02/08/2026
#پشاور
مہمند قوم کے گرینڈ جرگے میں اہم مشاورت
پشاور میں ملک سلطان کے حجرے پر مہمند قوم کے ایک اہم جرگے کا انعقاد کیا گیا، جس میں امیر جمعیت علماء اسلام ضلع مہمند مفتی محمد عارف حقانی صاحب، جنرل سیکرٹری جمعیت علماء اسلام ضلع مہمند مفتی محمد طلحہ فقیر صاحب، سیکرٹری اطلاعات ارشد بختیار صاحب، ڈپٹی جنرل سیکرٹری سعید صافی، سابقہ میئر اپر مہمند حافظ تاج ولی صاحب دیگر ضلعی قیادت کے ہمراہ مہمند قوم کے معزز مشران، مہمند سیاسی اتحاد کے نمائندگان، وکلاء برادری اور مہمند قوم سے تعلق رکھنے والے افراد نے بڑی تعداد میں شرکت کی۔
جرگے میں پشاور ہائی کورٹ کے حالیہ فیصلے پر تفصیلی غور و خوض کیا گیا۔ شرکاء نے فیصلے کے مختلف قانونی، انتظامی اور سماجی پہلوؤں کا جائزہ لیتے ہوئے اس پر شدید تشویش کا اظہار کیا۔ متفقہ طور پر اس بات پر زور دیا گیا کہ سابقہ فاٹا میں موجودہ پولیس نظام مقامی حالات، قبائلی روایات اور عوامی مزاج سے زیادہ ہم آہنگ ہے، کیونکہ یہاں خدمات انجام دینے والے اہلکار مقامی جغرافیہ، ثقافت، قبائلی روایات اور عوامی ضروریات سے بخوبی واقف ہوتے ہیں۔
جرگے کے شرکاء نے اس خدشے کا بھی اظہار کیا کہ مذکورہ فیصلے کے اثرات صرف ضلع مہمند تک محدود نہیں رہیں گے بلکہ تمام قبائلی اضلاع اس کے نتائج سے متاثر ہو سکتے ہیں۔ اس لیے ایسے معاملات میں قبائلی علاقوں کے مخصوص حالات، زمینی حقائق اور عوامی احساسات کو پیشِ نظر رکھنا ناگزیر ہے۔
جرگے کے اختتام پر تمام شرکاء نے متعلقہ اداروں اور ذمہ دار حلقوں سے اپیل کی کہ کسی بھی حتمی فیصلے یا آئندہ لائحہ عمل کی تشکیل میں قبائلی عوام کے اجتماعی مؤقف، مقامی ضروریات اور خطے کے زمینی حقائق کو ترجیح دی جائے تاکہ عوام کے اعتماد اور علاقے کے امن و استحکام کو برقرار رکھا جا سکے۔
ڈیجیٹل میڈیا سیل جے یو آئی ضلع مہمند
