31/05/2026
په افغان تاریخ کي د سرښندنو ،اتلولیو او ویاړونو تر څنګ د سیاسي غلطیو بیا بیا تکرار هم تر سترګو کیږي
او د هري سیاسي غلطۍ اثرات تر یوې پېړۍ غځیږي
موږ سل کاله مخکي غازي امان الله خان له هیواده وشړی دا یوه سیاسي غلطي وه یوه پېړۍ وروسته هم موږ په هغه اور کي سوځیږو
موږ نږدې پنځوس کاله مخکي په نړیوال سیاست کي توازن د لاسه ورکړی نن هم په هغه اور کي سوځیږو
موږ په تېرو پنځوسو کلونو کي دښمنانو ته دا موقع په لاس ورکړه چي دافغانیزم پر ځای نوري نظریې موږ ته راوړي ممګن راتلونکي ډېر کلونه له همدې درده وکړیږو
موږ په خپل وطن کي د ازادۍ ډېر چانسوته موندلي دي خو ضایع سوي دي
خوشحال خان ،بایزید روښان ،باچاخان،صمدخان،فقیر ایپي ټول دازادۍ او خپلواک وطن په تکل راوتلي وه خو د قام غیر سیاسي ذهن نه وپېژندل او دا سیاسي غلطۍ بیا بیا تکرار سوې
موږ چي څه وایو څه لیکو هدف مي دا دی چي په افغان وطن کي د سیاسي غلطیو د تکرار مخه ونیسو
تر ډېرو بدو ورځو ،کړېدلو ځورېدلو ،اوښکو او دردونو وروسته د پښتون ژغورني غورځنګ په شکل کي افغانانو یو بل تاریخي سیاسي چانس موندلی دی او زموږ هدف دادی چي د سیاسي غلطیو د تکرار مخه ونیسو او له دې موقع څخه د لوی وطن دجوړوني ،افغان ژغورني ،سیال او مترقي افغان ملت لپاره ګټه واخلو
ګیلمن ،ارمان لوڼي ،عارف وزیر ،دخړ کمر شهیدانو ،دخیبر جرګې شهیدانو ،عثمان خان کاکړ ددې هدف لپاره سرونه قربان کړه چي افغانان په دې پوه کړي چي یوه پېړۍ وروسته یو بل سیاسي چانس په لاس راغلی دی باید ضایع نسي
نورالله ترین ،حنیف پښتین ، فرید اپریدي ،صمد حاجي ،او علي وزیر د زندان ګرمۍ او تکلیفونه زغمي چي دا چانس ضایع نسي
د پي ټي ایم مبارزین سرونه پر لاس ګرځوي ،د مرګ سره لوبیږي ،زندانونه په ډک دي ،په مختلفو حربو ځورول کیږي هر څه زغمي خو ددې تاریخي چانس د ضایع کېدو مخه نیسي
د پښتانه وطن ټول پوهان ،عالمان ،فیلسوفان ،د فکر او پوهي خلګ همدا یوه چیغه وهي چي د وطن ژغورني همدا تاریخي چانس مه ضایع کوی
د عبدالباري جهاني ،عبدالغفور لېوال ،دروېش دراني ،عبدالهادي عطایي ملا ، مولوي رحمت الله اندړاو محمداسماعیل یون غوندي نړیوال شخصیتونه شپه و ورځ کار کوي چي پښتون ژغورني غورځنګ وژغوري او قام ته یې ارزښت وروښیي
د رحمان بونیري غوندي وتلی نړیوال ژورنالسټ همدا څه موده مخکي دپښتون ژغورني غورځنګ رسمي غړیتوب واخیستی
هدف یې افغانانو ته پېغام ورکول دي چي د لر او بر افغان ژغورني یوازینی ژغورونکی پښتون ژغورني غورځنګ دی
که خدای مکړه دا چانس ضایع سي پښتانه به یو ځل بیا په اوږد مهاله غلامۍ کي ګیر سي ممکن یوه پېړۍ نور هم د همدې مرګونو ،دردونو او لوږو سلسله دوام وکړي
زلمی زيارکښ هڅاند
