02/06/2026
ڈپٹی کمشنر کوہستان لوئر جناب ذوہیب حیات صاحب کا تحصیل ہیڈ کوارٹر ہسپتال پٹن کا دورہ؛ تریس بانڈہ کار حادثے کے متاثرین کے لیے ہنگامی اقدامات کی نگرانی
ڈپٹی کمشنر کوہستان لوئر جناب ذوہیب حیات صاحب نے تحصیل ہیڈ کوارٹر ہسپتال پٹن کا ہنگامی دورہ کیا، جہاں انہوں نے تریس بانڈہ کے مقام پر پیش آنے والے المناک کار حادثے کے جاں بحق افراد کے جسدِ خاکی ان کے آبائی علاقوں کو منتقل کرنے کے انتظامات کا جائزہ لیا اور لواحقین سے گہرے دکھ اور افسوس کا اظہار کیا۔
آج صبح تقریباً 8 سے 9 بجے کے درمیان ضلع لوئر کوہستان میں تریس بانڈہ پٹن کے مقام پر ایک موٹر کار کو شدید اور المناک حادثہ پیش آیا، جس کے نتیجے میں کار میں سوار تمام 6 افراد موقع پر ہی جاں بحق ہو گئے۔
واقعے کی اطلاع ملتے ہی ڈپٹی کمشنر کوہستان لوئر ذوہیب حیات کی خصوصی اور فوری ہدایت پر ایڈیشنل اسسٹنٹ کمشنر (ریونیو) نے فوراً جائے وقوعہ پر پہنچ کر امدادی کارروائیوں کی خود نگرانی کی۔ انتظامیہ نے ریسکیو 1122 کے اہلکاروں، پولیس اور مقامی لوگوں کی مدد سے تمام ڈیڈ باڈیز کو گاڑی سے نکال کر فوری طور پر تحصیل ہیڈ کوارٹر ہسپتال پٹن منتقل کیا۔
ڈپٹی کمشنر نے ہسپتال انتظامیہ کو سخت ہدایات جاری کیں کہ جاں بحق افراد کے تابوت تیار کرنے اور ان کی میتوں کو انتہائی احترام کے ساتھ ان کے آبائی علاقوں تک پہنچانے کے لیے تمام سرکاری وسائل بروئے کار لائے جائیں اور اس عمل میں کوئی تاخیر برداشت نہیں کی جائے گی۔ اس موقع پر انہوں نے ضلعی انتظامیہ کی جانب سے متاثرہ خاندانوں کے ساتھ ہر ممکن تعاون کی یقین دہانی بھی کروائی۔
Chief Minister Khyber Pakhtunkhwa
Chief Secretary Khyber Pakhtunkhwa
Commissioner Hazara
PMRU Khyber Pakhtunkhwa
Directorate General Information & PRs, KP
