14/05/2026
وزیراعلیٰ خیبرپختونخوا سہیل آفریدی نے کرپشن کے خلاف زیرو ٹالرنس پالیسی پر دوٹوک مؤقف اختیار کرتے ہوئے کہا ہے کہ چیئرمین کے وژن کے مطابق صوبے میں بلاامتیاز احتساب جاری ہے۔ اب تک متعدد افسران کے خلاف انکوائریاں، معطلیاں اور برطرفیاں عمل میں لائی جا چکی ہیں جبکہ مزید کیسز زیرِ کارروائی ہیں۔
انہوں نے کہا کہ پوسٹنگ اور ٹرانسفر کا نظام مکمل طور پر شفاف بنایا گیا ہے اور غیر ضروری مداخلت کا خاتمہ کر دیا گیا ہے۔ حکومت کے خلاف منفی پروپیگنڈے اور بے بنیاد الزامات پھیلانے والوں کو بھی تنقید کا نشانہ بناتے ہوئے کہا کہ اگر کسی کے پاس کرپشن کے مستند ثبوت موجود ہوں تو حکومت فوری کارروائی کرے گی۔
وزیراعلیٰ نے اعلان کیا کہ عوام کی سہولت کیلئے خصوصی رابطہ نمبرز جاری کیے جائیں گے، جبکہ کرپشن کے ثبوت فراہم کرنے والوں کو مکمل سہولت، تحفظ اور انعامات بھی دیے جائیں گے تاکہ صوبے میں شفافیت، احتساب اور قانون کی بالادستی کو مزید مضبوط بنایا جا سکے۔
