05/09/2026
چئیرمین خیبر پختونخوا ٹیکسٹ بک بورڈ عابداللہ کاکاخیل کی ایک سالہ کامیاب کارکردگی
کسی بھی ادارے کی ترقی کا دارومدار محض منصوبوں پر نہیں بلکہ ایک ایسی قیادت پر ہوتا ہے جو دوراندیشی، دیانت داری، انتظامی صلاحیت اور درست فیصلوں کی قوت رکھتی ہو۔ خیبر پختونخوا ٹیکسٹ بک بورڈ کے چئیرمین جناب عابداللہ کاکاخیل نے اپنی ایک سالہ ذمہ داری کے دوران عملی اقدامات سے ثابت کیا ہے کہ اگر نیت درست اور سمت واضح ہو تو محدود وسائل میں بھی بڑے نتائج حاصل کیے جا سکتے ہیں۔
چئیرمین صاحب کا سب سے بڑا اور تاریخی کارنامہ تعلیمی سال 27-2026 کے لیے درسی کتب کی طباعت کا ٹینڈر ای پیڈ سسٹم (e-PADS) کے ذریعے کرانا تھا۔ آن لائن اور شفاف طریقۂ کار کے نتیجے میں درسی کتب کی طباعت کی مجموعی لاگت تقریباً چار ارب روپے تک محدود رہی، جس سے صوبائی حکومت کو اربوں روپے کی بچت ہوئی۔
یہ کامیابی اس لحاظ سے بھی غیر معمولی ہے کہ تعلیمی سال26-2025 میں درسی کتب کی طباعت کی مجموعی لاگت تقریباً چھ ارب روپے تھی، جبکہ اس سے پہلے کے سالوں میں یہ اخراجات بالترتیب سات ارب اور دس ارب روپے تک پہنچ چکے تھے۔ شفافیت، مقابلے اور جدید آن لائن نظام کے ذریعے اخراجات میں یہ نمایاں کمی بلاشبہ ایک بڑی انتظامی کامیابی ہے۔
چئیرمین عابداللہ کاکاخیل کی قیادت میں بورڈ کی تیار کردہ درسی کتب پر سیکیورٹی سیلز لگانے کا مؤثر اقدام بھی کیا گیا تاکہ کتب کی غیر قانونی خرید و فروخت اور جعلی درسی کتب کی مارکیٹ میں ترسیل کو روکا جا سکے۔
اسی سلسلے میں مختلف اضلاع میں ضلعی انتظامیہ کے تعاون سے غیر قانونی کتب فروشوں اور پائریسی میں ملوث عناصر کے خلاف کریک ڈاؤن کیا گیا اور قانون کے مطابق کارروائیاں عمل میں لائی گئیں۔ یہ اقدامات نہ صرف بورڈ کے مالی مفادات کے تحفظ کے لیے اہم ہیں بلکہ طلبہ اور والدین کو معیاری اور مستند درسی کتب کی فراہمی کے لیے بھی ضروری ہیں۔
درسی کتب کی تیاری کے دوران پیش آنے والے مختلف انتظامی، تکنیکی اور عملی مسائل کو بھی چئیرمین صاحب نے دوراندیشی، تحمل اور خوش اسلوبی سے حل کیا۔ مختلف پبلشرز کو بورڈ کے قوانین، پالیسیوں اور ضوابط کے مطابق کتب کی تیاری اور فروخت پر آمادہ کرنا بھی ایک اہم کامیابی رہی۔
چئیرمین صاحب کی ذاتی نگرانی اور خصوصی دلچسپی کے باعث درسی کتب کی ترسیل کا مرحلہ بھی انتہائی خوش اسلوبی سے، بلا کسی بڑے تعطل اور غیر ضروری پیچیدگی کے پایۂ تکمیل تک پہنچا۔
اس وقت بھی خیبر پختونخوا ٹیکسٹ بک بورڈ نئے ٹینڈرز، نئی پالیسی، کریکولم کے مطابق نئے نصاب کی تیاری اور دیگر اہم انتظامی امور پر پوری توجہ اور یکسوئی کے ساتھ کام کر رہا ہے۔ ایک سال کے دوران بورڈ کو ایک واضح سمت دینا اور اسے درست ٹریک پر گامزن کرنا موجودہ قیادت کی اہم کامیابیوں میں شامل ہے۔
یہ صرف ایک سال کی کارکردگی ہے۔ امید ہے کہ آنے والے دنوں میں بہتر منصوبہ بندی، شفاف پالیسیوں اور مؤثر انتظامی اقدامات کے ذریعے نہ صرف حکومت کو مزید مالی بچت حاصل ہوگی بلکہ خیبر پختونخوا کے طلبہ کو بھی معیاری، جدید اور بروقت درسی کتب کی فراہمی ممکن ہو سکے گی۔
ان شاء اللہ آنے والا وقت خیبر پختونخوا ٹیکسٹ بک بورڈ، صوبائی حکومت اور عوام کے لیے مزید کامیابیوں، بچتوں اور مثبت تبدیلیوں کی نوید لے کر آئے گا۔
اللہ تعالیٰ چئیرمین خیبر پختونخوا ٹیکسٹ بک بورڈ، جناب عابداللہ کاکاخیل کے دوسرے سال کو بھی بورڈ، حکومت اور عوام کے لیے مزید نیک، بابرکت اور کامیاب بنائے۔
آمین۔
