25/08/2026
انقلابی کمیونسٹ پارٹی ضلع پشین میں نامعلوم مسلح درندوں کی جانب سے پانچ بے گناہ مزدوروں کے وحشیانہ قتل عام کی سخت ترین الفاظ میں شدید مذمت کرتی ہے۔ محنت کشوں کے خون سے ہاتھ رنگنے کا یہ بزدلانہ عمل صرف چند مزدوروں پر نہیں بلکہ پورے محنت کش طبقے اور انسانیت پر کھلا حملہ ہے۔
محنت کش چاہے کسی بھی زبان، قوم یا خطے سے تعلق رکھتا ہو، وہ صرف اپنے بچوں کا پیٹ پالنے کی جدوجہد کر رہا ہوتا ہے، اور یوں محنت کشوں کا ناحق خون بہانا سراسر ریاستی نااہلی، بدترین ظلم اور کھلی دہشت گردی ہے۔
اس قسم کے وحشیانہ حملوں اور بے گناہ محنت کشوں کے قتل عام سے قومی تحریکوں کو کسی قسم کا فائدہ پہنچنے کے بجائے شدید نقصان پہنچتا ہے، کیونکہ مظلوم محنت کشوں کو نشانہ بنانا عوامی جدوجہد کو نچلی سطح پر کمزور اور بدنام کرنے کا باعث بنتا ہے۔ ہم اس دلخراش سانحے میں شہید ہونے والے مزدوروں کے غمزدہ خاندانوں کے ساتھ مکمل یکجہتی کا اعلان کرتے ہیں۔
انقلابی کمیونسٹ پارٹی بلوچستان بھر کے تمام محنت کشوں، طلبہ، نوجوانوں اور ترقی پسند سیاسی و سماجی کارکنوں سے پرزور اپیل کرتی ہے کہ وہ اس ریاستی بے حسی اور مزدور کشی کے خلاف متحد ہو کر ہر سطح پر بھرپور مذمت اور یکجہتی کی آواز بلند کریں۔ ہم ریاست اور انتظامیہ سے مطالبہ نہیں بلکہ خبردار کرتے ہیں کہ فوری شفاف تحقیقات کر کے قاتلوں کو کیفر کردار تک پہنچایا جائے، محنت کشوں کی جان و مال کی مکمل حفاظت یقینی بنائی جائے اور متاثرہ خاندانوں کی فوری بھرپور مالی معاونت کی جائے۔
