04/07/2026
گجرات پولیس کی بروقت کارروائی، دھوکہ دہی کے مقدمہ میں ملزم گرفتار، 9 لاکھ 50 ہزار روپے برآمد
گجرات: ایس ایچ او تھانہ سٹی سرائے عالمگیر انسپکٹر راحیل عارف نے اپنی ٹیم کے ہمراہ کامیاب کارروائی کرتے ہوئے دھوکہ دہی کے مقدمہ میں نامزد ملزم کو گرفتار کر لیا۔
تفصیلات کے مطابق مدعی محمد رفیق کی درخواست پر ملزم کے خلاف دھوکہ دہی اور امانت میں خیانت کے الزامات کے تحت مقدمہ درج کیا گیا تھا۔ ایس ایچ او تھانہ سٹی سرائے عالمگیر انسپکٹر راحیل عارف نے اپنی پولیس ٹیم کے ہمراہ جدید تفتیشی طریقہ کار اور پیشہ ورانہ حکمت عملی اپناتے ہوئے ملزم کو گرفتار کیا۔
دورانِ تفتیش ملزم کے قبضہ سے 9 لاکھ 50 ہزار روپے برآمد کر لیے گئے ہیں، جبکہ مقدمہ کی مزید تفتیش جاری ہے۔ باقی رقم کی برآمدگی اور مقدمہ کے دیگر پہلوؤں پر بھی قانونی کارروائی عمل میں لائی جا رہی ہے۔
ڈی پی او گجرات اختر فاروق نے پولیس ٹیم کی کارکردگی کو سراہتے ہوئے کہا کہ شہریوں کے ساتھ دھوکہ دہی، فراڈ اور دیگر جرائم میں ملوث عناصر کے خلاف بلاامتیاز کارروائیاں جاری رہیں گی۔ گجرات پولیس شہریوں کے جان و مال کے تحفظ کو ہر صورت یقینی بنانے کے لیے پرعزم ہے، اور قانون شکن عناصر کے ساتھ کسی قسم کی رعایت نہیں برتی جائے گی۔
