03/08/2026
بروقت قدم کبھی کبھی پوری زندگیاں بچا لیتے ہیں۔
صدر عوامی نیشنل پارٹی ضلع خیبر، سفیرِ امن عبدالرزاق آفریدی، کی بروقت کوششوں سے انسانی سمگلروں کے چنگل میں پھنسے دو کم عمر نوجوان بحفاظت بازیاب کر لیے گئے۔
بازیاب ہونے والوں میں محمد آفریدی ولد شکیل (قوم ملک دین خیل) اور سمیع اللہ ولد قلات (قوم ذخہ خیل) شامل ہیں، جنہیں رحیم یار خان سے محفوظ طریقے سے آزاد کرایا گیا۔
یاد رہے کہ انسانی سمگلروں نے دونوں کم عمر لڑکوں کو جھوٹے خواب اور سبز باغ دکھا کر ترکی بھجوانے کا جھانسہ دیا تھا۔ بدقسمتی سے اسی طرح ہر سال سینکڑوں نوجوان انسانی سمگلروں کے دھوکے میں آکر غیر قانونی راستوں کا انتخاب کرتے ہیں، جہاں انہیں شدید مشکلات، تشدد، قید، مالی استحصال اور بعض اوقات موت جیسے المناک انجام کا سامنا کرنا پڑتا ہے۔
ہم متعلقہ حکام، قانون نافذ کرنے والے اداروں اور حکومت سے پرزور مطالبہ کرتے ہیں کہ انسانی سمگلنگ جیسے سنگین جرم میں ملوث عناصر کے خلاف بلاامتیاز اور سخت قانونی کارروائی عمل میں لائی جائے۔ محض چند سکوں کی خاطر معصوم نوجوانوں کی زندگیاں تباہ کرنے اور خاندانوں کو اجاڑنے والے عناصر کسی رعایت کے مستحق نہیں۔
اس کے ساتھ ساتھ بین الاضلاعی اور بین الصوبائی مسافر بسوں میں سفر کرنے والے افراد، خصوصاً کم عمر نوجوانوں کی مؤثر جانچ پڑتال کے لیے جامع لائحۂ عمل مرتب کیا جائے تاکہ انسانی سمگلنگ کی روک تھام ممکن بنائی جا سکے اور مزید خاندانوں کو ایسے المناک حادثات سے محفوظ رکھا جا سکے۔
