسٹ مکمل کرنے والی خواتین کو ای وی اسکوٹیز فراہم کی جا رہی ہیں، جبکہ حکومت کا ہدف ڈرائیونگ لائسنس رکھنے والی 50 ہزار خواتین کو ای وی اسکوٹیز فراہم کرنا ہے۔ انہوں نے واضح کیا کہ یہ سہولت سندھ کے تمام اضلاع میں خواتین تک پہنچائی جائے گی۔
تقریب میں صوبائی وزیر ثقافت و سیاحت سید ذوالفقار علی شاہ، صوبائی وزیر میر طارق ٹالپور، ایم پی ایز امداد پتافی، قاسم سراج سومرو، علی حسن ہنگورجو، خیرالنساء مغل، ضلع کونسل چیئرمین میر انور علی تالپور، میئر میرپورخاص عبدالرؤف غوری، ڈپٹی کمشنر نواب سمیر حسین، سیکریٹری ٹرانسپورٹ اسد ضامن، ایم ڈی ٹرانسپورٹ بہزاد میمن، ڈپٹی ڈائریکٹر ٹرانسپورٹ رافیع علی لغاری اور دیگر نے شرکت کی۔
