02/02/2025
وزیر اعلیٰ پنجاب محترمہ مریم نواز شریف کے نام کھلا خط
محترمہ مریم نواز شریف صاحبہ،
السلام علیکم!
ہم آپ کی توجہ ایک نہایت اہم مسئلے کی طرف مبذول کرانا چاہتے ہیں۔ اڈیالہ روڈ، راولپنڈی شہر سے ملحقہ ایک گنجان آباد علاقہ ہے، جہاں گزشتہ دو دہائیوں میں آبادی میں تیزی سے اضافہ ہوا ہے۔ اسی تناسب سے، یہاں ترقیاتی فنڈز بھی راولپنڈی کے دیگر علاقوں کی نسبت زیادہ خرچ کیے گئے ہیں۔
واسا راولپنڈی کے زیرِ انتظام دھاماں سیداں واٹر سپلائی سکیم گزشتہ دس سال سے فعال ہے، جس کے ذریعے تقریباً ایک لاکھ افراد کو پانی فراہم کیا جا رہا ہے۔ اس منصوبے پر اربوں روپے کے سرکاری فنڈز خرچ ہو چکے ہیں، اور مقامی صارفین ماہانہ لاکھوں روپے بلوں کی مد میں ادا کرتے ہیں۔ اسی طرح، اس سکیم پر تعینات سرکاری ملازمین بھی بھاری تنخواہیں وصول کر رہے ہیں۔
محترمہ،
یہ سب کچھ ہونے کے باوجود دھاماں سیداں واٹر سپلائی سکیم یونین کونسل دھاماں سیداں کے عوام کے لیے ایک مستقل اذیت کا باعث بنی ہوئی ہے۔ واسا کے بعض ملازمین اپنی مرضی کے مخصوص علاقوں کو روزانہ پانی فراہم کرتے ہیں، جبکہ وہ علاقے جہاں سے انہیں کسی قسم کا فائدہ نہیں ہوتا، وہاں مہینوں تک پانی کی بوند تک نہیں پہنچتی۔ اس کے علاوہ، جو علاقے واسا کے کرپٹ ملازمین کو رشوت فراہم کرتے ہیں، انہیں بلا تعطل پانی ملتا ہے، جبکہ دیگر عوام پانی کی شدید قلت کا شکار ہیں۔
ہماری آپ سے گزارش ہے کہ:
1. دھاماں سیداں واٹر سپلائی سکیم کو فوری طور پر ریگولیٹ کیا جائے تاکہ ہر گلی اور ہر وارڈ کو برابری کی بنیاد پر پانی فراہم کیا جا سکے۔
2. یہاں سالہا سال سے تعینات ملازمین کا فوری طور پر تبادلہ کیا جائے تاکہ پانی مافیا کے اس نیٹ ورک کو توڑا جا سکے۔
3. پانی کی منصفانہ تقسیم کو یقینی بنانے کے لیے ایک آزاد اور غیر جانبدار کمیٹی تشکیل دی جائے، جو اس معاملے کی نگرانی کرے۔
ہم امید کرتے ہیں کہ آپ دھاماں سیداں کے عوام کی مشکلات کو ترجیحی بنیادوں پر حل کریں گی اور ہمیں پانی جیسی بنیادی ضرورت سے محروم نہیں رہنے دیں گی۔ آپ کی توجہ اور فوری ایکشن کے لیے ہم آپ کے بے حد شکر گزار ہوں گے۔
منجانب:
اہلیانِ یونین کونسل دھاماں سیداں
