02/08/2026
سوات میں امن پاسون کو ناکام بنانے کے لیے معصوم لوگوں پر دھماکہ
اج سوات کے کبل چوک میں امن پاسون کے دوران دھماکہ۔ جس میں ۱۴ پشتون شہید اور درجنوں زخمی ہیں، ریاست نے پہلے پی ٹی ایم کے ساتھیوں کو گرفتار کرکے اور پھر انکے گھروں پر چھاپے مار کر امن پاسون کو روکنے کی کوشش کی۔ لیکن جب وہ ناکام ہوئے تو آج پولیس والوں اور عام پشتون کو قربانی کا بکرا بنا کر لوگوں کو یہ پیغام دیا کہ یہاں پر صرف جنگی پالیسیاں چل سکتی ہیں امن کے لیے اور اکھٹا نہیں ہوسکتے۔ پشتون تحفظ موومنٹ اس اندوہناک دھماکے کی شدید ترین الفاظ میں مذمت کرتی ہے اور شہداء کے لواحقین سے اظہارِ تعزیت جبکہ زخمیوں کی جلد صحت یابی کی دعا کرتی ہے۔
یہ اس پورے جنگی ماڈل کی ناکامی کا اظہار ہے جس نے دہائیوں سے ہمارے وطن کو جنگ اور عدم استحکام کے سوا کچھ نہیں دیا۔ امن کے لیے نکلنے والے عوام کو پہلے گرفتار کیا جاتا ہے، ان کے گھروں پر چھاپے مارے جاتے ہیں، ان کی سیاسی سرگرمیوں کو سبوتاژ کیا جاتا ہے، اور پھر امن کے مطالبے کو خوف کی فضا میں دفنانے کی کوشش کی جاتی ہے۔
ہم ایک بار پھر واضح کرتے ہیں کہ پشتون وطن کو مستقل جنگی خطہ بنانے والی پالیسیاں نہ صرف ناکام ہو چکی ہیں بلکہ انہی پالیسیوں نے عدمِ تحفظ، اور عسکریت کو جنم دیا ہے۔ جبر اور طاقت کے ذریعے کسی قوم کو خاموش نہیں کیا جا سکتا۔ امن عوام کا بنیادی حق ہے، کسی ادارے یا طاقت کی عنایت نہیں۔
پشتون تحفظ موومنٹ پشتون عوام سے اپیل کرتی ہے کہ وہ خوف کے ماحول کو مسترد کرتے ہوئے پہلے سے زیادہ منظم ہوں۔ ہماری طاقت ہمارا اتحاد اور سیاسی جدوجہد ہے۔ اگر آج ہم منتشر رہے تو جنگ کی یہ سیاست مزید گہری ہوگی، لیکن اگر ہم متحد رہے تو کوئی طاقت ہمارے قومی حقوق کی آواز کو خاموش نہیں کر سکتی۔
ہم تمام پشتون سیاسی جماعتوں، قومی تحریکوں، طلبہ، وکلا، مزدور تنظیموں، خواتین اور نوجوانوں سے اپیل کرتے ہیں کہ وہ وقتی سیاسی اختلافات سے بالاتر ہو کر پشتون وطن کو جنگ اور خوف کی سیاست سے نجات دلانے کے لیے مشترکہ قومی محاذ تشکیل دیں۔
پشتون تحفظ موومنٹ
مرکزی شعبہ اطلاعات و نشریات
