31/08/2026
ضلعي گهوٽڪي جي چار لک ٻارڙن کي پوليو وائرس کان بچاءَ جا ڦڙا پيارڻ لاءِ انتظام مڪمل، 1300 کان مٿي پوليو ٽيمون مهم ۾ حصو وٺنديون. خبر موجب ڊپٽي ڪمشنر گهوٽڪي منظور احمد جي صدارت هيٺ پوليو مهم ۽ مليريا جي روڪٿام بابت سندس آفيس ۾ گڏجاڻي ٿي گذري جنهن ۾ اسسٽنٽ ڪمشنرن، ڊي ايڇ او ڊاڪٽر رائو آفتاب، ڊي ايم پي پي ايڇ آئي محمد عارف عباسي سميت لاڳاپيل کاتن جي عملدارن شرڪت ڪئي.
ان موقعي تي ڊپٽي ڪمشنر ڳالهائيندي چيو ته پوليو مهم کي ڪامياب بڻائڻ لاءِ سمورا لاڳاپيل عملدار پنهنجو ڀرپور ڪردار ڪن، موسم جي تبديلي ۽ خانه بدوشن جي آمد سبب وائرس پکڙجڻ جو خدشو موجود رهي ٿو انڪري سخت نگراني جي ضرورت آهي ته جيئن ضلعي جو ڪو به ٻار ڦڙن کان محروم نه رهي، ان موقعي تي اين اسٽاپ آفيسر ڊاڪٽر ظهير ڊومڪي بريفنگ ڏيندي ٻڌايو ته ضلعي ۾ 21 کان 24 سيپٽمبر تائين مهم جاري رهندي جنهن دوران 4 لک 5 هزار ٻارڙن کي ڦڙا پيارڻ جا انتظام مڪمل ڪيا ويا آهن. ٻئي طرف ڊپٽي ڪمشنر ڊي ايڇ او ۽ ميونسيپل عملدارن کي هدايتون جاري ڪندي چيو ته مليريا جي روڪٿام لاءِ اڳواٽ ۽ موثر قدم کنيا وڃن ان سلسلي ۾ خاص طور تي عوام ۾ مليريا کان بچاءَ بابت سجاڳي پيدا ڪئي وڃي، هن سرسو جي ڊسٽرڪٽ مئنيجر کي پڻ هدايت ڪندي چيو ته مختلف ڳوٺن ۾ سرسو جي ڪاميٽين تحت عام ماڻهن ۾ سجاڳي پيدا ڪرڻ لاءِ ڪردار ادا ڪيو وڃي ته جيئن هو مليريا کان بچاءَ جون احتياطي تدبيرون اختيار ڪن.
ان موقعي تي ڊي ايڇ او ٻڌايو ته مليريا جي وقت سر چڪاس نه ٿيڻ سبب نه صرف مريض لاءِ خطرو وڌي وڃي ٿو پر مليريا جو متاثر مڇرن ذريعي ٻين ماڻهن کي به متاثر ڪندو آهي اهڙي ريت حامله عورت جيڪڏهن مليريا ۾ مبتلا ٿئي ٿي ته پيٽ ۾ موجود ٻار به متاثر ٿي وڃي ٿو، هن چيو ته ضلعي گهوٽڪي ۾ 60 کان مٿي مختلف صحت مرڪزن تي مليريا جي چڪاس ۽ مفت دوائن جي سهولت موجود آهي. هن وڌيڪ ٻڌايو ته مڇر مار ڦوهاري سان مڇرن ۾ عارضي گهٽتائي اچي ٿي جڏهن ته زهريلي دونهين سبب خاص طور تي الرجي ۽ دمي جا مريض متاثر ٿين ٿا انڪري مڇرن کي ختم ڪرڻ جو بهترين حل گندي پاڻي جي دٻن ۾ زهريلي دوا وجهڻ آهي جنهن سان مڇرن جون نرسريون ئي ختم ٿي سگهن ٿيون.
