Ghulam Nabi Marri

26/09/2026

18/09/2026

*بلوچستان سے حاصل ہونے والی گیس سے صوبے کی عوام محروم، کوئٹہ میں کم پریشر اور لوڈشیڈنگ پر بی این پی کا اظہارِ تشویش*

کوئٹہ: بلوچستان نیشنل پارٹی کے سینیٹرل ایگزیکٹو کمیٹی کے ممبر غلام نبی مری نے سردیوں کی شروعات کے باوجود کوئٹہ میں گیس کی لوڈشیڈنگ اور کم پریشر پر تشویش کا اظہار کرتے ہوئے کہا ہے شہریوں کی مشکلات میں مزید اضافہ ہوگیا ہے۔

اپنے ایک بیان میں غلام نبی مری نے کہا ہے کہ بلوچستان سے قدرتی گیس کے ذخائر حاصل ہونے کے باوجود صوبے کے عوام طویل عرصے سے گیس کی قلت اور کم پریشر کا سامنا کر رہے ہیں، جبکہ اب صوبائی دارالحکومت کوئٹہ کے شہری بھی گیس کی مناسب فراہمی سے محروم ہیں۔

انہوں نے کہا کہ کوئٹہ میں گیس صرف صبح، دوپہر اور شام کھانے کے اوقات میں مختصر دورانیے کے لیے فراہم کی جاتی ہے، تاہم ان اوقات میں بھی پریشر انتہائی کم ہونے کے باعث شہریوں کے لیے چولہا جلانا مشکل ہو جاتا ہے۔

غلام نبی مری نے کہا کہ بلوچستان کے قدرتی وسائل سے حاصل ہونے والی گیس سے خود صوبے کے عوام کو محروم رکھنا عوام میں احساسِ محرومی اور ناانصافی کے تاثر کو مزید تقویت دیتا ہے۔

انہوں نے سوئی سدرن گیس کمپنی کے حکام سے مطالبہ کیا کہ کوئٹہ میں گیس کی لوڈشیڈنگ اور کم پریشر کا فوری نوٹس لیا جائے اور شہریوں کو مناسب پریشر کے ساتھ بلاتعطل گیس کی فراہمی یقینی بنائی جائے، تاکہ سردیوں کے دوران عوام کو مزید مشکلات کا سامنا نہ کرنا پڑے۔

09/09/2026

9/9/2026
کوئٹہ
بلوچستان نیشنل پارٹی کے سینٹرل ایگزیکٹو کمیٹی کے ممبر غلام نبی مری ،ممتاز عالم دین بزرگ سیاستدان مولانا محمد خان شیرانی اور ملک عبدالحمید مینگل نے سینئر صحافی عبدالظاھر ناصر کے بھاہی کے انتقال پر انکے گھر جاکر لواحقین سے اظہار تعزیت وفاتحہ خوانی کررھے ھیں انہوں نے اللہ تعالیٰ سے دعا کی ھے کہ وہ مرحوم کو اپنے جوار رحمت جنت الفردوس میں اعلیٰ مقام عطا فرمائے اور پسماندگان کو صبر جمیل کی توفیق دے آمین

09/09/2026

سرکاری ہسپتالوں میں ایم آر آئی کی بھاری فیسیں غریبوں کی پہنچ سے باہر ہیں، فوری طورپر قیمتیں کم کی جائیں:غلام نبی مری
بلوچستان نیشنل پارٹی کے سینٹرل ایگزیکٹو کمیٹی کے رکن غلام نبی مری نے کہا ہے کہ سرکاری ہسپتالوں میں علاج معالجے اور تشخیصی ٹیسٹوں کی سہولیات عوام کو انتہائی کم نرخوں پر فراہم کی جانی چاہئیں، تاہم بدقسمتی سے بولان میڈیکل کمپلیکس ہسپتال سمیت بعض سرکاری ہسپتالوں میں مہنگے تشخیصی ٹیسٹ غریب اور کم آمدن والے مریضوں کے لیے مشکلات کا باعث بن رہے ہیں۔انہوں نے کہا کہ بولان میڈیکل کمپلیکس ہسپتال میں ایم آر آئی کی فیس ہزاروں روپے مقرر ہونا تشویشناک ہے، کیونکہ کم آمدن والے افراد کے لیے اتنی بڑی رقم ادا کرنا آسان نہیں۔ صاحبِ حیثیت لوگ کسی حد تک مہنگے ٹیسٹوں کے اخراجات برداشت کر سکتے ہیں، لیکن غریب اور مزدور طبقہ پہلے ہی مہنگائی اور معاشی مشکلات کا شکار ہے، ایسے میں ہزاروں روپے کے تشخیصی ٹیسٹ ان کی استطاعت سے باہر ہو جاتے ہیں۔غلام نبی مری نے کہا کہ سرکاری ہسپتالوں کا بنیادی مقصد عوام کو سستی اور معیاری طبی سہولیات فراہم کرنا ہے، بالخصوص ان لوگوں کو جو نجی ہسپتالوں اور مہنگے تشخیصی مراکز کے اخراجات برداشت نہیں کر سکتے۔انہوں نے مطالبہ کیا کہ بولان میڈیکل کمپلیکس ہسپتال سمیت صوبے کے تمام سرکاری ہسپتالوں میں ایم آر آئی، سی ٹی اسکین اور دیگر ضروری تشخیصی ٹیسٹوں کے نرخوں کا ازسرنو جائزہ لیا جائے اور کم آمدن والے مریضوں کے لیے خصوصی رعایت یا مفت تشخیصی سہولیات کا مؤثر نظام وضع کیا جائے، تاکہ کوئی غریب مریض صرف مالی مشکلات کے باعث ضروری تشخیص اور علاج سے محروم نہ رہے۔

09/09/2026

09/09/2026
علم و ادب اور سیاست، بلوچستان کا فکری ورثہ
تحریر ۔نسیم جاوید ھزارہ

بلوچستان کی سرزمین اپنی سنگلاخ چٹانوں، وسیع و عریض صحراؤں اور طویل ساحلوں کی ہی امین نہیں، بلکہ یہ خطہ علم و ادب، شعر و فن اور فکری شعور کے لحاظ سے بھی نہایت زرخیز اور تاریخی اہمیت کا حامل رہا ہے۔ اس مٹی سے ایسے نامور ادیب، دانشور، مفکر اور مدبر ستاروں کی مانند ابھرے ہیں، جن کے علم و عمل کی روشنی نے نہ صرف اس سرزمین کے باسیوں کو منور کیا، بلکہ دنیا بھر کے تشنگانِ علم کی پیاس بجھانے میں بھی ایک تاریخی کردار ادا کیا۔ حال ہی میں بلوچستان کے ممتاز و معروف مصنف اور صاحبِ قلم، جناب آغا گل کی جانب سے اپنی معرکۃ الآرا کتابیں—"آبِ گم"، "گردل" اور "شخصیت و فن" بلوچستان نیشنل پارٹی (بی این پی) کے مرکزی رہنما اور ممبر سنٹرل ایگزیکٹیو کمیٹی، جناب غلام نبی مری کو پیش کیا۔ یہ واقعہ محض دو شخصیات کی ملاقات نہیں، بلکہ یہ بلوچستان کی فکری روایت اور سیاسی شعور کے مابین ایک خوبصورت فکری سنگم کی علامت ہے۔ بلوچستان ہمیشہ سے تہذیب و تمدن، ادب اور ثقافت کا ایک قدیم اور تاریخی مسکن رہا ہے۔ مہر گڑھ کی قدیم ترین تہذیب سے لے کر موجودہ دور تک، یہ خطہ منفرد جیو پولیٹیکل (جغرافیائی و سیاسی) اہمیت، سٹریٹجک محلِ وقوع اور گراں مایہ تمدنی ورثے کی وجہ سے دنیا بھر کے محققین کی توجہ کا مرکز ہے۔ اپنے مخصوص جغرافیے اور تزویراتی مقام کی وجہ سے اس دھرتی نے جہاں بے شمار تاریخی انقلابات دیکھے، وہاں اس نے اپنے باسیوں کو ایک الگ نظریاتی پختگی، جراتِ رندانہ اور فکری استقامت بھی عطا کی۔ یہاں کی مٹی میں ایک منفرد سحر ہے جو تاریخ دانوں، شاعروں اور ادیبوں کو اپنی طرف کھینچتا ہے، اور یہی وجہ ہے کہ اس دھرتی نے کبھی بانجھ پن کا سامنا نہیں کیا، بلکہ ہر دور میں بڑے نابغہ روزگار انسان پیدا کیے۔
جناب آغا گل کا شمار بلوچستان کے ان چند گنے چنے قلم کاروں میں ہوتا ہے جنہوں نے اپنی تحریروں کے ذریعے بلوچستان کے حقیقی سماجی، نفسیاتی اور تاریخی پسِ منظر کو ادبی افسانے اور نثر کے قالب میں ڈھالا۔ ان کی تخلیقی کاوشیں محض الفاظ کا مجموعہ نہیں، بلکہ اس دھرتی کے درد، سسکیوں، اور فکری ابال کا اظہار ہیں۔ "آبِ گم" اور "گردل" جیسی تصانیف جہاں بلوچستان کے گم گشتہ تاریخی اور ثقافتی کرداروں کی بازیافت کرتی ہیں، وہاں یہ یہاں کی سماجی ناہمواریوں اور یہاں کے انسانوں کے اندرونی تضادات اور لازوال داستانوں کی عکاس بھی ہیں۔ "شخصیت و فن" کے ذریعے انہوں نے اس خطے کے معتبر تخلیق کاروں اور مفکروں کے کام کو دستاویزی شکل دے کر آنے والی نسلوں پر ایک بہت بڑا احسان کیا ہے۔ آغا گل جیسے مصنفین دراصل اس دھرتی کے وہ "کاتب" ہیں جو یہاں کی تاریخ، روایات اور سچائیوں کو مٹنے سے بچانے کے لیے دن رات برسرِ پیکار ہیں۔ بلوچستان کی تاریخ گواہ ہے کہ یہاں کی سیاست اور ادب کبھی ایک دوسرے سے الگ نہیں رہے۔ میر گل خان نصیر جیسے انقلابی شاعروں اور دانشوروں نے ہمیشہ قلم اور سیاست کو عوام کے حقوق کا ہتھیار بنایا۔ اس تاریخی تناظر میں، آغا گل کا اپنی کتابیں بی این پی کے مرکزی رہنما غلام نبی مری کو پیش کرنا اسی دیرینہ روایت کا تسلسل ہے۔
جناب غلام نبی مری کا شمار بلوچستان کے ان سنجیدہ، فکری اور متحرک سیاسی رہنماؤں میں ہوتا ہے جو سیاست کو محض اقتدار کا کھیل نہیں، بلکہ سماج کی فکری بیداری اور غریب و مظلوم طبقات کے حقوق کی بحالی کا ذریعہ سمجھتے ہیں۔ ایک صاحبِ قلم اور محقق کی طرف سے ایک قوم پرست سیاسی مدبر کو کتابوں کا یہ تحفہ اس بات کا ثبوت ہے کہ دھرتی کے سچے ادیب اپنی دانش اور علم کو ان سیاسی ہاتھوں میں سونپنا چاہتے ہیں جو اس فکر کو آگے بڑھانے اور سماجی انصاف کی جنگ لڑنے کی صلاحیت رکھتے ہیں۔
کسی بھی قوم کی بقا اور اس کی پہچان کا دارومدار اس کی مادی دولت کے ساتھ ساتھ اس کے علمی و ثقافتی سرمایے پر بھی ہوتا ہے۔ بلوچستان کے مقتدر ادیب آغا گل کی کتابیں اس بات کا اعلان ہیں کہ بندوق اور بارود کی دھند کے باوجود، اس دھرتی پر قلم کی روشنی ہمیشہ غالب رہے گی۔ جب تک آغا گل جیسے صاحبِ قلم اپنی تحریروں سے سچائی کے چراغ جلاتے رہیں گے اور غلام نبی مری جیسے مخلص سیاسی رہنما ان چراغوں کی لو کو عوام تک پہنچانے کے لیے آمادہ رہیں گے، تب تک بلوچستان کی تہذیب، اس کا تمدن اور اس کی علم و ادب سے مالا مال مٹی دنیا بھر میں اپنی چمک دکھاتی رہے گی اور یہاں کے طالب علموں کی علمی پیاس بجھاتی رہے گی۔

08/09/2026

8/09/2026
کوئٹہ
بلوچستان نیشنل پارٹی کے مرکزی لیبر سیکرٹری موسیٰ بلوچ اور پارٹی کے سینٹرل ایگزیکٹو کمیٹی کے رکن غلام نبی مری نے گزشتہ روز دبئی محل ہال میں ایس ڈی او سریاب ، انجینئر صدام حسین لہڑی کی شادی کی تقریب میں شرکت کی۔

اس موقع پر انہوں نے انجینئر صدام حسین لہڑی اور ان کے اہلِ خانہ کو شادی کی دلی مبارکباد پیش کی اور نیک خواہشات کا اظہار کیا۔

تقریب کے موقع پر دلہا کے ہمراہ یادگار گروپ فوٹو بھی بنوائی گئی۔

05/09/2026

04/09/2026
کوئٹہ
بلوچستان نیشنل پارٹی کے مرکزی لیبر سیکرٹری موسی بلوچ،سینٹرل ایگزیکٹو کمیٹی کے ممبر غلام نبی مری سٹی انٹرنیشنل ھسپتال کوئٹہ میں ممتاز عالم دین ، سکالر پروفیسر سید محمد اقبال شاہ کی عیادت کررھے ھیں جو گزشتہ روذ روڈ ایکسیڈنٹ میں ذخمی ہوئے تھے انہوں نے اللہ تعالیٰ سے دعا کی ھے کہ وہ شاہ صاحب کو تندرستی و صحتیابی عطا فرمائے امین

02/09/2026

سردار عطا اللہ مینگل کی جدوجہد، قربانیاں اور قومی سیاست نوجوان نسل کے لیے مشعلِ راہ ہیں، غلام نبی مری

کوئٹہ: بلوچستان نیشنل پارٹی (بی این پی) کے مرکزی ایگزیکٹو کمیٹی کے رکن غلام نبی مری نے ممتاز بلوچ قوم پرست، وطن دوست اور عظیم سیاسی رہنما سردار عطا اللہ خان مینگل کی پانچویں برسی کے موقع پر انہیں شاندار الفاظ میں خراج عقیدت پیش کرتے ہوئے کہا ہے کہ سردار عطا اللہ خان مینگل کی قومی، وطنی اور سیاسی جدوجہد اور قربانیاں ناقابلِ فراموش ہیں۔اپنے ایک بیان میں غلام نبی مری نے کہا کہ سردار عطا اللہ خان مینگل نے اپنی پوری زندگی بلوچ قوم، بلوچستان اور محکوم و مظلوم اقوام سمیت تمام انسانوں اور پسے ہوئے طبقات کے بنیادی حقوق کے حصول کے لیے جدوجہد میں گزاری۔ انہوں نے آمرانہ اور استحصالی قوتوں کے خلاف پوری زندگی مزاحمت کی اور اپنے اصولوں پر آخری دم تک ثابت قدم رہے۔انہوں نے کہا کہ سردار عطا اللہ خان مینگل نے اپنے اصولوں اور نظریات پر کبھی سرِ تسلیم خم نہیں کیا، جس کی پاداش میں انہیں قید و بند کی صعوبتیں برداشت کرنا پڑیں، جلاوطنی اختیار کرنا پڑی اور اپنے لختِ جگر کی قربانی بھی دینی پڑی، تاہم وہ اپنے قومی و سیاسی مؤقف سے دستبردار نہیں ہوئے۔غلام نبی مری نے کہا کہ سردار عطا اللہ خان مینگل جیسے عظیم رہنما صدیوں بعد پیدا ہوتے ہیں۔ بلوچستان اور اس خطے میں قوم پرستانہ سیاست، فکر اور نظریے کے حوالے سے سردار عطا اللہ خان مینگل ایک رول ماڈل کی حیثیت رکھتے ہیں۔ ان کی سیاسی بصیرت، اصول پسندی، جدوجہد اور قربانیاں تاریخ کے اوراق میں ہمیشہ زندہ رہیں گی۔انہوں نے کہا کہ سردار عطا اللہ خان مینگل کی قومی جدوجہد اور قربانیوں سے آنے والی نسلیں اور بالخصوص نوجوان رہنمائی حاصل کرتے رہیں گے۔ ان کی زندگی اصولی سیاست، استقامت، جمہوری جدوجہد اور محکوم اقوام کے حقوق کے لیے جدوجہد کی روشن مثال ہے۔غلام نبی مری نے کہا کہ سردار عطا اللہ خان مینگل کی پانچویں برسی کے موقع پر انہیں خراج عقیدت پیش کرنے کا بہترین طریقہ یہی ہے کہ ان کے افکار، اصولوں اور قومی جدوجہد کو آگے بڑھایا جائے اور بلوچستان کے عوام کے بنیادی، جمہوری، سیاسی، معاشی اور قومی حقوق کے حصول کے لیے پرامن جدوجہد جاری رکھی جائے۔